係荔枝角D2 Place 可以帶埋狗狗既餐廳選擇唔多，呢間係其中一間，侍應會安排餐廳室外位比帶狗狗既客人，如果太熱既時候仲會主動話開部風機比客人。呢間餐廳係專門食新加坡菜，一啲出名既無骨海南雞飯、海鮮喇沙摻摻等呢度都有得食嫁! 晚市會有新加坡風味既火鍋提供添，有喇沙湯底揀嫁! 如果唔想食火鍋既話可以試佢既一人餐，$96或$108 一人餐包一款小食、一款主菜同埋一杯飲品。呢度既份量都好大份嫁，一人食一個一人餐都好飽! 呢度落單係需要自己填落單紙，然後扲去收銀處度比錢嫁
▲新加坡無骨海南雞飯(晚市一人餐$96): 海南雞肉質幾嫩滑，雞既份量都好多，而個油飯粒粒分明。食得辣既人可以考慮揀麻辣口味既海南雞飯，會另上一碟麻辣醬汁比你點雞食。
▲惹味沙嗲雞肉串(一人套餐小食): 呢度d沙嗲汁岩晒啲唔太食辣既人，有甜甜地既味，雞肉燒到唔會勁乾，食落去雞肉都算嫩口。
▲鮮蝦薯絲卷(一人套餐小食): 薯絲炸到好脆包住蝦肉，會有碟泰式辣汁比客人點黎食。
▲新加坡小魚椰漿飯配南乳雞翼(晚市一人餐$96): 南乳雞翼好好食，南乳味好濃而啲雞肉都好十足嫩滑同埋雞翼皮炸到好脆。碟飯仲有青瓜、炸魚仔、花生同埋煎蛋作為配料。
▲海鮮喇沙摻摻(晚市一人餐$96):摻摻其實姐係油麵加米粉，係較為新加坡喇沙傳統食法。個喇沙湯底好濃郁，而配料都多，分別有2隻青口、2隻蝦、豆卜、白魚蛋同埋鹵蛋。
Bugis@叻沙・海南雞飯
地址：荔枝角長義街9號D2 Place 1期3樓305號舖
營業時間：11:00 – 22:00
電話：21160160
文字來源：香港人.遊香港／圖片來源：香港人.遊香港、@doudoushi