海洋公園全新動物展館「小狐獴與大象龜之旅」喺7月1號已經開放畀遊客參觀喇！新展館當然唔少得有新動物加入，有源自非洲嘅動物朋友狐獴同亞達伯拉象龜正式進駐海洋公園！海洋公園依家有兩個唔同嘅狐獴家族，唔知大家又分唔分得出呢？考吓大家先～知唔知點解狐獴會有黑眼圈嘅呢？唔通佢哋唔夠瞓？其實佢哋嘅黑眼圈就好似天然嘅太陽眼鏡咁，令佢哋唔怕陽光刺眼，保護眼睛，咁樣佢地就可以時刻留意住周圍嘅情況啦！
▲狐獴最鍾意群體活動，所以會經常見到佢哋一齊出沒！
▲唔好以為佢有黑眼圈係唔夠瞓，其實係保護緊對眼！
另外仲有2隻亞達伯拉象龜，佢哋一日要瞓18個鐘，要睇佢哋精精神神就要睇運氣啦～大家又知唔知大象龜條頸咁長，可以幫助佢哋做咩呢？其實佢哋伸長條頸兼撐起全身，離地面一米嘅植物佢哋都可以食到架！為咗食，條頸可以伸到好盡！
▲一日要瞓18個鐘，都幾識嘆～
展館採用環保設計，日頭主要用自然日光，減少使用電燈之餘讓訪客有親近大自然的感覺。另外，展館內亦設有唔少打卡位同互動設施，大人細路除咗可以同小狐獴家族合照、一齊爬入大象龜殼以最佳角度拍攝全家褔，仲可以大玩「非洲短跑邀請賽」互動遊戲同睇「小紅熊非洲之旅」電子書等，啟發大小朋友更加關心大自然同時學動物知識。
▲互動電子書：展館加入五本互動電子書，係小紅熊喺非洲之旅期間撰寫，日記以生動有趣嘅方式讓小朋友認識更多狐獴和象龜的有趣知識。
▲非洲短跑邀請賽：大家可以和非洲不同的動物來個短跑比賽，透過感應式裝置，記錄大家嘅跑速，唔知您又快唔快得過身手敏捷嘅狐獴呢？
▲亞達伯拉象龜殼模型：有無諗過點解龜成日要伸長條頸，小編覺得好可能係要睇清楚岀面世界係點！大家可以走入象龜嘅龜殼裡，以象龜嘅視點看世界。
▲唔講唔知！原來狐獴家族成員都會輪流當值做哨兵，一旦發現威脅就會以不同嘅叫聲通知同伴。狐獴非常醒目，做得哨兵當然要企高啲望遠啲啦！今次展館更將狐獴成日站崗嘅白蟻丘打造成模型，讓大家了解白蟻丘結構和狐獴不同嘅叫聲。
有新動物朋友，當然唔少得有佢哋嘅精品啦！訪客仲可到訪OPX體驗店，以非洲服飾造型嘅「威威與好友」圖案製作自訂禮品，更可製作獨一無二個人化故事書，記錄非洲歷險體驗。參加者只需要依照指示拍攝五至七張相片，約30分鐘後，相片就會與「威威與好友」一同活現係故事書上，經歷有趣情節齊齊做主角！
▲「威威與好友」都換上非洲服飾造型。
▲點少得新朋友嘅精品呢！
▲仲有新出嘅主題餐飲都唔可以錯過啊！
依家仲有超抵港人尊享優惠，即日起至7月31日，購買海洋公園成人門票只需要$350，仲即送$350 園內現金券，可以喺園內指定小食亭、餐廳及精品店使用，小朋友同長者更可免費入場架！記住啊！7 月 25 日至 8 月 31 日嘅入場名額會喺7 月 10 日開始網上預約，記得唔好錯過啦！
網上預約：https://bit.ly/326ixTb
文字來源 ：香港人遊香港 / 圖片來源：香港海洋公園