想尋找舊香港情懷，可以由舊物開始！位於港鐵土瓜灣站附近嘅二手舊物店，店舖佔地三千幾呎，由五十年代到千禧年嘅珍藏都有，如菲林相機、收音機、手工藝品、玩具、傢俬等等，係一個實實在在嘅香港回憶寶庫！即使跨越時代，但每件物品依然耐看，部份更可繼續使用。有興趣嘅朋友不妨去尋下寶，發掘一下物品背後嘅故事之餘，仲可以從新的角度去發現舊物，為舊物帶來新嘅第二生命！
▲土瓜灣站附近嘅「夕拾 – 舊物店」，由五十年代到千禧年嘅珍品都有，每件舊物依然耐看。有興趣嘅朋友不妨去尋寶，發掘一下每件物品背後嘅故事！
夕拾 – 舊物店
地址：土瓜灣九龍城道88-90號安樂工廠大廈A座9樓
交通：港鐵土瓜灣站A出口，步行約5分鐘
營業時間：早上11時至晚上7時（星期二休息）
行完街就去睇戲啦！經營超過五十年嘅寶石戲院，係全港少數依然用人手劃位嘅戲院。雖然戲院翻新過，但整體裝潢仍保留傳統舊影院風格，由踏入樓梯開始就好似時光倒流回到七十年代！除咗睇戲之外，你仲可以喺售票處附近親眼睇到昔日手動菲林放映機、座椅同經典港產片海報等物品，簡直係一間小型電影博物館咁，地面入口仲保留咗一部懷舊磅重機俾大家體驗𠻹！而且戲院位於鬧市中，距離港鐵紅磡站或黃埔站都只需5-7分鐘步程，真係非常方便！
▲「寶石戲院」擁有超過五十年歷史，依然用人手劃位，好似時光倒流回到七十年代咁！戲院位於紅磡鬧市中，距離港鐵紅磡站或黃埔站只需約5-7分鐘步程，唔少街坊都經常幫襯㗎！
寶石戲院
地址：九龍紅磡寶其利街2J號
交通：港鐵紅磡站B1出口／黃埔站B出口，步行約5-7分鐘
開放時間：下午1時至晚上10時
除咗舊物小店同懷舊戲院外，香港有好多城中村落都好值得大家珍惜同探索。其中位於九龍東嘅茶果嶺村，街坊鄰里好多都認識彼此，充滿濃濃嘅人情味。縱橫於橫街小巷同民生店舖之間，可以發現唔少舊式通花鐵閘，打卡一流！而茶果嶺村有一間擁有60年歷史嘅懷舊冰室，店內嘅陳設彷如令時空停留，去到必試懷舊風味西多士！想親身去欣賞舊時代嘅足跡，可以由港鐵油塘站或藍田站步行約15分鐘去茶果嶺村，大家遊覽一下香港碩果僅存嘅城中村！
▲位於茶果嶺村嘅「榮華冰室」有近60年歷史，店內嘅陳設彷如令時空停留，當中必試懷舊風味西多士！
榮華冰室
地址：油塘茶果嶺大街106號A
交通：港鐵油塘站B2出口／藍田站D1出口，步行約15分鐘
營業時間：上午7時至下午5時
文字：香港人遊香港