尖沙咀嘅新商場K11 Musea啱啱開咗冇耐，匯集咗好多本地同埋國際品牌，成為新嘅打卡熱點。其中呢間Artisan Lounge有號稱全城最貴嘅下午茶，皆因兩個人一齊叫一set下午茶就至少要$728。佢嘅下午茶又叫懸浮下午茶，會用一個三層金屬架裝住甜點同鹹點，並且將個架懸浮吊起，感覺奢華高貴。除此之外，食物都採用咗唔少矜貴食材，例如鹹點入面嘅魚子醬包點，唔只有高級魚子醬，上面仲鋪咗金箔，睇得又食得！ ▲餐廳位於商場嘅中庭，屬於半開放式，而且仲擺放咗唔少植物做裝飾，令人感覺好似喺庭園入面享受下午茶咁。 ▲Artisanal Afternoon Tea Set ($728/2位)，三層架嘅上面兩層係甜點，最底層就係鹹點，傳統嘅英式下午茶都係由底層開始食，由下至上，由鹹至甜。 ▲鹹點有魚子醬包點、吞拿魚薯片、伊巴利亞火腿蜜瓜、法式血鴨包、青瓜三文治同紫薯撻，甜點就有甜粟棒棒、香檸馬德蓮、迷你馬卡龍、朱古力棒、法式鮮花奶凍、軟香芝士杯、工匠朱古力、自家烘焙鬆餅同埋忌廉及自家玫瑰果醬。 ▲魚子醬包點，有股淡淡鹹香嘅海水味，仲加埋金箔，真係點都要相機食先。 ▲自家農場田園沙律($188)，除咗下午茶之外，仲可以叫其他嘢食，想食得健康嘅話，可以試下呢個沙律，入面嘅蔬菜由Artisan嘅自家農場每日新鮮運到，口感清爽。 Artisan Lounge 地址：尖沙咀梳士巴利道18號K11 MUSEA 008-008A舖 電話：2601 3428 營業時間：10am-10pm...
