[駐場博客: 小牛牛快樂行山郊遊相集by Chan Keung]今次介紹由石門甲落漕溪,穿梭石澗,充滿原始風味,風景美不勝收,出澗後經法門古道到達昂坪,再坐巴士去大澳上虎山,從4條中華白海豚後面,行隱徑落海邊,尋找將軍石,相當吃力。 响東涌嘆完個靚早餐之後,坐大嶼山巴士34號入石門甲(留意班次比較疏落),廿多分鐘就到達石門甲總站,落車正式起步, 沿馬路直上,再轉入山徑,呢條路叫做地塘仔郊遊徑,又名法門古道,行咗無耐,靠右手面有絲帶引路,横降落小叢林進入漕溪石澗,入口已滿樹藤枯枝,未落到底已聽到流水聲音,卒之到達石澗,有大潭小潭,仲有好多巨石,當日水質清澈,不過小編知道上游仲有多間寺廟,住宅,農地…所以經驗話俾小編知,最好唔好接觸倒呢啲水,某程度上有一定嘅染污呢! 今日水流唔係太急,水位唔高,可以輕鬆上石面一級一級跳上,除咗有幾個大潭需要在山澗兩旁山徑繞過之外,其餘大部份都可從大石上面走過,可能呢條石澗比較小人行,所以絲帶標記都比較小,不過漕溪無支流,所以一直攀上就係,同埋比較短,只有1公里多啲就行完,出澗後繼續接返法門古道上, 左右兩旁有好多間大大小小嘅寺廟,好快就到達東山法門,其實係一道玄關,呢度同時係昂坪奇趣徑,又係彌勒山入口,繼續一直行,就到達昂坪廣場,經過大佛,前面巴士站,坐21號巴士去大澳,時間尚早,首先試吓當地街頭美食先,食飽之後,經過大澳街市,沿石仔埗街一直行,到達大澳文物洒店,本來打算沿洒店後面山徑去虎山参觀,點知有告示牌~不准進入。唯有調頭走返落石仔埗街,再去香港少林武術文化中心,靠左邊有條山徑行上去虎山觀景台。呢條山徑附近有幾個墓穴,條路巳鋪上大石磚,好易行,好快就到達,首先見到係四條中華白海豚大型雕塑,顏色漂亮,維肖維妙,的確係呢度嘅靚靚地標, 四條海豚後面有一條小隱徑,沿小徑走,初段唔困難,行到近海岸有絲帶引路,可以下降落海邊,不過呢段斜坡泥路好鬆散,石頭又鬆脫,需要拉住左右樹藤緩緩下降,落到海邊係一個比較斜嘅石灘,跟據地圖顯示,可以從呢度綑邊到將軍石,距離不遠,可是此段路比較崎嶇,危險,小編决定放棄,雖然有啲遺憾,但係可以欣賞倒美麗海邊,都值得一遊。好辛苦爬返上嚟,經過四條海豚返去虎山觀景台,呢度條路左右兩邊欄杆,塗上紅色好鮮艷,沿山脊而建,遠睇好似一條小長城,氣勢磅礡,好壯觀,不愧為打卡熱點。行到尾段小涼亭,仲有一望遠鏡,可以 窺探一下港珠澳大橋添。响呢度欣賞日落真係一流。打完卡後可以沿路折返,或者繼續向前面小山徑走,不過呢段路比較斜,碎石鬆泥,要慢慢跣住落,旁邊有繩可以拉住落,呢段路風景開掦,可以欣賞象山和獅山,左面仲有港珠澳大橋,配合海灣,不失為一個大景,好似一幅油畫。跣咗十五分鐘左右落到地面,靠右邊就是寶珠潭,不時有大小魚隻跳上水面,睇完魚仔跳之後穿過村莊返回大澳巴士總站完成旅程。 ▲由石門甲起步經地塘仔郊遊徑直上ㄧ小段之後右轉入澗 ▲漕溪内有多塊巨石可供攀爬 ▲有多個大小水潭,風景優美 ▲如果唔想濕脚,可以從左右山徑跨過 ▲攀爬石澗有一定危險性,前住必須量力而為 ▲石澗旁小徑佈满樹藤 ▲顛茄,有毒 ▲蔥蓮,又名玉簾 ▲漕溪没有支流,ㄧ直住上方向行就可達上游出澗,整條石澗不太長,好快就行完 ▲出澗後經法門古道到達昂坪廣埸 ▲乘搭巴士到達大澳,石仔埗街往虎山出發 ▲經香港少林寺武術文化中心旁邊山徑上虎山 ▲到達虎山觀景台地標,四條中華白海豚雕塑 ▲從中華白海豚雕塑後面有ㄧ條隱徑,可穿過小樹林到達海邊石灘 ▲海邊岩石路徑比較傾斜和崎嶇,每ㄧ小段都要小心前進 ▲巧遇美麗夕陽,令人醉了 ▲本來打算綑邊尋找將軍石,可惜發現此路段比較危險,決定放棄 ▲返回虎山觀景台漫步_小長城 ▲虎山觀景台是欣賞夕陽美景好去處 ▲可以從另一山徑落山 ▲因為遠眺外型有點像長城,所以又被稱為_小長城_ ▲此山徑比崎嶇,散沙碎石多,前住必須小心,風景開掦,可以飽覽象山,獅山和寶珠潭 路線: 石門甲>漕溪>法門古道>東山法門>昂坪廣埸 共5公里……大澳>虎山觀景台>寳珠潭大澳 共3公里交通: 東涌乘坐34號巴士到達石門甲,昂坪乘坐21號巴士入大澳 注意事項:⚠️如果沒有行澗經驗可全程改行法門古道直接抵達昂坪⚠️探索將軍石可由大澳文物酒店綑邊到達(注意有一定危險性)⚠️愛護郊野清潔人人有責,自己垃圾自己帶走 文字/圖片來源 :小牛牛快樂行山郊遊相集by Chan Keung...
[駐場博客 @ 小牛牛快樂行山郊遊相集by Chan Keung]今次介紹一條新手路線,路徑平緩,没有太大上落坡幅,沿途風景優美,沿途路徑,又有大樹遮陰,好適合陽光普照時步行。 注意事項:⚠愛護郊野自己垃圾自己帶走!⚠天時暑熱,記得帶足夠飲用水,每名成年人每小時需補充500-800ml 水份 ▲起子灣小碼頭 ▲北潭涌自然教育徑風景 ▲上窰郊遊徑沿途風景 ▲巧遇心心雲 ▲沿途小花 ▲上窰郊遊徑風景 ▲曝罟灣 ▲曝罟灣風景 ▲萬宜水庫 ▲萬宜水庫西壩 ▲萬宜水庫西壩 ▲萬宜水庫西壩 ▲萬宜水庫西壩 ▲沿麥理浩徑一段返回北潭涌 北潭涌 路線:北潭涌>北潭涌自然教育徑>上窰民俗文物館>起子灣小碼頭> 曝罟灣>曝罟灣營地>上窰郊遊徑> 麥理浩徑一段>萬宜水庫西壩>沿麥理浩徑ㄧ段返回北潭涌前往交通: 由西貢乘坐 9号小巴 或 94号巴士 或 96R号巴士(祗有假日服務)到上窰站落車,對面就是北潭涌自然教育徑起點長度:來回大約共10公里,步行大約四小時,連影相、休息共需六小時詳細路線:https://www.trailwatch.hk/app/?t=activities&rid=10043396 文字/圖片來源 :小牛牛快樂行山郊遊相集by Chan Keung...
