食完捧住個肚！
位於荔枝角D2 Place呢個由意大利人主理餐廳，意大利菜口味正宗唔需要多講，波士頓龍蝦有機意大利麵煙韌度恰到好處，掛上高湯熬煮海鮮高湯汁，配上香蒜車厘茄美味非常。唔講大家唔知，呢個勁量版Tiramisu，足足有3層手指餅厚，手指餅浸係冧酒內完全入哂味！同咖啡粉完全混和，而且奶油打得幼滑細膩，令小編甜品胃全面啟動！
▲初入餐廳，陳設同裝修均以淺色、簡潔木紋為主，周圍令人舒適且輕鬆既氛圍，係收工唔錯既聚腳點。
▲餐廳推出6款全新冬季菜式，全新菜式以熱量含量較高既食材入饌如牛肉、豬扒等，食完成個人暖笠笠！
▲生醃牛肉薄切配火箭菜、黑胡椒及巴馬臣芝士 ($128) 牛臀肉由意大利直送，以鹽、醋、橄欖油、胡椒和香草預先醃好。
▲切片後再配上意大利入口的火箭菜、意大利初榨橄欖油、24個月意大利parmesan 芝士、胡椒、紅菜頭和少量鹽，口感咸香。小編覺得用醃牛肉片卷住火箭菜同芝士 呢個食法最好，咁就同時食到火箭菜既清新，及醃牛肉既油脂香濃。
▲白酒番茄香蒜煮青口配羅勒 ($138)用意大利初榨橄欖油、意大利番茄、大蒜、白酒、意大利羅勒和香芹與新鮮青口蓋上蓋子後一起煮至開口，香味陣陣。
▲波士頓龍蝦（半隻）有機意大利麵配香蒜車厘茄及新鮮羅勒 ($248)龍蝦已經預先起豬，食係上黎冇咁狼狽。有機意大利麵初初咬口有d淋，咬落有少許回彈，而且意大利麵都掛上濃濃海鮮高湯，仲有豐富既龍蝦肉及意大利羅勒味道，真係來頭唔細！
▲美國肉眼牛扒 (USDA Prime)(8oz / $258)，先把意大利初榨橄欖油燒再加入海鹽、胡椒和迷迭香與肉眼牛扒一起香煎。食落口感一d都唔失望，肉眼牛扒肉質鮮嫩，雖然談唔上係厚切，不過勝在肉味夠濃！
▲小編黎到呢度都已經食得好飽喇！名為「Simply Tiramisu」($128)既甜品確係一d都唔簡單！首先佢係即叫即整，唔會因雪櫃過份冷藏而流失原始口感，而且今次餐廳特意加到大大份，足足有3層手指餅厚，手指餅亦吸收咖啡及MYERS’S 冧酒香濃。3層手指餅厚及3塊手指餅寛的Tiramisu，是依照餐廳意大利人老闆的家鄉食譜製作。先用來自意大利的Kimbo牌咖啡豆製作成Expresso，待咖啡放涼後再混入MYERS’S 冧酒，然後再將手指餅浸入。而頂層同夾層既芝士忌廉，芝士和意大利忌廉打勻至挺身而成，特別幼滑細膩！
Si Simply Italian Restaurant
地址: 荔枝角長順街15號D2 Place二期地下G03號舖
訂座電話: 2370 9022
營業時間:星期一 至 星期日中午12:00 至 晚上10:00
「Simply Tiramisu」供應期
每日限定15份，需電話預訂，只供堂食。
由2017年11月12日開始 至2018年2月11日
逢星期一至五: 3PM 至 10PM供應
逢星期六、日及公眾假期: 12NN 至 10PM供應
(2017年12月24、25、26及31日 和2018年1月1日 暫停供應)
文字來源：香港人.遊香港／圖片來源：香港人遊香港
—————————————————————
相關文章：
【日本最難book餐廳之一！香港開分店】
【沙哇滴卡～正宗泰式風味】