今次介紹既呢間小店好有少女心,裝修好特別同夢幻,門口窗邊有一排粉紅咖啡杯座位、有天鵝同花草既裝飾,好似去咗童話世界咁。另外最近呢間Cafe仲有另1個主題既裝修添,玻璃張貼晒代表香港人既pepe公仔,有一個位置比客人寫memo紙寫下想表達既說話。呢間cafe主要食意粉、窩夫、小食,仲會定期有一啲期間限定既餐牌。除左係呢度食到好食既西餐之外,仲係度食到良心同埋人情味,餐廳侍應服務都勁好,係呢度係絕對唔會食到一肚氣!希望咁各位香港人可以幫襯呢間咁好既餐廳,每晚都排長龍! ▲軟殼蟹黑松露忌廉意大利麵($98):軟殼蟹食落去好脆口,食落去仲啖啖肉! 而最重要既係意粉既黑松露醬味道好香濃。 ▲櫻花蝦明太子煙肉意大利麵($74):呢度既明太子意粉好出色,味道唔會太咸,而醬汁份量足夠,唔會意粉食食下會唔夠汁或太多汁。意粉上有櫻花蝦、木魚碎、煙肉作配料。 ▲拉絲芝士龍蝦汁海鮮燴飯($118):呢個係夏季期間MENU推出,食落去味道香濃,好多芝士,趁熱食果陣仲可以拉絲,不過龍蝦味略為比芝士味蓋左。而海鮮配料都好多,分別有蝦、蜆、青口。   ▲玫瑰花草莓窩夫(半份$54,全份$82): 窩夫全份分量好多,有好多配料係上面。呢度既窩夫係花瓣形狀,每塊都配有草莓。另外仲有玫瑰花瓣同糖霜小星星作裝飾,食落去仲會淡淡花香味。客人可以加$20要蠟燭同生日牌添,外觀絕對比得上1個生日蛋糕。 ▲餐廳門外裝修真係好靚,有代表香港人既pepe穿上唔同人士代表既服裝,手拖手築成人鏈為港人打氣! ▲門外有免費水派,希望真係有需要連水都買唔起既人或者好急要用水清洗先好扲,做個有質素香港人,忽貪小便宜。 ▲ 小店將香港爭取緊既民間五大訴求張貼於門口當眼處! ▲ 排隊既時候如果無野做,不妨扲memo紙出黎寫下字,然後將張memo紙貼係門外玻璃上,將香港人既訴求等路過既人見到。 咖啡灣 地址:荃灣眾安街68號荃灣千色匯II期地下G30-G33號舖營業時間: 星期一至日 12:00 – 23:00 電話:34811883 文字來源:香港人.遊香港/圖片來源:香港人.遊香港、@shungyeung、@tintin_814、@sandyfok_foodie、@foodie_ktbelle、@jessicahohy...
《全民造星2》又開播,又掀起一股追看熱潮,連帶之前《全民造星》click rate都提高左好多,造星造就左Mirror 同Erorr,咁其它參賽既仔仔呢?其中一個入左30強既阿神就同朋友夾份開左日式餐廳,取地熟食市場,但就提供高質優品既日式料理,最重要係,佢地多次係反修例運動中,多次撐罷工,同多次敢言發聲,獲得唔少網民支持! ▲咖哩吉列蝦蛋包飯:選用日本沖繩県蛋,炒至半熟融入芝士,嫩滑、邪惡非常,吉列大蝦只係沾上薄薄一層麵包糠,炸得非常香脆。咖哩微甜,做到色香味俱全! ▲廚師為左將每款菜式打造得更傳神,專程去日本當地請教。鰻魚芝心蛋包飯用上肥美既鰻魚,加上照燒汁,又甜又juicy。 ▲鰻魚飯:原條鰻魚分量夠大超厚肉,魚肉無骨啖啖肉,日式照燒鰻魚汁帶微甜,蓋唔過過甘香。 ▲鹽燒牛舌飯 ($58):鹽燒處理得得岩岩好,燒完仲有焦香味。牛舌肉質口感油脂十足,內裡係粉嫩色澤。 ▲阿神開店後就隨即邀請一眾以前既《全民造星》戰友黎食野! 峯日式料理 地址: 觀塘駿業街駿業熟食市場1樓46 營業時間:星期一至五 12:00–15:30、18:30–20:00;星期日休息 電話: 5428 8748 文字來源:香港人遊香港 / 圖片來源:@mine_kwuntong、@didihaha123、@farn_gung_sik_meh_ho...