[駐場博客小牛牛快樂行山郊遊相集by Chan Keung]呢排咁好天氣,唔去行山登高真係嘥晒呢! 每朝上班見倒藍天白雲,已經好期待立即出發。香港工作壓力大,上山頂減減壓最令人身心康泰呢! 今次為大家介紹一條簡單路線~四方山>城門水塘。 响荃灣食完個靚早餐,先去荃灣西巴士總站坐51號巴土,去到大帽山郊野公園站落車,整理好裝備之後,由大帽山茶水亭出發,首先由大帽山道直上,全程馬路旁行走,車輛雖然唔多,但都要小心啊! 途中見倒一嚿大元寳石,再上就見倒大波波(大帽山地標),呢個係全港最高嘅山峰,每天晚上都有一批批龍友帶埋長短伙上嚟等日出,天氣就嘅話,仲有雲海睇添。經過咗大波波之後就開始落山,沿途都係石屎路,一直落卒之見倒泥石路了,亦都係到達四方山, 進入麥理浩徑8段,呢度山坡好開掦,一大片短草地,周圍満佈巨石,好似進入咗八陣圖感,沿山徑行上落坡幅唔算大,相當好行,途中仲見倒小编最喜愛嘅小牛牛添,牛牛嘅出現的確為郊野帶來活力和生氣,所以大家唔好傷害佢哋,同埋唔好餵治佢哋呀! 行咗一段較長嘅山徑之後,開始落山,呢一段大部份係大石级,唔太困難,好快就到達沿鑛坳,右轉進入城門水塘,呢段八乘都係石屎路,好平緩,行咗無耐,到達一條小石橋,從橋邊落就係大成石澗入口,小編今次冇打算行石澗,所以只拍照留念,不過倒影真令人着迷呢! 繼續住前行,走到接近水塘邊一段路,再左轉落小徑,就見倒有一大片泥土地,再直行就到達水塘岸邊,呢度係電視台成日離拍外景位置,剛啱遇上光線折射,樹林倒影,色澤分明,景色迷人,唔怪得知電視台成日離取景啦。打過卡後返回石屎路,一直走到達城門水塘菠蘿壩,完成今次旅程。 注意事項:⚠ 路程較長,中途没有補給站,帶備充足飲料⚠ 風高物燥切勿在山上吸煙,容易引起山火,後果嚴重⚠ 愛護郊野清潔人人有責,自己垃圾自己帶走 ▲每逢假日都吸引許多人前來城門水塘郊遊 ▲從小石橋進入大成石澗 ▲四方山巨石滿佈四周遊人都喜愛攀上打卡,不過必需要小心! ▲四方山觀景開揚 ▲小牛牛是小編至愛 ▲由四方山沿山徑直落-經過麥理浩徑8段再落山就是鉛礦坳 ▲四方山地標點頭石 ▲城門水塘風景美麗是電視台經常取景熱點 ▲大成石澗水質清晰 ▲走了一大段石屎路卒之進入泥石路 ▲大帽山牛牛不要傷害佢哋喔 ▲四方山山徑平緩上落坡幅不大 ▲城門水塘風景優美為郊遊熱點 ▲玉兔石 ▲麥理浩徑8段連接大帽山與四方山 ▲ 大成石澗 ▲四方山滿佈巨石 ▲大帽山大元寳石 ▲大帽山居住不小牛隻 ▲麥理浩徑8段 ▲四方山大部份都是短草地風景開掦 四方山>城門水塘 路線: 大帽山茶水亭>大帽山>四方山>麥理浩徑8段>鉛礦坳>城門水塘 全程16公里 需時約5小時路線圖參考:http://bit.ly/2WyQ0A6...
[駐場博客小牛牛快樂行山郊遊相集by Chan Keung] 山竹過後,有好多 行山 路線大樹倒塌被封閉,政府有關部門都慢慢修復過來,但係有啲行山人仕自行開發嘅路線就有待山友自行清理了。所以有部份山線仍有待”打通”,可是小編偏喜歡捐窿捐罅,今次就小試牛刀,走走獅子山獅尾脊。 首先由沙田坳道法藏寺後面登山入囗起步,呢度有幾條登山路線,分岔路多,每走一小段就要打開行山路線apps,查核一吓有冇行錯路。走了一小段發現有好多大小樹幹倒冧,打橫封鎖路線,唯有逐一小心攀過,但遇上爬唔過就唯有繞其他路缐行呢! 爬爬捐捐好快就到達獅尾脊入口,走多一小段就見倒~天梯石。天梯石其實是一組由幾嚿巨石拼合而成的一條長長石梯,面積大約長90尺濶10尺,因為外形似一條梯直上天空,所以名稱由此得來。