二月開始，大家大部分時間都係留喺屋企抗疫，最近疫情反覆，確診人數不斷上升，加上政府推出晚上6點後唔准堂食嘅政策，相信大家夜晚都多咗好多時間喺屋企無所事事！趁有時間梗係涼下冷氣，攤喺梳化睇下Netflix，追返之前唔得閒睇嘅劇！今次小編將會推薦五套Netflix影片，當中包括韓劇、日本動畫同懸疑片等，排名不分先後！睇下你對邊套有興趣！留喺屋企，齊齊抗疫！
▲ 雖然是精神病但沒關係：呢套韓劇長期佔據香港熱門排行榜，被譽為2020下半年必睇嘅韓劇。由韓國男神金秀賢，擁有多樣演戲經驗嘅徐睿知主演，播出以嚟得到非常高嘅評價！
▲ 金秀賢飾演嘅文鋼太喺醫院擔任男看護，生活喺社會低層嘅佢，對人生冇希望，一心只係想照顧大佢七歲但患有自閉症嘅哥哥。直到遇到由徐睿知飾演，擁有反社會人格嘅童書作家高文英，佢嘅生活開始有所變化！
▲ 兩位主角演技高超，擦出嘅火花成為呢套劇嘅一大看點！
▲ 呢套劇逢星期六日夜晚9 點半更新集數，同韓國同步！
▲ 懸疑未決：作為美國長壽神秘事件紀錄片系列， 懸疑未決一向都大受歡迎，一共12集紀錄唔同嘅離奇失蹤事件、恐怖兇殺案，同埋超自然經歷，由《未解之謎》創作者同《怪奇物語》製作團隊聯手製作！
▲ 成套紀錄片真係會愈睇愈心寒！大膽嘅你不妨測試下膽量！
▲ 想哭的我戴上了貓的面具：以愛知縣常滑市做背景， 講述同班同學嘅中學生日之出賢人同笹木美代嘅故事。一切由女方主動同日之出示愛，但係得唔到回應開始。
▲ 某日美代參加祭典活動之後，意外獲得一個貓面具，只要戴上佢便可變身小白貓，從此同賢人拉近距離。
▲ 畫風好靚好細緻，仔細咁描繪咗人間世界同貓咪世界嘅生活！ 美代身處青春期嘅孤寂，或者都可以令你產生共鳴！
▲ 日本沉沒 2020：近期大熱，一共有十集嘅日本動畫！講述大地震重創日本之後，一個平凡家庭面對生死、離別，為咗生存而奮鬥嘅故事。
▲ 呢個平凡嘅家庭—住喺東京嘅武藤家姐弟步同剛，面對突然嘅大地震，佢哋點樣逃脫？而日本列島即將沉沒， 佢哋又可以走去邊？
▲ 日本沉沒2020喺災難背景下嘅故事氣氛相當沉重，但係當中亦有溫暖同感動嘅時刻，值得大家一再細味！
▲ 誰是被害者：自家製懸疑推理台劇，改編自台灣小說《第四名被害者》，由張孝全、許瑋甯主演，講述鑑證人員同記者攜手調查一宗詭秘嘅連環殺人案！
▲ 張孝全同許瑋甯嘅演技大受好評！劇情牽涉霸凌、疾病、自殺等敏感議題，令觀眾心情沈重，完全進入劇情！
文字來源：香港人遊香港 / 圖片來源：tvn、Netflix