東涌站乘搭11號大嶼山巴士到達石壁水塘落車,整理好裝備之後,首先進入鳳凰徑8段,頭3公里都係石屎平坦路相當易行。 第一站到達狗嶺涌觀景台,從高處可以望倒白角海灣和嶼南界碑,影完相之後,沿山徑落山,到達狗嶺涌營地, 呢度有小河和溪澗環境相當之靚, 沙灘更是水清沙幼可惜經過暴風洗劫之後,好多大樹都倒冧和枯萎。 繼續沿山徑直走,好快就到達分流東灣呢度成個沙灘都係垃圾, 滿目蒼痍,希望有關部門可以早日清理。穿過好多垃圾嘅山徑到達分流石荀,呢嚿巨石大約有20尺高,外型真係好似一嚿放大咗嘅竹筍。 再繼續前進,到達一座巨型古蹟~分流炮台,保存得相當原整,大約有一個足球埸咁大,四邊由石磚堆砌而成,又好似一座四方城,入口處旁邊有石級上樓層,呢座古建築物係小編探索過衆多古蹟之中面積最大嘅。繼續沿分流郊遊徑走,到達分流廟灣, 顧名思義呢度坐立一所天后古廟, 所以名為分流廟灣。 下一站到達分流西灣, 鳳凰徑7段,呢度又係一個長長嘅沙灘 ,又係佈滿垃圾,如果行到呢度用盡食水或乾糧,可以響呢度補給,因為呢度有兩檔士多,可以幫襯一吓。 行到呢度雙腳開始發軟蹄, 但係時候唔早,唯有堅持落去,好快就到達煎魚灣, 呢度對面有一個小島,名為雞翼角。 繼續沿山徑直走,到達了二澳村,係大嶼山最西面,所以看日落就最靚, 最後到達了大澳海濱長廊,完成今次”軟足”旅程呢! ▲東涌站坐大嶼山11號巴士到達石壁水塘落車頭段3公里平坦石屎路好易行 ▲遠望白角灣 ▲狗嶺涌觀景台...
[駐場博客 @小牛牛快樂行山郊遊相集by Chan Keung]收到網友查詢,暑假開始了,好想帶埋小朋友親親大自然,唔想放假淨係留響屋企打機或玩手機。所以今次介紹一條簡單又安全嘅路線- 大潭水塘,適合一家大細享受一吓郊遊樂趣。 大潭水塘 點去? 由香港站坐66號巴士,去到黄泥涌水塘公園站落車(記得落車時拍多一次八達通)有分段收費回饋。之後行上斜路就見倒黄泥涌水塘,沿水塘旁邊一直走,轉個灣再上石級就進入大潭郊遊徑,先上一大段石板路,上到一半風景已經好開掦,可以望倒壽辰山,南朗山,深水灣一帶,再繼續沿山徑上,好快就到達紫羅山頂,呢度超大風,景觀超開掦,可以360度飽覽港島景色,在標高柱打過卡後,改為行衞奕信徑1段。 大潭水塘 依條路線有咩睇? 落山途中見到好多野菌,外型十分有趣,顏色艷麗。當日温度高達32度,每行一段路就要停低飲飲水,休息一陣繼續落山,大部份都係梯級路,行行行…好快就到達大潭中水塘,沿水塘邊路徑走,經過第一條石橋,在石澗中發現~狗爪石,整嚿石有十幾尺長,狗爪分明,真係好似一隻巨型狗爪一樣,打卡後繼續前走,去到大潭中水塘水壩,可以沿小引水道落去壩底,下面有一大片儲水池,水面有大水泡湧上,好似有水怪準備浮上水面一樣。驚完之後沿小路上返大路,到達大潭篤水塘石橋,呢度係打卡熱點, 隔離仲有一個燒烤埸,一家大細呢度燒嘢食真係超正。繼續沿大潭水塘道緩緩直上,到達另一水塘~大潭副水塘,水壩左邊就係雙潭石澗,右面係副水塘,呢個水塘光位正洽到好處,每次經過呢度都可以拍倒靚靚倒影,水塘有多條魚𣈱泳,當中有好多錦鯉,為水塘添上一㸃㸃色彩。 繼續上路行到大潭上水塘石砌輸水道(Tai Tam Upper Reservoir Masonry Aqueduct1883 – 1888),其實係一條有百多年歴史嘅石橋,行山之餘可以探硏一吓歷史故事。行完石橋後,嘩!...