打卡後直上靠右轉入石馬外脊,順道走訪埋石馬。拍照後又經過儍人塔,繼續沿獅尾脊上獅子山頂。好快就到達山頂,剛巧是日落時份,在獅山頂觀看日落, 俯瞰整個東九龍,真係美不勝收,賞心樂事,多麼壯觀呢! 拍過夠後沿麥理浩徑5段直走,經過筆架山落山完成旅程。 ▲獅子山不難找到打卡靚位 ▲夕陽多美 ▲獅尾脊上觀看美麗夕陽 ▲山竹過後有部分路線仍有待清理 ▲風雨過後部分路段有封佐有待山友打通 ▲山頂懸崖位置比較危險小編不建議攀上 ▲天梯石由幾組巨石堆砌而成 ▲有大地在我腳下感覺 ▲巧遇美麗雲彩 ▲獅尾脊直上獅子山 ▲夕陽美景令人心曠神怡 ▲石馬脊上的石馬 ▲天梯石 ▲有多條分岔路建議先安裝行山地圖apps ▲每逢假日獅子石都人頭湧湧 ▲穿過石縫 ▲筆架山日落美景 ▲俯瞰東九龍美景 ▲部分路段比較崎嶇 ▲獅子山頂有多個打卡靚位 ▲獅尾脊部分路段比較崎嶇需手腳並用 ▲要攀上獅子山頂有ㄧ定危險性必需量力而為 ▲路邊野花不要採 ▲觀看夕陽美景 ▲獅尾脊其中ㄧ個特色景點天梯石 ▲經獅尾脊直上 獅子山獅尾脊 路線: 法藏寺>獅尾脊>獅子山頂>筆架山 全程大約10公里 注意事項:-建議先下載行山地圖apps-多分岔路,建議由經驗人行帶領-攀上天梯石有定危險,量力而為-風高物燥切勿在山上吸煙,引起火災後果嚴重-愛護郊野清潔,自己垃圾自己帶走...
由馬鞍山良友路出發,去到馬鞍山燒烤場,沿馬鞍山郊遊徑到達分岔路口,左轉逆走麥理浩徑到達大金鐘的入口,約30分鐘便到達大金鐘。 沿路落山可見昂平及西貢景色,接回馬鞍山郊遊徑到達茅坪分岔路口,選擇往基維爾營地的方向走。經過M88標距柱後,需留意右面有小路上水牛山,一口氣上到水牛山後,旁邊就是黃牛山了。 沿路落山到達沙田廣源邨結束 。 去過昂平幾次了,但每次都只能經過大金鐘,今次就以大金鐘為目標。起點是馬鞍山錦英苑錦雅閣旁小路接馬鞍山村路上山,最初全是車路,途中會經過馬鞍山燒烤場,並會進入馬鞍山郊遊徑,請留意標距柱! ▲標距柱有助行山人士清楚知道自己位置,即使出了意外,只要講出標距柱上的號碼,便可以更加準確地知道自己的位置 ▲間中會見到這些洞口 ▲這個路口向前行 ▲開始進入山路 一公里上山路便會到達涼亭,有多條分岔路,記得轉左 ▲上山約500米到會見到這個路口,這時需離開麥理浩徑,從這裡上山 ▲西貢一帶 ▲終於上到山啦! ▲昂平草原,我們的下一站 ▲落去昂平的路比較多碎石,小心慢行 來到昂平,這裡同時是麥理浩徑和馬鞍山郊遊徑的路段,請留意,過了M082和C3306後不久,便會見到分岔路,左面是馬鞍山郊遊徑往大水井,右面是麥理浩徑,需繼續沿麥理浩徑走 ▲麥理浩徑標距柱 直到過了M088不久,即大約走了3公里,便會見到有多條分岔路,留心右面有路口可以上水牛山 ▲右面小路上山 上水牛山雖然是小路,但路線清晰,很快便上到去了,但山上並沒有標高柱,很快便離開往黃牛山了 ▲景觀一流,但天色一般 由水牛山往黃牛山都是很短的路途,少量落山路,少量上山路便到了,但山上十分當風 ▲往黃牛山 ▲到黃牛山了 由於開始下細雨,我們很快便離開了,但落山往廣源也需要經過漫長落山路,加上十分大風,的確不容易 ▲望見終點了 ▲落到山會見到這個路牌,終點是黃泥頭巴士總站,可以搭小巴或巴士往沙田市中心 馬鞍山村>廣源 難度: ***(5*為最難)需時: 7小時(慢行+拍照)長度: 12公里路線參考: https://bit.ly/2OCy2aI文字/圖片來源 :賞山樂山...
