【全新七彩織網彈跳迷宮!仲有波波池! 】

[博客授權分享:小小豬Kinsey]約左朋友係大本型食晚飯,見仲有時間咪同小小豬去行下商場,點知一行之下…..就變成一個小小豬開心大放電嘅活動啦~其實初時我地都係本著八卦心態,想睇下小小豬平日最鐘意玩嗰個森林遊戲會變左做咩新遊戲。一入到去就發覺唔得掂,因為搖身一變成為一個都幾大嘅彈跳迷宮,小小豬望到對眼都好似發青光咁,最後係時間許可下,就同佢入去玩一轉啦~

▲一入到場小小豬就已經一支箭咁衝去玩,有咩新嘅都唔理,最緊要係有得玩,佢有佢玩就等我嚟八卦下啦。

▲雖然係轉左新迷宮,但個價錢都好似係同以前差唔多(嗱…係對錢銀心水清嘅小小豬話,我自己都唔記得之前俾幾多錢啦)~

▲今依個新場就主要分為三個部分,先有糖果城(即係大型波波池)

▲中間就有一個彩色繩網~

▲仲有一個大迷宮~

▲仲有一個兒童GOLF場~

▲小小豬首先就去玩左依個彩色繩網,佢一望見就諗起暑假係北海道玩過,仲話好掛住添(阿仔….我又何嘗唔掛住呢..哈哈哈)。亦都係因為佢鐘意,所以佢成日都走入繩網爬來爬去~

▲之後佢又當然繼續左爬爬..右爬爬,平日行路又唔見佢咁快,一嚟到就真係睇少一眼都唔知佢行左去邊~

▲爬到去糖果城就當然要去玩個滑梯~

▲原來依個滑梯仲係感應式遊戲,個背景仲會定時改變,所以拋下拋下又可以玩一陣啦~

▲當然唔少得波波池,原來白色波波又幾靚哦~

▲係波波池扮游水又點可以滿足依隻好動豬,所以佢就轉向迷宮進發,又再繼續走…走….走啦~

▲原來依度都有條發光神秘隧道,小小豬仲好新奇咁帶左我入嚟,不過….其實又真係幾靚呀~

▲除左迷宮,仲有一條小模擬馬路俾小朋友玩車仔呀~

▲有個大兒童GOLF場就當然都打幾下,係….真係幾下,因為小小豬已經又飛快去跑去迷宮,繼續走來走去(我終於甩難唔洗陪玩啦)~

▲離開時見到有糖仔,見佢都玩得幾乖乖(其實….係我有點想食),所以就批准佢夾少少啦~哈哈….不得不俾個GOOD依隻豬仔,佢又真係幾有節制能力,話夾少少就係少少,依個都係美德嚟,希望佢可以繼續KEEP住啦~

後記:小小豬係走嘅時候話佢玩得好開心,不過就有少少未盡慶,如果可以玩多一陣就好了(怕怕醜醜咁話)。其實我地都間中都會嚟大本型,咁依個場都幾新淨,所以下次有時間就帶嚟放電啦(不過….都係嗰句….可唔可以唔捉我去爬一轉呀,年紀大唔操勞得啦….哈哈哈)

*此文章由小小豬Kinsey授權分享,原文網址:【開心大放電】J-Plus 全新彈跳迷宮

J Plus 室內遊樂場

地址:油塘高超道38號大本型內
營業時間:星期一至五11:00–22:30;星期六、日10:00–22:30
電話: 2343 5068

文字整理:香港人.遊香港/文字及圖片來源:小小豬Kinsey

Close Bitnami banner
Bitnami