香港有得食鰻魚飯既地方唔多，油麻地呢間日式料理店主打活海鰻料理，菜式係採用由台灣直送既活海鰻，每日新鮮即劏。睇返個menu，真係有唔少海鰻料理，不過小編身為鰻魚控，緊係要試哂咁多款活海鰻餐點，所以就二話不說點左呢個活海鰻會席！活海鰻會席500蚊有找就可以試足6款料理包括刺身三點、季節活魚刺身、活海鰻蒸年糕、活海鰻天婦羅、蒲燒活海鰻籠仔蒸飯、活海鰻玉子蛋糕。小編最like就係海鰻天婦羅，炸得外層香脆內肉柔，而且又唔係油膩，而活海鰻焗玉子蛋糕，係香港真係好少見，甜甜地既蛋糕雞蛋香濃，又混入咸香既鰻魚蓉，又咸又甜口感特別！
▲時令季節沙律，沙律菜拌入炸魚皮非常清新開胃。
▲季節活魚刺身，採用新鮮時令活魚做刺身，口感紥實而鮮味十足！
▲+ $188 就可以試埋呢個晶瑩剔透既肥美池魚來薄切做刺身，池魚上既花仲可以食埋！
▲刺身盛合三點：油甘魚綿密魚味鮮甜無比；帆立貝口感鮮嫩彈牙，仲有大大隻甜蝦，濃厚而帶黏黏口感同膠質！
▲活海鰻蒸年糕，年糕福袋包住看似年糕，原來內餡仲有焦脆既活海鰻魚肉，食落年糕煙韌軟糯。
▲海鰻天婦羅，炸得外層香脆內肉柔軟，食落酥而不膩
▲活海鰻籠仔蒸飯，用迷你蒸籠保持鰻魚丼熱度，十足迷你版鰻魚丼，鰻魚汁淋上蒸飯更美味！
▲活海鰻焗玉子蛋糕，將蛋白拌入鰻魚肉焗製，咸香而帶點甜！
鱻88日本料理
地址：佐敦佐敦道39-39A號根德大廈地下及1樓
電話：26080680
營業時間：12:00 – 15:30／18:00 – 23:00 活海鰻會席： $488/位 包括 季節沙律、刺身三點、季節活魚刺身、活海鰻蒸年糕、活海鰻天婦羅、蒲燒活海鰻籠仔蒸飯、活海鰻玉子蛋糕
圖片及文字來源：香港人遊香港