好多女仔都鍾意食甜嘢，但食得甜嘢多又容易肥，真係好矛盾。堅尼地城嘅呢間Cafe就滿足女仔又想食甜嘢又唔想肥嘅願望，佢主打無麩質同純素蛋糕。一般麵包同蛋糕都會含有麩質，係一種比較難消化嘅物質，所以食完含有都麩質嘅食物之後會容易覺得飽滯，而無麩質蛋糕就可以減輕個胃嘅負擔。純素蛋糕就冇加蛋同奶，食完都冇咁容易肥，好適合唔想肥嘅女仔同埋食素人士。咁多款蛋糕之中，最受歡迎嘅就係招牌蝶豆花伯爵茶蛋糕，呢款屬於純素蛋糕，上面搽咗粉藍色嘅蝶豆花忌廉，仲灑咗啲矢車菊作為點綴，用嚟打卡啱哂。另外仲有款推出冇耐嘅彩虹蛋糕，唔只外形精美，而且無添加精製糖或者香精，仲有素食版提供，真係冇得輸！
▲Signature Earl Grey Cream Cake ($62)，由於係純素蛋糕，冇加蛋同奶，食落完全唔會覺得膩，食多件都唔怕！
▲Unicorn Cake ($78)，彩虹色嘅蛋糕，口感鬆軟，食純素嘅客人可以叫素食版。
▲Blue Flower Fairy ($62)，所謂生酮飲食，就係一種高脂肪、適量蛋白質同低碳水化合物嘅飲食法，可以強迫人體燃燒脂肪，幫助減肥，而呢款飲品以新鮮藍莓、自家製無糖藍莓果醬、椰漿同椰奶製成，屬於無糖、高脂肪類嘅飲品，適合進行緊生酮飲食嘅人。
▲除咗蛋糕同飲品之外，Cafe仲有其他熱食，呢款無麩質嘅紫色意大利海鮮燴飯，唔只賣相吸引，而且亦都好健康。
▲早餐嘅話可以揀多士，呢款多士上面放咗炒蛋、菇類同蔬菜，好味又健康。
Infiniti C
地址：西環堅尼地城科士街40號浚峯地下6號舖
電話：3460 4996
營業時間：星期日至四 8am-10pm、星期五及六 8am-10:30pm
文字來源：香港人遊香港/ 圖片來源：@infiniti__c