供應期到10/9咋!!
係尖沙咀行咗成日街，行完想搵Café坐下傾下偈，位於尖沙咀厚福街嘅草民都係一個唔錯嘅選擇，草民除咗裝修特別外，食物造型都落足心機，就好似最近一個新出嘅甜品「粒粒皆辛苦」，其實係菠蘿椰子慕絲蛋糕黎，造型的骰可愛，一個小菠蘿，再加杯咖啡，咁就一餐悠閒輕鬆嘅聚餐，但係想試就快啲試啦！
▲粒粒皆辛苦(單點:$58 / Set:$86): 一Set就會有多一杯手沖耶加雪夫咖啡，造型趣緻，食落菠蘿味重，入面有三層慕絲蛋糕，入口口感順滑，上頭嘅菠蘿葉係朱古力，味道偏甜。
▲黑松露野菌意大利飯($98): 黑松露同野菌份量唔少，成個意大利飯都好creamy，而飯粒偏硬身，食落唔膩仲好香黑松露味。
▲熱情果烏龍茶(跟餐優惠價:$2): 飲落烏龍茶味道唔係太突出，但係有陣茶甘味，熱情果味道較為濃郁，帶有酸酸甜甜味，非常解渴。
▲耶加雪夫(單點:$55 / Set:$86): 味道係花香同熱帶水果風味，上嘅時候好熱，飲落有微微嘅果酸味，再加一陣濃郁嘅花香味，入口甘香。
▲草民裝修特別，入門左手邊有一個小地台，上面鋪上草皮，等客人席地而坐，並且有心思咁搭左幾個小木屋，製造一啲私人空間俾客人。而店舖整體裝修貼近大自然，亦有綠色小擺設，令人愉快輕鬆度過聚餐時間。
草民 Grassman
地址: 尖沙咀厚福街12-12A號藍馬商業大廈9樓
電話: 6693 2896
營業時間: 12:00 – 22:30(星期一休息)
文字來源：香港人.遊香港／圖片來源：香港人.遊香港