西式

鼎爺喺節目到表現精湛嘅廚藝，大受觀眾讚賞，不過就有傳出呢間粵菜館「鼎會館」即將唔做，大家想試就要快喇！早前鼎爺就聯同駐店名廚李翔新設計兩份全新菜單，分別係午市菜單「庭園茶聚假日二人餐」同晚市菜單「鼎．會館 順德盛宴」。庭園茶聚假日二人餐係粵式嘅Brunch Set，每道菜都好似西餐咁做得十分精緻，其中最吸引人嘅就係香甜多汁嘅秘製叉燒。至於順德盛宴，入面嘅豉酒鵝燴陳村粉就採用咗新鮮預製嘅「順德馳名碌鵝」，鵝肉充分吸引香濃秘製醬汁，配埋陳村粉，簡直一流。 ▲鼎爺嘅廚藝有幾了得，相信大家喺節目入面都睇到，雖然價錢比較高，不過機會難得，點都要去試返次呀？ ▲庭園茶聚假日二人餐($768/兩位)，以西式Brunch嘅形式嚟包裝粵菜，一共有十款，每款都非常精緻。 ▲秘製叉燒、懷舊蝦多士、梨香釀帶子、紫晶千島汁脆蝦球，當中嘅叉燒經秘製醬汁醃最少5至6個鐘，再放入明爐燒至燶邊脆口，之後用煮過嘅麥芽糖搽上表面，再放入焗爐焗5分鐘，口感豐富，香甜多汁。 ▲話梅聖女果，就係車厘茄配梅醬，非常開胃。 ▲貴妃蚌稻庭麵、迷你豆莎煎堆、香漕滷水鵝肝，鵝肝用100度熱水浸至8成熟，之後放入冰水過冷河，令鵝肝維持喺最嫩滑狀態，再浸喺香漕滷水3個鐘，令鵝肝充分吸收滷汁，非常香口。 ▲阿爺芝麻卷、芋蓉燉鮮奶，食完上面嘅鹹食之後，就可以食呢兩款甜食，作為整個午市餐嘅完結。 ▲順德盛宴($888/一位)，訂座由六位起，而且要提前兩日預訂，想去試下嘅人一定要留意。 ▲北滘鹽燒鮮鮑魚、龍江生煎雞，呢份晚市菜單而家仲做緊優惠，由原價$888/位減至$4,888/6位，當中已經包括咗加一服務費，優惠期去到10月31日為止。 ▲均安蒸豬，係順德名菜之一，用豬腩以秘製調味粉同埋順德二曲酒醃製3個鐘以上，再放入蒸爐大概40分鐘，然後用釘喺豬皮上均勻咁插多個細洞，等油脂滲出之後用冰水沖洗10-15分鐘，最後放涼切件上碟，肉香多汁而唔肥膩。 ▲松茸菌白玉杯，冬瓜入面釀入松茸同埋野菌，賣相精美。 ▲脆煎魚餅，香脆嘅外層包住魚肉餅，非常可口。 ▲芋蓉燉鮮奶、懷舊白糖糕，食完鹹食之後，就可以享受埋呢兩款中式甜品。 ▲花金鼓兩食，以兩種食法食花金鼓魚，一種係以刺身伴多種配料一齊食，另一種就係以豉汁清蒸。 ▲豉酒鵝燴陳村粉，碌鵝嘅肉充分吸收咗香濃醬汁，將呢啲鵝肉放上陳村粉一齊蒸，令陳村粉都吸收埋鵝汁嘅精華，食完令人非常滿足。 ▲鮮香焗龍蝦，肉質彈牙爽口，又唔算太大份，食完個胃都仲有位可以食埋其他菜式。 ▲鼎級拆魚羹燴魚翅，入面有甘筍、粉絲、木耳、勝瓜、腐竹、星斑魚蓉、果皮燈同芫茜燈，口感非常豐富。 鼎．會館...