葵廣美味泰國菜
去親葵廣掃街，位於地下泰國小食店，店主係土生土長泰國人，而呢度最受歡迎嘅招牌菜有芒果糯米飯好受歡迎，最近小編仲收到網友報料原來果度既泰式海南雞撈麵，材料都好豐富下，有海南雞、青瓜、西芹、洋葱、紅蘿蔔同炸豬皮，最正係佢個麵底係營多撈麵，令人試完想再食！
▲四色芒果糯米飯($28): 打卡重點，四色糯米飯整得好精緻，特別嘅綠色係斑蘭，而藍色係碟豆花，斑蘭味都幾突出，不過糯米暖暖地又煙煙韌韌，椰漿非常香濃，芒果好甜，份量又幾多，而且好受歡迎，夜咗可能得返二、三色糯米飯，呢個價錢，好抵食。
▲炒金邊粉($30): 呢度嘅飯粉都係即叫即炒，夠晒火喉，而且份量唔少，而且有辣嘅香料可加，但真係辣嘅，所以根據返自己口味加會更好，一啲都唔油膩。
▲泰式海南雞撈麵($40): 份量非常夠，兩、三個一齊食都得，麵底多，配料都好多，有炸豬皮、青瓜等，主角海南雞好滑嫩，而且真係充滿泰式風味。
▲馳名泰式海南雞飯($40): 食泰國菜又點少得海南雞飯呢，海南雞好滑嫩而且無骨，食落又唔會太肥膩，而飯又粒粒分明同入味，雞件唔少，鍾意食海南雞飯嘅朋友，可以去試下。
▲斑斕大菜糕($25):呢款甜品有兩層，食落好爽口，完全係大菜糕嘅質感，而下面椰奶味都好重，一齊食好夾。
泰風SO
地址：葵芳葵富路7號葵涌廣場地下A76B號舖
電話號碼：56282028
營業時間：星期二至日：13:00 – 21:30（星期一休息）
文字來源：香港人.遊香港／圖片來源：sukiwwh、iorikong、kikiwong918