香港人生活忙碌，唔單止小朋友要放電，大人都要放電抖抖氣！唔少上班族放假一係煲劇，一係就瞓覺。與其攤喺屋企，其實港鐵沿綫就已經有唔少新奇有趣嘅放電熱點，東鐵綫過海段開通後由港島區玩到去新界北都方便咗，今個週末一於走出家門，過一個充滿動感嘅假日啦！
今次放電好去處特輯嘅第一站先由鰂魚涌站出發，步行5分鐘嚟到充滿80年代復古風格嘅室內滾軸溜冰訓練中心。唔好睇小編好似玩得好輕鬆咁，其實運動量都幾大㗎，對於初學者嚟講仲好刺激𠻹！
▲想做運動又怕悶？近期大熱室內滾軸溜冰就啱曬你啦！踩Roller有一定嘅運動量之餘，對於初學者嚟講仲好刺激。
呢間全港最大滾軸溜冰訓練中心，距離港鐵鰂魚涌站只需約5分鐘步程，場內裝修還原80年代時期嘅經典Roller場，牆邊亦有好多霓虹燈打卡位，好適合同閨密一齊影靚相放上IG！
Bun’s 2020 滾軸溜冰訓練中心
地點：香港北角渣華道321號柯達大廈1期7樓
交通：港鐵鰂魚涌站C出口，步行約5分鐘
營業時間：
星期一至五 下午1時至5時30分 及 晚上7時至9時
星期六、日及公眾假期：上午10時至下午5時30分
*需網上預約：按此
至於戶外活動，小編推介大家由會展站步行約8分鐘去灣仔海濱長廊踩腳踏鴨仔船，平時只係出現喺較偏遠地區嘅鴨仔船，而家喺市區都可以踩到！俾大家由灣仔「踩出海」，近距離欣賞維港海景。而灣仔海濱長廊一帶仲有本地插畫家「Chocolate Rain」嘅主題畫同臨海公眾休憩空間，啱晒一家大細！
▲腳踏鴨仔船，又叫做水上單車，通常只出現喺較偏遠嘅地區，但隨著近年灣仔北海濱區發展，大家就可以由灣仔「踩出海」，近距離欣賞維港海景！
有興趣嘅朋友可從港鐵會展站出發，邊吹海風邊沿住灣仔海濱長廊慢慢行去維港海上樂園。
維港海上樂園 – 水上單車區
地點：灣仔水上運動及康樂主題區
交通：港鐵會展站A/B出口，步行約8分鐘
營業時間：上午10時至下午6時
*需網上預約：按此
踩完水上單車又點少得真正嘅單車之旅？除咗平時去開嘅沙田、大埔同將軍澳，其實新界北都有新開嘅單車路線值得大家去邊踩邊睇靚景㗎！繼屯馬單車徑陸續開放後，就有更多單車路線俾大家選擇，好似上水至元朗嘅單車徑，途中會經過唔少綠化環境，呼吸一下新鮮空氣。上水及元朗均設有單車匯合中心俾大家租單車，由港鐵上水站或元朗站分別行約5分鐘就可以到達，規劃單車路線時，建議大家於錦田河邊稍作休息，放空一下，下午時份更可以途徑南生圍，觀賞美麗嘅夕陽。
大家一於放假約埋朋友一齊挑戰以上3大放電好去處啦，不過記住要量力而為呀！
▲上水及元朗均有單車匯合中心就近港鐵上水站或元朗站，方便往返。
上水單車匯合中心
地點：新界上水新運路
交通：港鐵上水站A3/D1出口，步行約5分鐘
元朗單車匯合中心
地點：元朗朗和路
交通：港鐵元朗站J出口，步行約5分鐘
#相片為髦民士多Bike The Moment Store的復古風單車。
文字：香港人遊香港