提起廟街,好多人都會諗起煲仔飯,不過原來仲有一間好高質嘅Cafe。呢間Studio Caffeine主打All day breakfast,佢嘅Monster All day breakfast非常豐盛,有齊煙肉、紐倫堡腸、炒蛋、煙三文魚、黑松露薯蓉、車厘茄、大蘑菇、沙律、焗豆同埋法式麵包,食完包你覺得滿足。另外不得不試嘅仲有佢啲咖啡,事關佢呢到嘅咖啡曾經攞到多個獎項,以當中嘅抹茶鮮奶咖啡為例,口感香滑,拉花仲好似藝術品咁靚,飲之前真係要記得影返張相打卡先。 ▲Monster All day breakfast ($115),真係非常豐盛,當係晚餐食都冇問題。 ▲Matcha Latte ($50),拉花嘅圖案非常之靚,好似藝術品咁,點捨得飲? ▲Baileys Mousse Cake ($54),Cafe當然唔少得蛋糕,呢間Cafe嘅蛋糕同樣出色。 ▲食件cake,飲杯咖啡,真係好文青。 ▲呢間Cafe都非常支持而家嘅社會運動嫁! Studio Caffeine 地址:佐敦廟街284號地下電話:2793 3480營業時間:星期一至六 08:00-22:00;星期日 08:00-18:00 文字來源:香港人遊香港/ 圖片來源:@thebarebean、andymyf、dr.barcoffee_hk、ningyfff...
講到掃街,西灣河嘅太安樓係好出名嘅掃街熱點,而當中「魚蛋佬」呢間老牌小食店更加已經開咗十幾年,雖然佢嘅食物款式唔多,但每款都好抵食,牛丸夠彈牙,牛柏葉又唔會太韌,最正嘅就係佢自製嘅沙嗲汁,辣中帶甜,非常香濃,令食物嘅味道昇華到另一個層次。鍾意掃街嘅朋友,絕對要去呢到試下! ▲魚蛋($6/串),1串有5粒,抵食! ▲齋($6/串),由於經過油炸,所以更容易吸收醬汁,咬落去就係滿滿嘅沙嗲汁,真係太邪惡啦! ▲腸仔($3/串)、魷魚鬚($11/串)、魚蛋($6/串),最平嘅腸仔只係3蚊,而最貴嘅魷魚鬚都不過係11蚊,同朋友一齊叫成兜返嚟食都冇問題! ▲牛丸($9/串)同牛柏葉($10/串),兩款都係呢間店最受歡迎嘅食物。 ▲作為香港人嘅地道小店,亦都好支持而家嘅運動。 ▲真係要去好好懲罰下佢! 魚蛋佬 地址:西灣河筲箕灣道57-87號太安樓地下A28號B舖營業時間:星期一至日 14:00 – 22:00 文字來源:香港人遊香港/ 圖片來源:@allen_adrian、fatkancanbefat、foodie_queen_hk、international_foodaholic、yiuchinwang、1124hahahaha...
好多人都鍾意食餃子,而餃子要做到皮薄餡靚一啲都唔易。呢間位於油麻地嘅隱世小店就做到呢點啦!佢一共有4款餃子,分別係菜肉餃、韭菜豬肉餃、粟米豬肉餃同埋芹菜牛肉餃,每款都皮薄餡靚,咬落去非常juicy。唔只餃子,佢嘅其他菜式亦非常出色,其中麻醬豆腐就畀人好大嘅驚喜,豆腐夠滑,麻醬嘅份量好豪邁,一啲都唔孤寒,可以話係餃子之外嘅必食小食之一。 ▲4款餃子各自都係賣$30,一份有8隻,價錢夠親民。 ▲排骨擔擔麵($40),餃子麵之外嘅麵食一樣出色,排骨夠哂入味,加埋花生香,令人食過返尋味。 ▲麻醬豆腐($20),麻醬多到不得了,濃郁嘅麻香味加埋口感香滑嘅豆腐,絕對係必食之選。 ▲涼拌青瓜($20),有少少辣,青瓜夠凍夠爽口,食完好開胃。 竹地小館 地址:油麻地廣東道838號金冠樓地下電話: 3614 5672營業時間:星期一至日 11:00 – 23:00 文字來源:香港人遊香港/ /圖片來源:@jap.ho.food、ccyui_hkfoodies...
