大坑多好西相信人人都知，呢間日本割烹料理餐廳就係其中一間，主打多款配搭新穎嘅獨家菜式！菜式設計亦好重視視覺效果，例如使用煙熏槍。除咗令菜式更加吸睛，仲為食物添上煙熏香味，減輕肉料理嘅油膩感！ 餐廳招牌係特製壽喜燒風A4和牛丼，肉味好濃又多汁，黑松露加上洋蔥香氣四溢，篤破蛋黃之後，質感濃稠嘅蛋黃滲入每一樣食材，所有食材配搭好夾！另外一道使用煙熏槍嘅料理係瞬間薰製日本雞頸肉，將雞頸肉串擺落一個注滿煙燻嘅樽入面上枱，一打開煙燻香氣撲鼻， 視覺效果100分！
▲ 特製壽喜燒風A4和牛丼 夏松露 ($168)：壽喜燒湯煮過之後，和牛牛肩肉嘅牛肉味更加濃郁，加上日本雞蛋同夏松露，層次感更加豐富！
▲ 海膽 伴龍蝦湯啫喱 ($168)：由三層啫喱組成，底層係蛋黃醬打成，中間一層係龍蝦味，最高就是海膽，一次過食哂三層，口感好有層次！
▲ 鵝肝蒸蛋 特製濃汁 夏松露 ($158)：鮮嫩滑溜嘅蒸蛋上面鋪咗一件切好嘅鵝肝，脆米同松露，出乎意料嘅夾！
▲ 瞬間薰製日本雞頸肉 ($48)：雞頸肉炭燒過後，放入玻璃瓶煙燻上枱，好特別！雞頸肉肉質嫩滑又有彈性，充滿炭燒香！
▲ 松葉蟹肉忌廉餅 ($88)：材料包括松葉蟹肉、蘑茹、紅蔥同牛奶製成，食落非常脆，蟹肉亦好新鮮！
Kona
地址：大坑蓮花宮西街16號地舖
電話：2881 6339
文字來源：香港人遊香港 / 圖片來源 ： ＠nothingbutfoodies