【郊遊路線：短走陰澳灣+鹿頸灣連沙洲+長索】

[駐場博客小牛牛快樂行山郊遊相集by Chan Keung]新春趁住有幾天假期，除咗拜年之外，最好嘅活動梗係行山郊遊啦! 可惜呢幾天氣潮濕又大霧，登高攻頂冇著數，上到山頂白濛濛一片冇野睇不特止，仲好易迷路添。所以今次同大家短走一轉陰澳灣、鹿頸灣、長索。

春節假期，本來打算登高減減壓，可惜潮濕大霧，爬到上山頂又無野睇，路况又濕滑，都係精選短線比較好啲。

首先坐地鉄到欣澳站，出閘向前走幾十米，就見倒石堤壩，呢度就係起步點，沿堤壩左面行，一直走十分十幾分鐘後，就到達盡頭，右轉入山徑，都係水泥路，一直走，好快就見到一個小石灘，靠近岸邊有多嚿浮木，有鐵鏈綁起半浮沉在水面上，呢度係龍友拍攝熱點。打完卡後就正式進入鹿頸村，呢度有村民養咗5~6隻唐狗，守住家園，不過唔洗擔心，佢哋好温純，直行渡過就可以了，再一直走就到達鹿頸小碼頭，經過小碼頭會走到一個連沙洲，呢度有啲似馬屎洲，鴨脷排，不過呢度比較細，如果一直沿石灘邊繞過去，就到達長索，如果走到尾段就到達長索咀，呢度仲有一座小燈塔，但係路況十分崎嶇小編唔建議大家冒險就過去探索呢個小燈塔呢! 其實喺連沙洲旁邊，仲有一條小路，可以綑邊到達鹿頸灣，如果唔想綑邊可以沿路折返，走到小型燒烤場，一樣可以到達鹿頸灣，呢度係一個小沙灘，裏面部分佈滿垃圾，同埋有一啲畀人遺棄嘅獨木舟，一啲水上設施。響呢度打完卡之後，就原路返回欣澳站，完成今次旅程，全程約6公里，需時約3.5小時

注意事項:
⚠ 踏上浮木必須小心
⚠ 部分路段需要繞過海邊走，貝殼鋒利須小心被刮傷
⚠ 鹿頸村内飼養了五/六隻唐狗，性格溫純，不用擔心
⚠ 愛護郊野清潔人人有責，自己垃圾自己帶走