[駐場博客 @小牛牛快樂行山郊遊相集by Chan Keung]在網上傳聞,位於靈會山一帶,有一座寺院隱藏在山林中,而呢座寺院附近仲一條飛龍,神出鬼沒,充滿神秘感,聽聞好人都上山尋訪,但好多人都徒勞無功 ,所以今次决定查過究竟呢! 點搭車去靈會山? 東涌巴士總站坐11號或23號巴士,到咗石𤩹水塘站落車,進入宏貝道,再轉入鳯凰徑8段,沿一條藍色引水道一直走, 好快就見倒一條金屬通道,横過之後再沿山邊走,到達大浪坑入口處,有絲帶記號,入澗後,發現入口比一般石澗較為窄一啲,周邊植物長得十分茂盛,今天水源充沛,下源大小水潭水位已經十分高漲,如果唔想濕腳,可以穿梭兩旁山徑,不過呢度可能較少人行,所以樹藤雜草密佈,又有好多蜘蛛網,有時都要攀爬大石避開密集叢林,行咗一小段已經大汗疊細汗, 有不小石頭都佈滿苔蘚,必需小心慢行,讓小編可以慢慢欣賞沿途美景。雖然大浪坑澗度很短,但係琴上琴落,都消耗了不小體力喔! 離澗後接返羌山郊遊徑, 其實是靠靈會山腰横行,呢度可以俯瞰分流一帶,風景開掦優美。好快走到分岔路口~分水坳,呢度可以上𩆜會山頂,煎魚灣,分流,萬丈瀑,水澇漕多條路線, 今次選擇住萬丈瀑方向,進入鳯凰徑5段, 一直沿山徑走,行到L047標柱,靠右邊發現有一條隱徑,有絲帶引路,大約走多百多米之後,就能到達。 隱世飛龍活靈活現 今次行程主要想揾嘅飛龍, 呢條飛龍隱藏於深山之中, 想搵倒佢都要響網上面搜集資料做下功課, 當發現佢時真係好開心,仲可以近距離接觸, 雖然呢條飛龍已經建築咗一段時間,但係龍身上面嘅油漆依然十分光澤, 造型栩栩如生 ,據説呢條飛龍係慈興寺所建造的,所以一同隱藏於深山中, 拍完照後,小編貪快,揾咗另一條隱徑穿林離開,點知行咗一段好長嘅山路,發覺越離越唔對勁, 雜草樹藤頻生,棘手棘腳,路杯漸漸消失,山徑就越嚟越唔明顯,結果穿林變成爆林,爆咗一段漫長嘅樹藤,雜草,繩網陣嘅密林,超焗超熱好辛苦,最後費盡体力才能走番出郊遊徑,好彩無中暑咋,下次都係唔好貪快! 繼續再沿鳳凰徑5段 去到龍仔悟園,呢度以前小編都嚟過,記得當時呢條九曲橋冧咗, 日久失修所置掛! 但係今次呢度就完全唔同晒, 條橋已經起返好曬,四周圍都修復過晒! 湖水清澈,仲有靚靚倒影添!令人一見難忘喔! 影影吓發覺已經6點幾,速腳走人, 途中發現金蟬脫殼,行咗幾年山都係第一次見, 跟住好快落山去到大澳海濱長廊,剛剛日落magic time, 迷人美景,十分浪漫,真係大滿足,在大澳碼頭仲有2隻牛牛,同佢哋合照後完成旅程。 ▲石壁水塘起步,進入鳳凰徑8段,旁邊是一條藍色的引水道 ▲進入大浪坑入口開揚 ▲大浪坑下源水質清澈 ▲如果唔想濕腳,就要穿越叢林 ▲行走石澗必須步步為營小心滑倒 ▲大浪坑有多個大小水潭 ▲石澗兩旁長滿雜草樹藤 ▲充滿原始風味 ▲沿途只有小量絲帶作路標 ▲路旁小花 ▲行石澗有ㄧ定危險新人不宜 ▲小蜻蜓被蜘蛛網,痴住對翼,幫佢解開重獲自由. ▲離開澗道 ▲進入羌山郊遊徑 ▲到達分水坳接上鳳凰徑5段 ▲烈日當空切記做好防曬措施每人最少帶2至3公升水...
[駐場博客 @小牛牛快樂行山郊遊相集by Chan Keung]有日和朋友一齊行山,問佢想行邊鼠?佢話最近D佢屋企(大埔),易行,又有湖畔靚景! 小編揾咗一輪,决定去新界東北一帶嘅牛屎湖啦! 風景真係好靚,但係第二日佢話比我聽,上網睇過,原來牛屎湖村傳聞好猛鬼,聽到心寒而慄!今次同大家揭開牛屎湖神秘面紗!由大埔墟小巴站坐20R小巴,大約半小時到達烏蛟騰,首先入村經過九擔租, 依家鋪晒水泥路好易行,路邊又整晒好多長石屎枱凳,同多年前好唔同,行咗2公里左右,到達犁三古道,呢段有番D郊野感覺了,泥石路緩緩而上,風景開揚,好快就到達犁頭石, 途中見到一棵巨樹,前面有個牌介紹,原本名叫~五月茶(五味子) , 打卡後一直到達三椏灣, 呢度啲土質好得意,你會發現全部都係紅色,點解係紅色? 自己上網揾答案啦! 小編本來想綑邊(沿海邊步行)進入西流江,再到牛屎湖,但係冇睇到潮漲時間,D水位好高綑唔倒邊,所以唯有經牛屎湖山去牛屎湖,首先經過一個公廁有一條好隱蔽嘅小路, 行咗上去之後, 初段好斜好多蚊,同埋十分陰森, 不過行咗一段之後就開始開揚,條路都算好行,冇乜上落坡幅,行到途中又見到一大群好似蝴蝶嘅東西,原來叫做大班 豹紋尺蛾, 色彩鮮豔,通常都住在同一棵樹枝上,有幾十隻飛來飛去,好靚呢!再繼續行,又見到有一隻箭豬,小編都係第一次見到,不過呢一隻係一條屍體已經腐化咗, 再沿山徑走,見倒前面有一條古舊廢村, 有好多座房子,有古井,仲有D碗碗碟碟,仲有D家居用品,好似有人住,但係就佈滿晒苔蘚,奇奇怪怪,旁邊有好多樹藤,有D陰森。影完相之後急急腳,卒之落到牛屎湖,有内湖和外湖,內湖望落去綠油油,應該水底有好多綠色植物,小編見到有D大魚跳上水面,好得意。而走到外湖,十分平靜,平面如鏡,形成一度倒映,好靚喔!...