[駐場博客小牛牛快樂行山郊遊相集by Chan Keung]今個暑假好快又過咗,但係雨季仍然未過,近排時晴時雨,令到好多山友都唔知登唔登高好。話説早排有一天日間 傾盆大雨,點知到咗下晝又突然之間 天氣轉晴,小編二話不說即刻衝上去青欣山拍低日落美景,順便介紹一吓呢條簡单路線。 當日下午5點幾,天氣突然轉晴,立即起行上青欣山,涌美路起步,一路行斜坡上,轉咗幾個街口,好快就到達青衣自然教育徑入口,成條山徑都係石屎路,唔洗著行山鞋都無問題,沿石徑一直走,行咗大約10分鐘左右,轉右手面上石級,開始登上山徑,又行多10分鐘左右,回頭一望,可以望到青衣各大小屋苑,景觀十分開掦,再上多幾段石級,有一座小亭,除咗可以坐低乘涼之外,呢度仲可以望到青衣油庫,遠方仲有馬灣, 汲水門大橋,好靚喔! 影咗2張相之後繼續上, 卒之到達1號觀景亭, 呢個位置可以飽覽整個吸水門大橋,有好多郵輪穿梭,仲有飛機上上落落,差不多每一分鐘都有飛機飛過, 響呢度睇飛機穿梭,就知道點解香港國際機場咁繁忙呢! 嘩! Magic hour到了, 夕陽餘暉,美景醉人,心裡頓時哼起~”夕陽醉了,落霞醉了…….”  影咗好多張相之後,天色 漸暗,又是回家的時候了,沿途折返,完成今次行程。 呢條路線好適合一家大細同行(記得做足防蚊措施), 簡單易行,景觀優美。 ▲青衣西路左轉,到達青衣自然教育徑入口 ▲初段平緩山徑,沿途仲有好多芭蕉樹在兩旁 ▲教育徑大部份都蓋石板,簡單易行 ▲山徑中段有地圖顯示各觀景亭位置 ▲青欣山標高柱 ▲未上到山頂景色已經好靚 ▲向1號觀景亭方向出發 ▲最後 — 段斜坡石屎路 ▲到達1號觀景亭,景色開揚,遠望汲水門大橋 ▲好多喜愛拍攝龍友,都喜歡響呢度擺定腳架,拍攝夕陽美景 ▲夕陽加上美麗雲彩,構成 — 幅美麗圖畫 ▲小編都忍唔住自拍返 — 張剪影先😆 ▲小編粗略數過,差唔多每一分鐘都有飛機上落,證明香港國際機場真係非常繁忙 ▲天色漸暗又到了回家的時候 注意事項:~沿途沒有補給請帶備足夠食水~愛護郊野清潔人人有責自己垃圾自己帶走~ 此區域鄰近機場,切勿駕駛航拍機拍攝, 避免觸犯法例~ 呢期登革熱鬧得熱哄哄,記得做足防蚊措施 青欣山 路線: 涌美路>青康路>青衣西路>青衣自然教育徑>青欣山>1號觀景亭沿路折返共6公里,需時ㄧ小時左右 文字/圖片來源 :小牛牛快樂行山郊遊相集by Chan Keung...
[駐場博客小牛牛快樂行山郊遊相集by Chan Keung]今個暑假成日都落雨,又有雷暴,攪到幾次行山行程都要臨時取消。難得今日好天氣,天文台話會高達34度,都唔理咁多,一於出走龍鼓灘,花香爐頂一趟! 難得放假好天氣,明知烈日當空,都唔理咁多,照出發上花香爐頂,首先去屯門港鐵站落車,樓下就係港鉄巴士站,乘坐K52巴士,坐到總站落車,沿龍鼓灘路住北方向走,不到十分鐘左右就發現一個地盤,靠右邊會見倒一條山徑,沿山徑直上, 經過幾個墳墓,山徑比較風化,皆為碎石散沙路,唔小心好易跣倒,所以必須要小心慢行,途中仲會見好多巨型怪石。 好唔容易上到花香爐頂,山頂一大片黄沙,遠望東面是青山腹地,當中有幾個大峽谷,極具特色,而望向西面是南中國海,景觀開掦。