而家好多餐廳食個晏起碼都要四、五十蚊,想慳啲錢都唔容易。呢間位於新蒲崗嘅車仔麵就好抵食,三餸一麵只需要37蚊,味道仲好好添,小編大力推介嘅就係鹵水雞翼,鹵得非常入味,湯底加埋腩汁嘅話簡直一流。除咗車仔麵之外,佢啲飯餐都非常之唔錯,其中招牌豬扒蛋飯絕對係必食之一,豬扒夠juicy,加埋太陽蛋的金黃蛋汁,令人食指大動!埋單嘅時候,不妨仲可以留意下收銀櫃檯,上面貼咗張紙寫住「香港人加油」添! ▲三餸一麵,其中有啲餸需要另加$1,相中嘅分別係蝦條、鹵水雞中翼同埋豬大腸,三樣餸都需要另加$1,合共$40。當中除咗雞翼之外,蝦條亦係推介之一,彈牙夠入味,加埋湯汁一齊食就一流。 ▲當然,都有好多餸唔需要另外錢,蟹柳就係其中之一。 ▲招牌豬扒蛋飯($44),豬扒夠大塊,十分之入味,菜都唔係只係得一兩條,非常抵食。 ▲瑞士雞翼餐肉蛋飯($42),除咗豬扒蛋飯之外,仲有其他飯類可以選擇。 ▲蝦條雞中翼蛋飯($42),太陽蛋有少少脆邊,中間嘅蛋白就好嫩滑。 ▲蘿蔔牛腩飯($42),蘿蔔同牛腩都好入味,同其他飯類一樣,加埋凍飲都只係加入$2,價錢夠哂平民。 地道館車仔麵 地址:新蒲崗崇齡街42號地舖電話:5217 7008營業時間:星期一至日 11:00 – 22:00 圖片來源及文字來源:香港人遊香港...
好多人都鍾意食牛扒,愈大份就愈正。呢間佐敦嘅西餐廳絕對可以滿足到一眾牛魔王,佢嘅粉紅岩鹽安格斯T骨牛扒足足有十四安士咁大塊,肉厚多汁,食完包你滿足!特別嘅係,好多人都會去佢呢到慶祝生日,為嘅就係佢提供嘅星期蛋糕,外形非常精美,絕對可以為人帶嚟一個難忘嘅生日! ▲粉紅岩鹽安格斯T骨牛扒($398),大大份又夠Juicy。 ▲星球蛋糕($288),比較大個,最少兩位人先食得哂。 ▲仲附有小燈炮,更加有氣氛。 ▲除咗蛋糕版之外,仲有爆朱古力版,勁多朱古力,食返夠本! ▲原條慢煮豬肋骨($288/1條;$168/半份),豬肋骨上面鋪咗一層肉鬆,非常惹味。 ▲呢間餐廳都非常貼地! ▲芝士焗墨西哥脆片($68),適合素食人士,份量都好足。 ▲地獄雞翼($68),比較辣,適合鍾意食辣嘅朋友。 Tony’s Hell 地址:佐敦文苑街38號地舖電話:57244537 (WhatsApp)營業時間:17:00 – 23:00,星期三休息 文字來源:香港人遊香港/圖片來源:@hkbanker.foodie.oldsion、tonys_hell、natyuen19...
