小編雖然曾經喺長沙灣出沒過，不過竟然最近先發現呢間高質小店！小店有西式日式餐點供應，主打「手打牛肉」，漢堡包配上自家製醬汁，好出色！除此之外，呢個鰻魚石頭窩飯亦係熱點之一，將飯撈勻，啖啖都係芝士同鰻魚汁，仲有脆卜卜飯焦，好幸福呀！
▲火燒原條鰻魚石鍋伴飯 ($119) 鰻魚足足有 29cm長，另加$12蚊可以配拉芝芝士，而且仲係舖滿晒成個面，飯底入面本身有少少粟米粒，將飯同芝士撈勻加埋鰻魚汁，口感同味道都超正！鰻魚亦都好肥美，絕非行貨。整個伴飯份量頗多，兩個女仔Share食都好足夠！
▲招牌大隻佬漢堡 ($59) 配料好豐富，除咗自家製手打牛肉之外，仲有芝士、餐肉、紅菜頭、煙肉、蛋，仲有最重要嘅「Bryan秘製醬汁」，有啲似甜甜地嘅沙律醬，整體配起上黎好好味！小店仲會提供一個紙袋仔，等你可以切開拎住食，好貼心呀！
▲蒜香牛油生炸雞中翼 ($29) 有三隻，面上有大量炸蒜，肉質亦算嫩滑！另外因為叫咗石頭窩飯，可用半價加飲品，所以就試咗個 鮮製雜莓奶 (半價後$17) 雜莓奶味道偏淡，因為店主只用天然的生果材料而製，嗜甜嘅朋友可以選擇點香蕉奶！
▲除咗固有Menu，佢地仲每日有唔同嘅限定Menu，賣晒就無，既然店員極力推介，就點咗一個火灸黑椒珍寶帆立貝壽司 ($32) 試下。珍寶帆立貝果然好大隻好厚肉、微焦嘅表面配上黑椒粒，鮮味之餘亦夠惹味！
▲小店地方唔大，大約只有20個位，店員亦只得一個，所以有時落單添水等都可能要等等！不過店員非常有禮貌，亦都會問下你嘅喜好而介紹不同嘅食物，係除咗食物之外嘅另一加分位！大推！！
布萊恩·L食堂
地址：長沙灣元州街498號青華閣地下I號舖
電話： 5225 4332
文字／圖片來源：香港人.遊香港
相關文章：
【$130 即摘即食士多啤梨】
【暖笠笠！糖炒栗子！煨蕃薯！】