香港人四季都可以打邊爐，所以其實食煲仔飯都冇分季節！呢間餐廳嘅裝修都幾high class，完全唔似係食煲仔飯！佢哋嘅臘味煲仔飯都唔會加防腐劑同化學物，更選用河源自家農場嘅走地新鮮土豬同重慶黑毛豬，食得安心又放心！川味臘味煲仔飯係呢度嘅招牌，即叫即煲，新鮮熱辣！幾種臘味所傳出嘅香味，齋聞已經流口水！飯粒吸收咗臘鴨、川味臘腸同臘肉嘅油分之後，同蔥粒、頭抽攪拌，再配上臘味一齊食，完全係perfect match！
▲ 川味臘味煲仔飯 (中$148/大$398) ： 臘腸臘肉切得好薄片，可能會覺得冇乜口感，但其實撈埋豉油同飯一齊食，呢個配搭係非常夾！
▲第一次去食都唔使驚唔識食，會有職員幫你個飯「上色」，不過如果唔想食咁鹹嘅就記得叫佢輕手啲啦！
▲ 飯焦唔會太燶，食落唔會痴牙，係屬於香脆口感嘅飯焦！
▲川椒麻辣雞煲 ($98)： 雖然呢度係食煲仔飯，但都唔可以唔試其他小菜！如果鍾意無辣不歡，兩個人Share一個飯再加個小菜就Perfect啦！
▲ 南乳豬手煲 ($118) ：豬手同南乳汁經過長時間炆煮，非常入味同煮得夠腍，唔使怕啲牙唔好食唔到！
憶食尚臘味煲仔飯
地址：佐敦文匯街22-24號地下2-4號舖
電話：35909933
營業時間 ：11:30 – 21:30 (星期一休息)
文字來源：香港人遊香港 / 圖片來源： @glassesgor_diary 、@coji_foodie 、@fatfat4ever