打完卡後,見天色唔早,原路趕回龍鼓灘, 巴士站對面就係龍鼓灘沙灘,呢度啲沙全部都係黑色,好幼細,好有特色,沙灘好闊落, 見到好多人都響呢度玩水, 放狗仔,釣魚,更有一大班龍友準備同我一樣等日落 拍照, 適逢今日天色明亮,能見度高, 太陽正好落到海邊,一大片橙海,天空呈現大片雲彩, 構成一幅美麗嘅圖畫,美景醉人, 小編都逗留在呢度狅拍照,好耐都唔捨得走呢! ▲由龍鼓灘巴士站起步,經過山徑直上花香爐頂 ▲山徑大部份都是散沙碎石,相當跣,前住必須小心 ▲建議先下載行山地圖apps配合GPS, 避免迷失路途 ▲由於這裡風化嚴重,花香爐頂周圍都是黄沙ㄧ片 ▲山頂西面正是南中國海 ▲東面是青山腹地,當中有幾個峽谷,甚有特色 ▲適逢光線配合海灘會呈現鏡面效果 ▲沙灘的幼沙全部都是黑色 ▲由於龍鼓灘位予新界最西面邊端,所以觀賞日落最適合 ▲醉人美景令人依依不捨 注意事項 :⚠上花香爐頂大部份山徑都係散沙碎石路,不太好行,前住要有心理準備⚠大部份路徑都無樹蔭,要做足防曬⚠建議先下載行山apps,配合GPS避免迷路⚠愛護郊野清潔人人有責,自己垃圾自己帶走 龍鼓灘 路線: 龍鼓灘>花香爐頂>龍鼓灘沙灘全程約7公里 文字/圖片來源 :小牛牛快樂行山郊遊相集by Chan Keung...
[駐場博客 @小牛牛快樂行山郊遊相集by Chan Keung]天氣實在太熱了,打算揾條舒服簡單路線行吓,心諗最舒服路線莫過予麥理浩徑10段啦!因為全程石屎兼平坦路,輕鬆過行公園,但係….敵不過自己心野,卒之行咗上山頂,辛苦嘅旅程又開始了。 九徑山點去? 話說當日睇到天氣報告 高溫直逼34度,諗住搵條簡單舒服路線行吓,小編一諗就諗到去麥理浩徑10段,因為呢度九成係石屎路平緩路線,十分簡單,仲簡單過行公園。屯門食完早餐之後就坐港鐵巴士K53出發,去到掃管笏變電站落車,再行一小段路,好快就上到去麥理浩徑10段中段入口 超靚鳥瞰港版 千島湖 打卡位 一直行,風和日麗又有樹蔭,清風送爽,行得好舒服,行咗冇耐就見到金沙坑,即管走入去睇睇,早幾日落完大雨,山澗十分大水,今次唔行石澗了,洗洗面之後再繼續沿麥徑行,但係見到金沙坑旁邊有條山徑好正,心癢癢決定改向高山路線走上去,順便可以高空俯瞰一吓大欖涌水塘全貌,呢個被喻為香港千島湖之稱嘅靓景,究竟有幾靚呢!山徑初段已經好多散沙碎石,行每一步都好跣,十分難行 ,地況就好似青山腹地,蚺蛇尖差不多,其實呢條屬於九逕山其中一條山徑,好多都係行山友自己開發,除外有絲帶引路之外,有部份路徑有D自行搭建嘅乘涼設施添。繼續不斷向上行,路徑十分貧瘠,乾旱,大部份都係沙地,就算有幾靚幾咬地嘅行山鞋都無用,小編好小心行都跣低咗幾次,所以上到山頂都相當花體力,到頂後回頭一望,觀景開掦,一望無際,頓時一洗心中疲累呢! 經過一個又一個山坡之後,竞然發現有水源,睇睇地圖原來係白石坑近源頭地帶,真係久旱逢甘露,衝過去小溪澗,立即用水擦擦面,精神圍之一振。繼續沿山徑上路,多條路線縱橫交錯,唔睇清楚地圖好易走錯路,走到另一小峽谷,有一小段急斜下坡小徑,有前人違下的大麻繩,借力落到底,到達九黃石澗,横過後又要爬返上斜坡接回山徑,上上落落之後又到達一個大平源,旁邊可以俯瞰整個大欖涌水塘,嘩~ 真係好靚喔,不愧為香港千島湖之稱,其實行過大㰖涌水塘十多次,不過每次都係水塘旁邊行,無今次俯瞰效果咁靚。