中高階行山線：【直搗黃龍之黃龍石澗！】－黃龍坑道

[駐場博客小牛牛快樂行山郊遊相集by Chan Keung]落咗咁多日雨，太陽伯伯卒之都肯出來了! 假期遇上好天氣，真係行山一大快事呢! 今次又同大家走走黄龍石澗探險，返回原始野外之初體驗喔! 欣賞靚靚倒影，純天然天空之鏡。
由東涌站起步，大約行15分鐘之後就到達赤鱲角新村，呢度村内有人家放養數隻唐狗，不過都好純良，走近身邊時，都唔洗怕喎! 經過垃圾收集站再進入黄龍坑道，呢段石屎馬路比較漫長，行大約10分鐘之後會經過黃龍坑郊遊場地，再行多5分鐘就到達黄龍坑入口，首先會見倒一個水閘阻路，可以從右邊山徑繞過，當踏入石澗後，回頭一望，靚靚倒影就進入眼簾，不過當然要配合當時光線折射角度啦! 黄龍石澗初段平緩，大部份都係大石堆疊而成，唔想濕腳，可以左右穿插兩旁叢林，偶然會遇見小潭小瀑，由於水質清澈，肉眼都可以望通潭底，大都呈現碧綠色，雖然水質清澈，但係都唔好嬉水戓用水洗面，因為水中有大量細菌，對身體健康構成威脅。一直走了两小時左右，卒之都達了黄龍瀑，由於未到雨季，所以黄龍瀑還是水流潺潺，瀑下有一個巨型水潭，没有瀑水傾瀉下來，反而可以好清楚睇倒潭底全貎，相當美麗，拍過夠後本來打算一直走下去，挑戰一吓~黄龍三險，可惜今天晏咗出發，時間不足避免摸黑落山，所以都係留待下次才挑戰，沿路折返完成今次旅程。

注意事項:
1. 行石澗比較一般山徑危險，必需量力而行，建議由經驗人仕帶領和同行
2. 切勿落山澗，水潭嬉水，水深莫測，濕滑容易跣倒
3. 部份路段較崎嶇，需手腳並用攀爬
4. 愛護郊野清潔人人有責，自己垃圾自己帶走