心太軟係一款比較難整嘅甜品，甜品控唔識自己整嘅話，可以去邊到搵心太軟嚟食呢？呢間位於長沙灣嘅甜品店相信可以滿足到你想食甜嘢嘅欲望，佢嘅心太軟有非常香濃嘅朱古力味，但食落口又唔會太甜，配埋冰凍嘅雪糕球，冰火交融，口感層次非常豐富。特別嘅係，除咗甜品之外，佢賣嘅秘製雞翼尖都非常唔錯，份量十足，而且都落足料，非常惹味。
▲自家制心太軟($49)，呢間甜品店非常地道，心太軟隔離仲畫咗連登豬同埋HK Add Oil嘅字眼！
▲除咗連登豬之外，仲有Pepe添！
▲芒果奇兵($43)，芒果+芒果雪糕+芒果沙冰+芋圓，芒果控真係唔可以錯過。
▲糯米糍($26)，有成7粒，價錢亦非常親民。
▲秘製雞翼尖($26)，好多人都鍾意食雞翼尖，喺呢到食完雞翼尖，再食甜品，簡直係享受！
甜一刻
地址：長沙灣福榮街218號美居中心62號舖地下
電話：3568 6757
營業時間：星期一至四 16:00 – 02:00；星期五至六 16:00 – 02:00；星期日 16:00 – 01:00
文字來源：香港人遊香港/ 圖片來源：@sweetmomentdessert、gourmand_bubble、ellaaaxbb