旺角美食2023｜夜光塗鴉街頭風漢堡店 橙色霓虹燈打造美式嘻哈風 美式Y2K打卡

位於旺角嘅呢間型格餐廳，以橙同銀色為主調，淨係面門都已經好有美式復古感，啱哂而家流行嘅y2k風潮，係打卡一流嘅地點！店內牆身佈滿彩色塗鴉，超有街頭風格。而且餐廳有分日間同夜間模式，日頭可以利用充足光線打卡，而夜晚就會轉做橙色霓虹燈，配埋店入面嘅夜光塗鴉，仲有Feel！食物方面就以漢堡為主，都有唔同嘅小食同調酒飲品等。

▲以彩色塗鴉做牆身，由本地塗鴉藝術家創作，以呢個背景打卡超有街頭風格。

▲最特別嘅係晚間時候店舖嘅燈光會轉為橙色霓虹燈，突顯到夜光塗鴉嘅瑩光。燈光改變之後更加有Feel，打卡照相都另有一番風味，餐廳更會播啲HipHop音樂，令成間舖更有街頭感。

▲滋味粒粒巨蝦竹炭堡（$90）：巨蝦堡夾有厚身嘅炸蝦肉餅，入面有粒粒彈牙蝦肉，口感極好，加埋酸酸地嘅千島醬同生菜、蕃茄等配料，就更清新啦。

▲貧民窟大魔王漢堡（$110）：好多人大推嘅漢堡，分量大材料豐富。有兩塊牛肉漢堡、煙肉、薯餅、洋蔥、芝士做餡。食量較少嘅人最好同朋友Share一齊食啦。

▲爆炒洋蔥煎蛋手打牛漢堡（$55）：手打牛肉多汁又重肉味，加埋炒過嘅洋蔥帶甜味同焦香味，好惹味之餘仲令整體味道增加層次。

Ghetto Cafe

地址：旺角黑布街13號地舖
營業時間：11:00-02:00（星期一至四、日），11:00-03:00（週末及公眾假期前夕）

文字來源：香港人遊香港/圖片來源：@ohmyfoodvan、@hk.foodmap、@ghetto.hk