[駐場博客小牛牛快樂行山郊遊相集by Chan Keung] 今次小編好早起身，因為要預多啲時間，打算太陽落山前到終點，加上起步點予西灣亭，必須要留意專線巴士班次。到達西灣亭整理裝備立即起步，先走一段馬路，可以沿途欣賞萬宜水庫美景，到達吹筒坳，接上麥徑2段，一路落到第一站西灣，呢度風景開掦，又有靚靚沙灘，無敵海景，手機拍過不停呢! 繼續沿麥徑2起步，經過四叠潭，走過一段山徑， 到達鹹田灣，嘩! 另一個靚靚海灣，見到有幾位人仕𣈱泳，小編真係好想跳入海水中涼快一吓呢! 下次一定要帶埋泳褲先，影完相又繼續上路，又到達另一個靚靚沙灘~大灣，真係一個靚過一個，大灣更比頭幾個沙灘更長更濶，更自然呢! 打卡後上路，又到達最後一個沙灘~東灣，呢個沙灘仲有一個内灣，由於有條山澗流入東灣背後，所以形成咗一個小湖泊， 配合光線折射，好似一面巨形鏡子，小編稱佢為~天空之鏡。另外東灣近沙灘兩則，旁邊岩石被海水長期侵蝕，形成色彩繽紛嘅圖案，相當搶眼， 可是時間唔容許小編再逗留了，要立即起步，正式進入長咀徑，行行重行行，山徑唔難行，上落坡幅唔大，沿岸風景開掦非常美麗，邊行邊拍，繞過東灣山山腳，好快就開始進入長咀範圍，可惜經過長途跋涉，小編雙腿開始有啲力不從心，加上太陽準備落山，唯有立即折返。今次打算經赤徑返北潭凹走。由於腳板劇痛，需要慢速前進，捱到6點幾，天色陰暗，摸黑返回北潭凹時見到有好多螢火蟲飛舞，綠色微光一條一條在空中閃爍，真係好靚，小編把手機關掉，更覺耀眼，所有疲勞，痛楚都一掃而空，估唔倒臨尾仲有個bonus！ ▲由西灣亭起步經過萬宜水庫 ▲東灣有ㄧ個小湖泊光線折射下出現優美倒影有如天空之鏡- ▲鹹田灣風景秀麗 ▲部分山徑比較貧瘠,前往時必須小心跣腳 ▲香港最東端地點大浪咀 ▲大灣是ㄧ個長長的美麗沙灘 ▲東灣旁邊是岩石群經過海水長期侵蝕, 呈現色彩幻化的岩石紋 ▲又越過高山又越過谷...