心太軟係一款比較難整嘅甜品,甜品控唔識自己整嘅話,可以去邊到搵心太軟嚟食呢?呢間位於長沙灣嘅甜品店相信可以滿足到你想食甜嘢嘅欲望,佢嘅心太軟有非常香濃嘅朱古力味,但食落口又唔會太甜,配埋冰凍嘅雪糕球,冰火交融,口感層次非常豐富。特別嘅係,除咗甜品之外,佢賣嘅秘製雞翼尖都非常唔錯,份量十足,而且都落足料,非常惹味。 ▲自家制心太軟($49),呢間甜品店非常地道,心太軟隔離仲畫咗連登豬同埋HK Add Oil嘅字眼! ▲除咗連登豬之外,仲有Pepe添! ▲芒果奇兵($43),芒果+芒果雪糕+芒果沙冰+芋圓,芒果控真係唔可以錯過。 ▲糯米糍($26),有成7粒,價錢亦非常親民。 ▲秘製雞翼尖($26),好多人都鍾意食雞翼尖,喺呢到食完雞翼尖,再食甜品,簡直係享受! 甜一刻 地址:長沙灣福榮街218號美居中心62號舖地下電話:3568 6757營業時間:星期一至四 16:00 – 02:00;星期五至六 16:00 – 02:00;星期日 16:00 – 01:00 文字來源:香港人遊香港/ 圖片來源:@sweetmomentdessert、gourmand_bubble、ellaaaxbb...
經過呢間隱身於長沙灣工廠區既cafe,好可能會忽略左佢!門口既販賣機賣既其實唔只係咖啡,裡面仲係一間有賣其他主食既cafe。門口既黑白販賣機夠晒型格,但其實店主仲係個拉花高手,可以拉出好多唔同圖案,咖啡質素甚高!咖啡師用出神入化既拉花技術幫香港人打氣:「香港加油」。呢度既All Day Breakfast 都製作認真,仲有意粉等等都味道唔錯! ▲Cafe門口有一部黑白型格既販賣機,都非常搶眼! ▲販賣機設計精緻可愛,重點係咖啡質素都好高,打卡亦一流! ▲咖啡質素有保證外,拉花技術都一流,可以拉出好多複雜或比較少見既圖案。 ▲更可愛的是呢間黃店,更拉出了「香港加油」幫香港人打氣,係唔係應該要多多幫襯先? ▲佢地既all day breakfast都唔貴而且好好心思,份量亦十足! ▲小店仲養左隻好可愛既狗狗叫Coffee,更添小店溫情。 Coffee Question 地址:長沙灣褔華街588 號地下B舖 電話:6111 9384 營業時間:08:00-19:00 (星期六: 10:00-18:00) 文字來源:香港人遊香港 / 圖片來源:@skeatravelife、@coffeequestion、@hkhipstercafe...
生命中總會認識一兩個大胃王,佢地無論食飯定食甜品都鍾意加大或者叫啲大份嘅。如果你又係大胃王,呢間位於長沙灣嘅Cafe就好啱你。佢嘅手工漢堡扒定食夠哂份量,漢堡扒極之厚,仲伴埋軟滑嘅蛋沙律,保證食完滿足。另外唔可以唔食嘅就係佢啲Pancake,size比一般Pancake仲要大差唔多1.5倍,食落蛋味夠,又唔會太甜,最重要嘅係口感輕盈軟熟,令你不知不覺就會食哂食碟! ▲流心芝士手工漢堡扒定食($75),米飯用咗穀米,夠哂健康,漢堡扒極厚,令人非常滿足。 ▲牛油果沙律($78),想食得健康啲,都可以叫沙律,同樣份量十足。 ▲孜然雞翼飯($56),外脆內軟,特別惹味。 ▲鮮雜果空氣朵梳乎厘班戟($138),份量超足,蛋味濃郁,口感超輕盈。 ▲伯爵茶蝶豆空氣朵疏乎厘班戟($108),近來好興蝶豆花,唔只有利健康,顏色亦係好多人鍾意嘅紫色,令好多甜品店都會將佢加入Menu。 ▲蜜糖烏龍無花果蛋糕($48),除咗疏乎厘之外,仲有蛋糕。 雙生館 地址:長沙灣集輝街2-8號耀輝大廈地下3號舖電話:6060 9834營業時間:星期一至五 11:30 – 21:30;星期六至日 11:30 – 22:00 文字來源:香港人遊香港/ 圖片來源:@daidaipipi、mandymanlovefood、koalascities、fall_in_love_with_food...
