呢間位於旺角的日式拉麵店，由正宗日本人主理，主打日本地道拉麵，店內有多款特色套餐，其中最受歡迎的必食選擇是｢肉愛食者餐」，份量驚人，賣相一流最啱打卡！多塊大叉燒鋪滿碗面，再加上角切叉燒，顧名思義啱晒食肉獸！素食者亦可以選擇「野菜愛食者餐」，拉麵配上大量椰菜、芽菜及粟米。另外，大家也可按個人喜好追加炙叉燒、迷你蘆筍及溫泉蛋等17款付費配料。小店在用料方面充滿誠意，雞蛋及醬油都用日本貨，拉麵則由在港的日本製麵商造麵，份外彈牙。叉燒用上西班牙豬胛肉，以日本調味料醃足3小時。湯底分清湯及濃湯，清湯分醬油味及鹽味，濃湯則以3種不同的豬骨，熬足幾小時，充滿肉香！溫馨提示，在疫情較為嚴重下，建議大家盡量選擇外賣，外賣自取更有8折！
▲肉愛食者拉麵($120)，叉燒片鋪滿個碗，賣相一絕！入面還有角切叉燒、流心蛋、京蔥及荀，非常足料。
▲叉燒比較瘦，但口感仍然軟腍，麵底軟硬度適中，食落彈牙有咬勁，配搭配搭完美，食肉獸必叫。
▲基本拉麵($78，加椰菜 +$10)，豚骨清湯經慢火熬製後味道香淳，配搭較軟身麵底，口感剛剛好，追加的椰菜份量十足，整體清新好味。
▲炸餃子 ($30)，餃子炸得香脆，又不會太油膩，餡料有豬肉及椰菜等，熱辣辣與麵同食正好。
▲炸章魚丸($30)，又香又脆，章魚不算很多，但味道不錯。
▲店內的日式陳設，也相當適合打卡。
僕之拉麵
旺角店地址：旺角豉油街74號地舖
電話： 2338 9018
營業時間：星期一至日11:30 – 21:30
文字：香港人遊香港 /圖片：@eat_with_ho_ho_ho、@zanvsfood