打卡後開始沿山徑落山,經過黄泥墩水塘,向楊家村方向直落,經過幾個農莊,有興趣仲可以購買一些蔬菜回家添,穿過農莊到達大棠巴士總站,完成旅程。需時大約5小時。 ▲由掃管芴直上麥理浩徑10段起身好快就到達金沙坑 ▲改道金沙坑旁邊山徑直上 ▲山徑入口有絲帶引路初段不太難行 ▲山徑入口有絲帶引路初段不太難行 ▲山徑入口有絲帶引路初段不太難行 ▲ㄧ直沿山徑直上路況開始變差 ▲大部分路段都係散沙碎石 ▲遠眺東灣 ▲多個觀賞位置 ▲假蘋婆 ▲越近山頂路況差大部份都係散沙碎石 ▲碎沙路好跣每步必需小心慢行 ▲山徑貧瘠地勢有啲相似青山腹地和蚺蛇尖一帶 ▲黄沙浩瀚 ▲韭蓮 ▲山勢連錦起復 ▲經過九黄石澗源頭呢度十分斜都需要借助麻繩上落 ▲卒之到達今次最佳位置呢個位置可以俯瞰整個大欖涌水塘 ▲有千島湖之稱嘅大欖涌水塘 ▲打完卡後沿山徑落山 ▲落山接回麥理浩徑10段 ▲高温下慢步落山 ▲經過黄泥墩水塘返回大棠巴士總站完成旅程 九逕山 路線: 掃管芴>麥理浩徑10段>金沙坑>九逕山>大㰖涌水塘>黄泥墩水塘>楊家村>大棠 全程約7公里交通: 屯門站乘坐K53港鐡巴士(留意班次十分疏落) 掃管芴變電站落車 注意:⚠行麥理浩徑10段,可以唔上山徑,直接去到大㰖涌水塘邊走⚠天氣炎熱記得要帶多啲水,建議每人最小2公升⚠九逕山徑部分路線崎嶇難行,必需由經驗人仕帶領,出發前先下載行山apps地圖⚠愛護郊野清潔人人有責,自己垃圾自己帶走 文字/圖片來源 :小牛牛快樂行山郊遊相集by Chan Keung...
[駐場博客 @ 賞山樂山]三支香位於新界青衣南部,山勢三度起伏,狀如三支香燭而得名三支香。行到山頂可睇到貨櫃碼頭、青衣北部、及昂船洲一帶景色。三支香位於青衣島, 登山可以有幾個途徑:1.青康路往青康路遊樂場再上山 / 2.美景花園旁(細山) / 3.香港專業教育學院(青衣)旁。這次行程先由青康路出發,沿斜路上山,10分鐘後會見到洗手間,建議先在這裡去洗手間,因為之後便沒有洗手間了。而洗手間旁邊有兩個足球場,可以說是小編的中學回憶,每個星期六都上山踢足球,真佩服自己當時的恆心 ▲上山經過的配水庫 ▲在洗手間對面的樓梯上山(慢慢上吧) 慢慢沿樓梯上山,10分鐘左右,便會發現第一條標高柱(行程合共有三個),附近更找到一塊牌,牌上有一首詩,很喜歡其中兩句:「行山驅百病,吹水解千愁」 ▲行山驅百病,吹水解千愁 。 ▲轉右再轉右 ▲往青衣西路方向 ▲果實 ▲青衣及葵涌一帶 ▲又是一首詩 ▲慢長樓梯級 不要心急 慢慢來吧 ▲第二條標高柱 ▲第三條標高柱 ▲青衣有另一個名字,叫春花落,在下圖位置的景觀的確是一流。難度越大 景觀越佳 ▲見到這條樓梯,前面的景色盡入眼簾 ▲昂船洲和貨櫃碼頭一帶 ▲離開需要稍走回頭路,直到找到下圖的路口,這方向是通往青衣IVE ▲經過晨運園地後,便會見到青衣IVE和美景花園,但在面前的,是大概一場級樓梯,行完真的有回腳震。到達青衣IVE後,可沿馬路走去美景花園,然後搭車離開 青衣三支香 難度: **(5*為最難)需時: 3小時長度: 4公里交通:起點: 在青衣鐵路站乘搭249M或其他路線或小巴,在長青巴士總站落車終點:在美景花園乘搭88C小巴往葵芳鐵路站 路線參考:https://bit.ly/2L8qk7n 文字/圖片來源 :賞山樂山...
