好似去左外國！
依間餐廳由一班熱愛旅遊既年輕人打理，餐牌上既菜式，都係佢地從唔同國家旅行時得返黎既靈感，再加入新元素而成，主廚仲曾經係洲際酒店–Nobu度做過。進入餐廳，最觸目既莫過於牆上4部電視，上面播放著依班年輕人當時歐遊火車之旅既沿途景色，電視上即是行李架，可謂食著多國fusion菜去旅行。
▲店舖外觀：橙色為主，非常醒目。
▲店內環境：行李架、火車內箱鍋釘、播放鐵路景色的電視
▲餐廳招牌菜：阿根廷紅蝦意大利麵配風乾蕃茄龍蝦醬 · 巴馬臣芝士 $178
依碟菜除咗隻紅蝦有我手掌咁長(~15cm)，個汁都係靈魂所在。龍蝦汁用蝦頭熬製多個小時而成，鮮甜不在話下，配上風乾蕃茄，酸甜既味道令蝦醬既鮮味帶上另一層次！
▲牛肩胛配露筍黑松露波特菇 $228
牛肩胛中間有筋，肉質亦比較實淨但肉味香濃。上面有刨碎咗既固體青醬牛油汁，端上黎既時候，牛扒既熱力就會慢慢將醬汁溶化，令牛油香滲入底下既食材
甜品亦係餐廳賣點之一，試過哂餐牌上的款式，不妨試下做explorer，讓舌頭去冒險！以下，會介紹近期主廚有機會做既限定款：
▲Explorer_Mascarpone cheese Souffle(意大利軟芝士梳乎厘) $118
田園風擺設，小草芳花處處，預示住春天已到。切開梳乎厘，流質既意大利芝士慢慢流出，再配上藍莓雪糕… …真係好味到令人唔捨得咁快食完
▲Explorer_Stliro $118
依個睇落成個白雪雪既唔係雪糕，中間圓形既係酸酸甜甜既柚子泡沫，口感綿密。外則係急凍慕絲泡沫，入口即化，可以伴以放係底既杏仁蛋白霜一齊食，令蛋白霜食落更香甜。
Choo Choo
地址： 蘇屋順寧道364-368號昌暉大廈
電話： 3707 1034
開放時間：星期一至日12:00–15:00, 18:00–22:00
文字來源/圖片來源：香港人.遊香港/Kevia Tang