呢間cafe在2005年開店, 旺角區登打士歷史最悠久樓上咖啡店之一,地點方便係唔少大同/中同re-u聚腳點,間格分左右兩邊,左邊係和式TATAMI,右邊係梳化位,黎呢度每人最低消費係一杯野飲,最近反修例運動佢地都有響應罷工罷市,算係良心小店。呢度有基本既玩 Board Games好似uno、大富翁,食落傾下計又可以玩下Game! ▲雞翼拼盤拼芥辣蜜糖醬($185):有8隻炸雞翼、8隻炸雞、波浪薯條,岩哂多人聚會必點! ▲煙三文魚忌廉雜菌天使麵($125)忌廉汁軟滑creamy,軟滑好鬼邪惡,層次豐富、份量充足 ▲呢度2個人以上就有party餐($318)選擇,2個人就可以order 1份前菜、1份主食同1份小食,當然會包埋餐包、餐湯同兩杯紅綠茶既飲品。BBQ汁燒豬肋骨配薯菜($148),原條豬肋骨焗得好軟腍,加埋既BBQ醬非常香口。 ▲椒鹽雞軟骨($58)雞軟骨炸岩岩好,口感香脆爽口 ▲凱撒沙律($98)選用新鮮沙律菜,食左咁多肉中和下,感覺成餐飯冇咁邪惡! ▲可以係旺角10年之久,證明cafe有返咁上下實力,相信好多人讀書果時都有機會去過,呢度有board game、Notebook 及免費 wifi 等消閒娛樂。 Rimi Cafe 地址:旺角登打士街43H號登打士廣場20樓 電話:27712781 文字來源:香港人遊香港 / 圖片來源:agcufe.au、@mr.kevin_chan、@foodssss...
好多香港人都鍾意食台灣嘢,呢間喺荔枝角嘅台灣餐廳就係由一個移民香港嘅台灣人所開嘅,每一道菜都非常之地道,令你就算唔使去台灣都可以食到地道嘅台灣美食!當中最出名嘅莫過於紅燒牛肉麵,牛肉非常入味,完全唔韌,湯底亦唔油膩,麵條又夠彈牙,去到呢間餐廳必食。另外仲有一啲特色小食,例如玉米起司蛋捲餅,入面嘅芝士滿到就流出嚟,再加埋甜甜地嘅栗米,真係邪惡到不得了。 ▲紅燒牛肉麵($53),雖然老闆係台灣人,不過佢都非常關心香港,一直都有喺社交平台關注香港嘅事。 ▲玉米起司蛋捲餅($36),捲餅包住邪惡嘅芝士,再加埋栗米粒,份量十足,就算只叫一份都足夠飽肚。 ▲牛肉捲餅($35),牛肉有咬口,而且入面仲包咗爽口嘅青瓜,令口感更為豐富。 ▲滷豬排便當($47),豬扒夠大塊,而且滷得夠入口,再加埋佢係用便當盒裝住,別有一番風味。 ▲肉燥乾拌麵($38),天氣比較熱嘅時候,如果唔想食湯麵,都可以揀依款拌麵,除咗肉燥之外仲有半隻滷水蛋添! 程班長台灣美食 地址:荔枝角長沙灣道883號億利工業中心1樓102室 營業時間:星期一至六 11:30 – 21:00;星期日休息 文字來源:香港人.遊香港/圖片來源:@tasty.target、_g_alien_a、mclarenbozi、slothfooddiary、eathealthily_hk...
