今次介紹呢間旺角居酒屋同平時既居酒屋有啲分別，呢度既居酒屋營運概念係希望可以將日本文化帶到香港，跟足日本居酒屋先飲酒後食串燒概念。呢度每個季節都會提供好多種類既時令酒比客人揀，最大既特色係每晚都會有一位駐場唎酒師在場，唎酒師會幫客人配搭180ml清酒同野食，例如酒量淺既客人會幫佢地配搭較無易醉既清酒。老闆諗為好既酒要配搭適合既酒杯，因此呢度每款酒都有固定款式酒杯，同埋每款酒都有某種時令菜式配搭。呢度除左提供多款清酒外，食物質素都好高質嫁！呢度既食材大多都係日本直送到港，清酒配搭刺身或鮮魚有種鋤食既效果，因為清酒元素主要以米製成，配魚食可以突出到其鮮味，清酒鋤食呢種風味亦係老闆想帶到香港既一種文化。呢度無論裝修、食物、清酒、氣氛、服務都好高質，鐘意清酒既你絕對值得一試！
▲花: 精選刺身拼盤(四點盛 $480): 刺身左至右分別係 深海池魚、金目雕、吞拿魚赤身同油甘魚，刺身食得出好新鮮，唔會太勁雪藏味。刺身款式除左係因當時季節而定，亦都會睇當日客人揀左邊款清酒再安排款式比客人。
▲ 清酒Cocktail: 店員大推呢款，由麒麟山+抹茶酒+苦艾酒溝成的，飲落去苦中帶點甘味，呢款酒最岩再另配一d炸物食。
▲炸白蝦($88): 炸到好脆，食落去咸味都夠，唔會太淡而無味，呢款小食扲黎送酒一流！
▲時令秋酒配九曲燒杯，杯係老闆係名古屋金澤買，而呢隻酒係通常用作常溫熱飲，而酒既層次亦可以由凍飲到熱飲，係一款純清酒。
▲吉列廣島蠔 +自家制炸汁: 炸蠔一份有四粒，每粒都大大粒，炸粉唔算多，炸到好鬆脆！
▲汁煮南瓜: 食材既南瓜係由日本入口，煮到好林好入味，就算連南瓜皮都可以食埋。個汁係由日本酒+醬油+味醂(煮野食時用的清酒)煮成的，味道好特別。
▲串燒(左至右):雞心$40、雞胸軟骨 $40、明太子醬免治雞肉串 $48、雞頸肉、雞腎 $40。串燒食落辣辣地，因為落左七味粉燒，好惹味。
▲櫻花蝦炸豆腐($68): 炸豆腐上面有足夠櫻花蝦，炸豆腐一共有四舊，每舊都入晒甜醬油味。
▲餐廳上層有36個座位，裝修好靚好特別，係以塌塌米座位為主，呢度有時仲會舉辦一啲唎酒師活動，又或者可以包場搞品嚐清酒活動，當晚會有七款唔同清酒鋤食。裝修較為日式╴希望令到客人由環境同氣氛都好似身處在日本咁。
▲每晚都會有一啲特別同限量既菜式，廚師會幫手寫係黑板上面，唔會係餐牌寫出黎。主要係睇師傅係日本入左啲咩新鮮同特別食材，就會諗咩菜式，簡稱為每日時令菜。
▲鋪頭門口有投影射特唔同日本景色係牆上，小編今次去既係櫻花景色。而牆櫃入擺滿唔同款式同特色既清酒樽，清酒迷一定有興趣!
▲下層係酒吧座位，有個開放式廚房比客人睇住廚師燒串燒，店員都好樂意同客人傾下計，討論下清酒。
▲ 門口設計好有特色，而招牌上既logo就係代表月亮，意思是收了工時應該要放鬆下，老闆希望客人可以藉著品嚐清酒同美食，將香港工作既忙碌中可以放鬆一下。
▲餐廳現時做緊Facebook/ Instagram優惠，打卡就可以送燒物一份。
月．火鳳燒鳥
地址:旺角白布街2-24號藝興大廈地下9號舖
營業時間:星期一至日 18:00 – 03:00
電話:24582378
文字來源／圖片來源：香港人.遊香港