好多人會選擇去韓國過一個白色聖誕，除左首爾，釜山其實都係個好選擇！釜山聖誕樹文化節由11月底到1月初，係釜山市南浦洞區既主街光復路行人路段，足足1.2KM既行人路滿佈聖誕裝飾!！最搶眼既一定係18尺高既大型聖誕樹，掛上唔同裝飾既聖誕樹星光閃閃，由樹頂放射式伸延既燈光更有氣勢同氣氛！沿路仲懸掛左好多燈飾，抬頭就可以見到無限伸延既彩球、雨傘造型既燈、聖誕字句等等，打卡超靚！沿路兩旁仲有好多小型立體燈飾，好似北極熊、雪人、麋鹿等等，加上韓國稍冷既天氣，走在咁靚既街頭真係好有聖誕氣氛！走到另一邊既樂天百貨門口，仲有多顆聖誕樹，岩晒大家打卡，點影都咁靚！
▲每年既釜山聖誕樹文化節，主題都稍有不同，今年既聖誕樹係樹頂加添左放射式延伸既燈飾，非常特別！
▲叫得做聖誕樹文化節，一顆聖誕樹又點夠？係樂天百貨門口，仲有多顆燈飾不同既聖誕樹，有排影啦！
▲係主要步行街上，懸掛左好多唔同造型既燈飾，非常豐富又可愛
▲步行街長1.2KM，除左沿線好多小型聖誕樹外，抬頭都有唔同既燈飾，令釜山冬日街頭更添節日氣氛！
▲一眼望埋去睇唔到盡頭，沿路都有燈飾，仔細D睇仲可以見到好多唔同圖案
▲走到另一邊街頭，頭頂既燈由黃色變成藍色，更添浪漫夢幻既感覺
▲沿路兩旁都有聖誕相關既佈置，好似麋鹿、雪人等等
釜山聖誕樹文化節 （부산크리스마스트리문화축제）
日期：2019.11.15 – 2020.01.05
地點：釜山廣域市中區光復路58-2 (부산광역시 중구 광복로 58-2 )
交通：釜山1號線南浦洞站 (1號出口)
文字來源：香港人遊香港／圖片來源：IG、NAVER