毗鄰屏山文物徑既村屋，近年多左間醒目紅噹噹跑車招牌，原來係間跑車主題餐廳，老闆熱愛車既程度，將大量車主題元素擺入餐廳，全部都超級有心思！除左大賣環境之外，食物質素都其高，可見誠意十足。小編最推介大大份既燒牛肋骨，採用上美國Prime級別牛肋骨，點埋自家製燒汁非常Juicy！
▲賽車手薄餅($78)：薄餅係即叫即焗，因為表面落足Mozzarella芝士，熱食仲有得拉芝！在薄餅底上鋪滿鹹牛肉、火腿、辣肉腸、蘑菇，鹹香十足。
▲燒牛肋骨 ($138)：一上台小編們都嘩嘩聲，皆因份量非常有氣勢，原來係用左美國Prime級別牛肋骨，上台切成細細件，食落啖啖肉，本來肉質已經十分juicy，加埋自家製燒汁仲正！
▲露絲瑪莉燒春雞($98) 用1kg法國有機春雞，以Rosemary同黑椒醃得恰到好處。焗過後食落皮薄肉嫩，香味四溢，肉質嫩滑得連雞胸肉都唔覺！而且配菜都心思十足！
▲呢間跑車主題餐廳老闆對車既迷戀，係餐廳上既裝潢擺設，已經顯然易見，顯眼醒目既紅色跑車招牌、黑白格仔地板，令食客進入賽車既世界！小編細問之下，先知道原來老闆另外有做車房買賣汽車既生意，有興趣既朋友仔不妨同老闆傾下車經，相信佢一定會滔滔不絕。
▲餐廳上既燈飾亦精心挑選，車胎形狀同紅綠燈都非常有特色。
▲小食拼盤($78) 炸魷魚圈、蜜糖雞翼同芝士焗薯條，全部都係即叫即炸，完全冇油益味。一拎起邪惡芝士薯條，芝士拉絲效果即刻見到，炸魷魚圈都好足料，魷魚相當彈牙，而蜜糖雞翼外皮香脆微甜，令人好開胃，食落雞肉亦見嫩滑。
▲小食拼盤($78) : 一拎起邪惡芝士薯條，芝士拉絲效果即刻見到。
▲法拉利草莓乳酸、林寶堅尼薄荷仙子($38)：小編最愛法拉利草莓乳酸，將士多啤梨原粒打成沙冰，再加入士多啤梨果醬和乳酸，飲落似士多啤梨牛奶糖，甜甜地咁！
▲薄荷朱古力($38) : 朱古力味濃，薄荷朱古力夏天飲呢個最暢快！
屏山跑車餐廳 Motors Café
地址： 元朗屏山坑尾村105號地下
營業時間： 星期日至二、五至六(星期三、四休息)
電話： 2662 2162
文字來源：香港人.遊香港／圖片來源：香港人遊香港