好多香港人都鍾意食台灣嘢,呢間喺荔枝角嘅台灣餐廳就係由一個移民香港嘅台灣人所開嘅,每一道菜都非常之地道,令你就算唔使去台灣都可以食到地道嘅台灣美食!當中最出名嘅莫過於紅燒牛肉麵,牛肉非常入味,完全唔韌,湯底亦唔油膩,麵條又夠彈牙,去到呢間餐廳必食。另外仲有一啲特色小食,例如玉米起司蛋捲餅,入面嘅芝士滿到就流出嚟,再加埋甜甜地嘅栗米,真係邪惡到不得了。 ▲紅燒牛肉麵($53),雖然老闆係台灣人,不過佢都非常關心香港,一直都有喺社交平台關注香港嘅事。 ▲玉米起司蛋捲餅($36),捲餅包住邪惡嘅芝士,再加埋栗米粒,份量十足,就算只叫一份都足夠飽肚。 ▲牛肉捲餅($35),牛肉有咬口,而且入面仲包咗爽口嘅青瓜,令口感更為豐富。 ▲滷豬排便當($47),豬扒夠大塊,而且滷得夠入口,再加埋佢係用便當盒裝住,別有一番風味。 ▲肉燥乾拌麵($38),天氣比較熱嘅時候,如果唔想食湯麵,都可以揀依款拌麵,除咗肉燥之外仲有半隻滷水蛋添! 程班長台灣美食 地址:荔枝角長沙灣道883號億利工業中心1樓102室 營業時間:星期一至六 11:30 – 21:00;星期日休息 文字來源:香港人.遊香港/圖片來源:@tasty.target、_g_alien_a、mclarenbozi、slothfooddiary、eathealthily_hk...
除咗去市面嘅蛋糕店買蛋糕之外,而家好多人都會去啲網店訂製特別款式嘅蛋糕。呢間網店近嚟就整作咗一款蛋糕,引起咗好多人嘅注意。究竟呢款蛋糕有咩特別呢?原來佢係以獅子山為藍本,像真度非常之高,上面仲加咗一啲小燈泡同埋口號,簡直就好似將現實入面見到嘅獅子山用魔法縮細咗一樣。除此之外,佢仲有其他充滿香港情懷嘅造型蛋糕,例如外形係莊士敦道嘅舊樓同埋舊式日曆呢兩款蛋糕,都好受客人歡迎。 ▲獅子山蛋糕($980),造型非常迫真,上面仲掛咗幾句口號,展示香港人精神,口味方面可以揀原味海棉蛋糕配士多啤梨果醬或者藍莓醬,亦可以揀朱古力海棉蛋糕配榛子可可醬或者朱古力醬。 ▲舊曆蛋糕,上面唔只有舊式日曆,仲用咗香港舊區常見嘅霓虹燈牌嚟打造生日人士嘅名,非常有特色。 ▲Pepe蛋糕,Pepe本身喺外國就非常多人認識,而家都成為咗香港新一代嘅流行Icon,呢款蛋糕就充分咁展示咗Pepe嘅魅力。 ▲安全頭盔蛋糕,上面加咗鬆軟輕盈嘅棉花糖,外形咁精美,生日人士睇到相信都會感動落淚。 ▲舊香港.莊士敦道蛋糕,唔知仲以為係舊樓嘅模型,上面仲掛咗一塊舊區常見嘅招牌,更加有立體感。 Amai (あまい) Workshop 網址:http://bit.ly/2pOzqRq 營業時間:逢星期一休息 文字來源:香港人.遊香港/圖片來源:@amaiworkshop...