今次介紹呢間灣仔CAFE主題都幾特別下，係一間以武俠小說為餐廳主題，店鋪裝修好似一間古代客棧一樣，以木製枱凳和中式瓷器為主。餐牌亦都似一本古代學武功的書籍，而菜式名字落足心思諗，不是以招式就是武器命名，餐廳玩Gimmick得黎食物質素亦都相當之高，絕對值得客人再戰江湖。另外，呢度既食物中西合璧，咖啡是以中式古代飲茶時的茶杯，岩晒打卡影相。餐廳一角擺了一個書櫃，放滿金庸小說，金庸迷既你絕對會想黎呢度睇住小說，幻想自己係古代時生活，過一個輕鬆的下午。
▲赤煉神掌($79):呢款意粉其實係蕃茄牛肉醬加上紅酒汁煮成，所以個汁好香濃好開胃，汁既份量岩岩好可以成個意粉都撈到。
▲V 草上飛($82):意粉用上自家製青草醬加上蒜蓉、洋蔥、蕃茄粒一齊炒，汁既味道濃郁，唔似平時出街食既青草醬無咩味，只食到醬汁既油，而意粉上有一個燒過既大啡菇添。
▲黃金堅壁($95): 呢款其實係西多士，炸到火候岩岩好，吐司邊位好香脆，配埋焦糖香蕉好夾，焦糖薄薄一片好脆身，另外西多士上仲有車打芝士、煙肉，配料相當之豐富，食完較肥膩的西多士仲可以食埋伴碟的沙律。
▲V倒踩三芝雲($53):呢款小食係田原麵包加上三重芝士同蜜糖焗成的，絕對係增肥之選呀，不過就算三重芝士都好，食落去又唔算好油膩，仲食到少少蜜糖甜度。
▲V 獨菇劍法($92): 其實係黑松露白酒忌廉菇意大利粉，黑松露味好香濃，醬汁食落好creamy又唔會太流，意粉軟硬度亦都適中。
笑林寺
地址:灣仔摩理臣山道33號地舖
營業時間:星期一至五08:00 – 19:00/星期六至日09:00 – 19:00
文字來源：香港人遊香港 / 圖片來源： @christinefung_tine、@evalovescakes、@leeman_930