香港有唔少歷史悠久嘅古蹟同建築，當中不乏歐式建築風格令人彷如置身於歐陸嘅夢幻國度！沿住港鐵港島綫同東鐵綫發掘，原來都唔難搵到呢啲充滿浪漫氣息嘅建築。例如由中環站步行約10分鐘，就可以去到香港最古老嘅西式教會建築—聖約翰座堂，整個哥德式建築牆身以淡黃色為主，配上尖頂拱門，係度影相打卡點影都靚。
▲由港鐵中環站J2出口步行約10分鐘就到達聖約翰座堂。教堂於19世紀建成，係香港最古老嘅西式教會建築，並已列為香港法定古蹟。聖約翰座堂嘅維多利亞時期哥德式建築，牆身以淡黃色為主，配上尖頂拱門，少女打卡摯愛！
聖約翰座堂
地址：香港中環花園道4-8號
交通：港鐵中環站 J2 出口，步行約10分鐘
開放時間
主日、星期一、二、四、五：上午7時至下午6時
星期三：上午7時至下午6時半
星期六：上午7時至下午7時半
公眾假期：上午9時至下午4時
聯絡電話：(852) 2523 4157
網址：https://www.stjohnscathedral.org.hk/
*如有特別的維修保養項目進行，座堂將於下午五時關閉。
*聖約翰座堂及座堂範圍乃神聖的地方，並於任何時間皆為和平的場所，在座堂的開放時間內，所有人士均可入內。
想去童話般嘅建築，同時又想睇藝術展覽？經金鐘站前往香港公園附近嘅香港視覺藝術中心都好值得一遊！香港視覺藝術中心前身係駐港英軍軍營已婚軍人宿舍—卡素樓，建於19世紀，屬香港其中一座歷史建築改建而成嘅藝術展覽空間。建築保留愛德華時代精緻嘅建築設計，同時融合玻璃天幕等現代建築元素，引入自然採光，再配上米白色外牆，無論喺室內定室外打卡都一流！中心仲有不同藝術課程、活動同期間限定展覽，絕對係假日好去處！
▲香港視覺藝術中心保留愛德華時代建築設計，同時融合玻璃天幕、支架等現代建築元素，再配上米白色外牆，整體設計好獨特。距離金鐘站只需約10分鐘步程，隨時去打卡都好方便！
香港視覺藝術中心
地址：香港中區堅尼地道 7A
交通：港鐵金鐘站C1出口，步行約10分鐘
開放時間
星期一、三至日：上午 10 時至晚上 9 時
中秋節、冬至、聖誕前夕、新年除夕及農曆新年除夕：上午 10 時至下午 5 時
*星期二、聖誕節及翌日、元旦日、農曆年初一至三休館
查詢電話: (852) 2521 3008
網址：https://www.lcsd.gov.hk/CE/Museum/APO/zh_TW/web/apo/va.html
唔止中區有歐陸建築㗎！位於大埔元洲仔嘅自然環境保護研究中心，前身係新界政務司官邸，以經典紅磚作為主要建材，充滿濃濃英式大宅風貌。經改建後中心已開放接受預約參觀，當中有幾個人氣打卡位，包括二樓擁有270度吐露港海景嘅歐陸式迴廊連露台同地下嘅英式庭園都唔可以錯過，立即睇睇前往方法啦！
▲元洲仔自然環境保護研究中心位於吐露港旁，環境令人感覺份外寧靜療癒。由東鐵綫大埔墟站步行或轉搭港鐵接駁巴士K18前往十分方便。中心擁有過百年歷史，現由WWF世界自然基金會香港分會管理，建築設計典雅，上層二樓嘅歐陸式迴廊連露台擁有270度吐露港海景，仲有英式庭園，打卡必去！記得參觀前要先預約呀！
元洲仔自然環境保護研究中心
地址：新界大埔元洲仔里元洲仔自然環境保護研究中心
交通：港鐵大埔墟站B出口，步行約20分鐘；或於大埔墟站轉乘港鐵接駁巴士K18於廣福邨總站下車步行約5-8分鐘前往。
開放時間：星期四至日 上午10時至下午6時
網上預約：https://www.wwf.org.hk/cities/island-house/
文字：香港人遊香港