小編對重口味食物不嬲都幾鐘意,係深水埗做野既朋友仔話比小編知,原來西九龍中心有間food court 專食喇沙既!而且仲有好多唔同配料配搭,唔係淨係蝦咁簡單,可以配牛脷、豬扒、雞扒等。雖然位於food-court,佢既喇沙湯一D都唔馬虎,有齊魚片、豆卜、雞蛋,真係足料!麵亦掛上喇沙湯,湯底有淡淡椰香味,值得一試!大家等緊野食果時,仲可以去店鋪自帶既連儂牆,寫低你既心意喇! ▲雞扒喇沙湯麵($45包飲品):喇沙湯呈橙黃色,湯底加上週邊既紅辣油,未食就咁望上去已令人胃口大開,湯底香重椰奶香,飲落濃而不膩,配料特別欣賞豆卜,索晒啲湯好入味!雞扒以香草醃過,好有香味! ▲大蝦喇沙湯麵($45包飲品):大蝦真係大大隻架,蝦頭都帶膏,加上用心熬製湯底,真係好夾! ▲豬扒喇沙湯麵($45包飲品)香茅豬扒超重香茅味,唔覺無用到鬆肉粉。 ▲牛舌喇沙湯麵($45包飲品)牛舌超厚切腍嫰,濃郁羶香。 ▲小店位於food court 仲自帶連儂牆,等野食都要15分鐘,大家不妨用呢個時間寫下memo! 喇沙專門店 地址:深水埗欽州街37號西九龍中心8樓24號舖電話:6022 2662 文字來源:香港人.遊香港/圖片來源:Rennew Chan wing1713gg jyotsnafoodiary、@rainbow.leung...
喺香港,一般想食一餐好食嘅日本菜都唔平,呢間位於觀塘嘅樓上日本餐廳就提供價錢平民嘅壽司、刺身同丼飯,而且味道都十分唔錯。當中最多人叫嘅當然係魚生飯,由最平$60去到最貴$188都有,最抵食嘅就係刺身魚生飯,$98可以食齊海膽、三文魚、油甘魚、甜蝦、帶子、蟹籽、玉子、蟹柳、章魚同埋魷魚,魚生控可以食返夠本。唔夠飽嘅仲可以叫啲壽司同手卷,其中鰻魚壽司就相當唔錯。 ▲呢間餐廳主要做晚市,父子檔經營,由落單、煮嘢到埋單執枱幾乎都係由老闆自己打理,充滿人情味,簡直就好似香港版嘅深夜食堂咁,而且門口塊牌仲寫住「香港加油」添! ▲刺身魚生飯($98),有齊哂咁多樣魚生刺身,飯量又足,非常抵食。 ▲帆立貝甜蝦飯($98),足足有6隻帆立貝同埋3隻甜蝦,鍾意呢兩款刺身嘅魚生控可以叫呢個飯。 ▲吞拿魚蓉飯($80),吞拿魚蓉有好香嘅魚油味,而且份量十足,作為晚飯非常足夠。 ▲鰻魚壽司($18),鰻魚燒至金黃色,飯入面仲包咗蟹柳同玉子,睇見都流口水。 ▲玉子($16),金黃色嘅玉子,玉子控見到係咪好想食呢? 職人食事 地址:觀塘開源道60號駱駝漆大廈3座6樓S1室電話:9355 2377營業時間:18:00 – 03:00 文字來源:香港人遊香港/ 圖片來源:@rogerli_lfhk、invisible_foodblog、carftsman、mandieatagram、craftsman_dinner...
呢間位於天后既甜品係恩愛夫婦打理,開店契機源自太太既一場大病,令兩位更愛惜同大家相處既時間,老闆更放棄原有高薪厚職,由零開始去學習做甜品,開糖水店主打台式手工芋圓,手工芋圓係用人手手搓製成,唔係入貨機製,特別有人情味,而且仲可以搭配各款自家煲中式糖水如腐竹薏米糖水、蕃薯糖水,女士最愛既3.6牛乳燉蛋白都可以加入手工芋圓令口感更為豐富! ▲ 仙草八寶:材料好豐富,包括:仙草凍、芋圓、番薯圓、西米、紅豆、蓮子、珍珠、洋薏米等。 ▲呢度另一個好特別既地方係會用屋村紙皮石做枱,影出黎效果懷舊風,ig打卡係一流! ▲芒果忘年戀($45)芒果控一定要試呢個!係芒果雪糕配上芒果刨冰、芒果肉同芒果味爆珠。 ▲燒棉花糖朱古力夾餅($20/2件)燒過既棉花糖會變得軟綿綿,加上甜入心朱古力,食落會有種幸福感! ▲呢度亦有賣中式甜品,最近佢地既單都打上香港人加油字句同大家打氣! 陪著你走甜品 地址:天后興發街62-64號美城花園大廈地下KL3號舖 電話:57211250 營業時間:星期一至四、日 16:00 – 00:00/星期五至六16:00 – 01:00 文字來源:香港人遊香港/圖片來源:@cheroniat、@josehkguide、@quincymak、@standbyyoudessert、@foodiary_hkg...