「Yum Cha 飲茶」呢間茶樓有好多款唔同嘅創意點心，吸引唔少外國遊客。臨近萬聖節，佢又推出咗一系列造型鬼馬嘅萬聖節限定點心，當中有外形好似眼球嘅蝦餃同埋手指造型嘅叉燒酥，迫真到令人有啲毛骨悚然。另外都有啲賣相得意嘅點心，例如木乃伊外形嘅臘腸包，個樣睇落有啲傻更更，唔會令人覺得恐怖，反而仲有啲萌添！ ▲中指叉燒($49)，將香甜嘅叉燒酥整成殭屍手指嘅樣，非常迫真，真係要鼓起勇氣先夠膽試。 ▲蝦靈入眼($49)，唔同你講嘅話，可能你都未必知呢個係蝦餃！ ▲木乃伊腸($49)，香軟嘅麵團包住臘腸，再加一對精靈嘅眼精，呢隻木乃伊真係完全唔恐怖，甚至仲好可愛添！ ▲鬼鬼祟祟($69)，外層係骷髏骨外形嘅香脆酥皮，入面包咗芝士、雞粒、蘑菇同茄汁豆，口感豐富。 ▲小鬼吃泥($28)，睇落真係同盆栽冇分別，其實上面嘅「泥土」係炒過嘅花生碎、黑糖、黃糖、曲奇碎同朱古力碎，再加埋煙韌嘅麻糬，估唔到「泥」都可以咁好食！ ▲木蝦乃衣($89)，又係一款造型萌爆嘅木乃衣點心，以麵包絲包住忌廉雞肉同鳳尾蝦炸至金黃色，好睇又好食。 ▲脆脆蝙蝠($76)，蝙蝠造型嘅多士釀入咗彈牙嘅墨魚膠，再沾上白芝麻之後拎去炸，配合埋甜酸醬，非常開胃。 ▲一籠八戒($49)，除咗萬聖節系列嘅點心之外，仲有其他恆常供應嘅點心，依款叉燒包同一般嘅叉燒包外形完全唔同，眼神楚楚可憐嘅豬仔，你捨唔捨得食呢？ ▲睇住流奶($49)，好似一隻外形蠢萌嘅黃色小生物，用筷子喺對眼下面戳一個洞，入面啲奶黃流出嚟，睇落就會好似隻生物喺到流口水咁，不過啲口水就係黃色嘅。 ▲紅都面埋($49)，其實係紅豆麻糬包，正如佢嘅外表一樣，甜甜地，又有煙韌嘅口感。 ▲明太子蛋腸粉($49)，腸粉入面包住明太子，唔只口感豐富，仲有一陣蛋香。 ▲椒鹽豆腐($59)，除咗點心之外，仲可以叫其他小炒，例如呢個椒鹽豆腐，外脆內軟，食落非常香口。 飲茶 尖沙咀店 電話：27511666 地址：尖沙咀加連威老道20-22號瑞生尖沙咀酒店3樓 營業時間：星期一至五...
