放假留喺香港去邊度玩好？Staycation、露營、行山，全部都試過晒？其實只要換個遊玩方式，發現香港仲有好多好去處，好似小編咁就挑戰去6個唔同嘅check points打卡，包括西營盤藝里坊壁畫、上環旗袍街拍、西九龍M+博物館等等。除咗可以喺呢啲拍攝點影相呃like之外，仲可以大玩最近流行嘅Reels拍片功能，再同朋友分享香港城市中一啲好似萬花筒咁色彩繽紛嘅景點。以為走勻6個check points好難？其實好多打卡位都喺港鐵站附近，一次過去晒咁多個地方好容易㗎！即睇打卡一日遊路線詳情！
▲【Check point 1 – 西營盤站立體浮雕壁畫】大家都知好多港鐵站都有擺放藝術品。去下一個Check Point藝里坊前，大家搭港鐵喺西營盤站出閘後，於車站大堂近B1及B2出入口升降機附近會見到幾幅大型浮雕壁畫，名為「裡裡．外外」。作品立體咁呈現出西環嘅日常面貌，有行人等過馬路、又有高街眾生相、電車經過海味街等等。浮雕壁畫色彩豐富搶眼，又十分立體有層次，影靚相一流！
西營盤站立體浮雕壁畫
地點：港鐵西營盤站－車站大堂近B1及B2出入口升降機
▲【Check point 2 – 西營盤藝里坊壁畫】隨住市區重建，西營盤多棟大廈嘅外牆同公共空間都嚟個大翻新，藝里坊一帶更成為壁畫集中地，唔少舊建築牆壁同樓梯上都佈滿本地及國際藝術家嘅壁畫作品，當中包括不同現代風格而且色彩豐富，因此增添唔少地區活力，令藝里坊搖身一變成為潮人文青嘅打卡好去處。
攝影小貼士：於橫街窄巷利用旋轉鏡頭拍攝影片，視覺效果更突出！
西營盤藝里坊壁畫
交通：港鐵西營盤站B3出口，步行約2分鐘
▲【Check point 3 – 旗袍體驗照相館】西營盤區充滿藝術氣息，咁中上環區就一定係充滿懷舊感嘅地方！由摩羅上街至嘉咸街一帶除咗有古董、古物等市集之外，仲有好幾間旗袍店供客人訂製或租用。部份旗袍店更設有不同復古嘅場景同佈置，變成體驗照相館，隨時影出「花樣年華」嘅懷舊香港電影感！
攝影小貼士：善用照相館場景，拍攝充滿懷舊感嘅相片。
20s貳拾年華 – 香港旗袍體驗照相館
地點：香港中環皇后大道中176A-F 錦安大廈4樓402室
交通：港鐵上環站E2出口，步行約5分鐘
營業時間：10a.m. – 7p.m.
▲【Check point 4 – 中上環壁畫】租完旗袍除咗可以喺店內復古場景影相之外，仲可以去附近中上環嘅舊街玩街拍，區內有好多傳統嘅旗袍配合中上環新潮嘅Graffiti壁畫作背景，影相打卡好靚好特別呀！而圖中嘅人氣打卡位位於嘉咸街，五顏六色嘅旗袍配壁畫顏色拍照，別有一番風味。
中上環壁畫
交通：港鐵上環站E2／中環站Ｄ出口，步行約10分鐘
▲【Check point 5 – 西九文化區】懷舊過後，一於去現代時尚嘅地方啦！好似九龍站附近嘅西九文化區，有海濱長廊、苗圃公園等寬敞嘅公共空間供市民使用，唔單止可以睇日落影靚相，仲可能坐喺草地到放空下。
西九文化區
交通：港鐵九龍站E4或E5出口，步行約10分鐘
▲【Check point 6 – M+博物館】西九文化區亦有多個文化藝術設施，例如充滿建築特色嘅M+博物館，時尚簡約嘅建築設計同水泥牆好適合拍攝出現代感嘅照片，門口牆身大大隻M+字眼更加係必影位！參觀完仲可以去公共天台花園飽覽維港景色𠻹！
攝影小貼士：利用zoom in/out技巧拍攝M+字樣，玩味十足。
M+博物館
交通：港鐵九龍站E4或E5出口，步行約10分鐘
文字：香港人遊香港