[駐場博客 @小牛牛快樂行山郊遊相集by Chan Keung]在網上傳聞,位於靈會山一帶,有一座寺院隱藏在山林中,而呢座寺院附近仲一條飛龍,神出鬼沒,充滿神秘感,聽聞好人都上山尋訪,但好多人都徒勞無功 ,所以今次决定查過究竟呢! 點搭車去靈會山? 東涌巴士總站坐11號或23號巴士,到咗石𤩹水塘站落車,進入宏貝道,再轉入鳯凰徑8段,沿一條藍色引水道一直走, 好快就見倒一條金屬通道,横過之後再沿山邊走,到達大浪坑入口處,有絲帶記號,入澗後,發現入口比一般石澗較為窄一啲,周邊植物長得十分茂盛,今天水源充沛,下源大小水潭水位已經十分高漲,如果唔想濕腳,可以穿梭兩旁山徑,不過呢度可能較少人行,所以樹藤雜草密佈,又有好多蜘蛛網,有時都要攀爬大石避開密集叢林,行咗一小段已經大汗疊細汗, 有不小石頭都佈滿苔蘚,必需小心慢行,讓小編可以慢慢欣賞沿途美景。雖然大浪坑澗度很短,但係琴上琴落,都消耗了不小體力喔! 離澗後接返羌山郊遊徑, 其實是靠靈會山腰横行,呢度可以俯瞰分流一帶,風景開掦優美。好快走到分岔路口~分水坳,呢度可以上𩆜會山頂,煎魚灣,分流,萬丈瀑,水澇漕多條路線, 今次選擇住萬丈瀑方向,進入鳯凰徑5段, 一直沿山徑走,行到L047標柱,靠右邊發現有一條隱徑,有絲帶引路,大約走多百多米之後,就能到達。 隱世飛龍活靈活現 今次行程主要想揾嘅飛龍, 呢條飛龍隱藏於深山之中, 想搵倒佢都要響網上面搜集資料做下功課, 當發現佢時真係好開心,仲可以近距離接觸, 雖然呢條飛龍已經建築咗一段時間,但係龍身上面嘅油漆依然十分光澤, 造型栩栩如生 ,據説呢條飛龍係慈興寺所建造的,所以一同隱藏於深山中, 拍完照後,小編貪快,揾咗另一條隱徑穿林離開,點知行咗一段好長嘅山路,發覺越離越唔對勁, 雜草樹藤頻生,棘手棘腳,路杯漸漸消失,山徑就越嚟越唔明顯,結果穿林變成爆林,爆咗一段漫長嘅樹藤,雜草,繩網陣嘅密林,超焗超熱好辛苦,最後費盡体力才能走番出郊遊徑,好彩無中暑咋,下次都係唔好貪快! 繼續再沿鳳凰徑5段 去到龍仔悟園,呢度以前小編都嚟過,記得當時呢條九曲橋冧咗, 日久失修所置掛! 但係今次呢度就完全唔同晒, 條橋已經起返好曬,四周圍都修復過晒! 湖水清澈,仲有靚靚倒影添!令人一見難忘喔! 影影吓發覺已經6點幾,速腳走人, 途中發現金蟬脫殼,行咗幾年山都係第一次見, 跟住好快落山去到大澳海濱長廊,剛剛日落magic time, 迷人美景,十分浪漫,真係大滿足,在大澳碼頭仲有2隻牛牛,同佢哋合照後完成旅程。 ▲石壁水塘起步,進入鳳凰徑8段,旁邊是一條藍色的引水道 ▲進入大浪坑入口開揚 ▲大浪坑下源水質清澈 ▲如果唔想濕腳,就要穿越叢林 ▲行走石澗必須步步為營小心滑倒 ▲大浪坑有多個大小水潭 ▲石澗兩旁長滿雜草樹藤 ▲充滿原始風味 ▲沿途只有小量絲帶作路標 ▲路旁小花 ▲行石澗有ㄧ定危險新人不宜 ▲小蜻蜓被蜘蛛網,痴住對翼,幫佢解開重獲自由. ▲離開澗道 ▲進入羌山郊遊徑 ▲到達分水坳接上鳳凰徑5段 ▲烈日當空切記做好防曬措施每人最少帶2至3公升水...