fbpx
香港人遊香港

元朗一日遊:【元朗周末一日遊路線提案!食/玩/買/打卡深度遊!】

元朗周末一日遊路線提案!食/玩/買/打卡深度遊!

近日元朗呢個名「一夜成名」,引起唔少人對元朗嘅興趣,小編當然打鐵趁熱,為大家介紹元朗有咩好食好玩好睇啦!呢個快閃元朗市區一日遊攻略鄰近輕鐵站,由水邊圍站玩到元朗總站,有文青打卡、大草坪野餐、觀賞稀有雀鳥、美食掃街、買老婆餅蛋捲做手信,同埋去埋人流最多嘅商場購物,絕對可以玩足成日。

準備及交通篇

▲黎元朗有咩要準備,小編就預備左list有呢5樣野:口罩-大家千奇唔好誤會,為既係預防流行性感冒,因為元朗人口密集,感染疾病風險特別高;充電器:保持手機有充足既電力;水/寶礦力:天時暑熱要飲多d水;雨傘/替換衣物:依2日會落雨又或者會好曬,帶定遮同替換衣物穩陣d!


▲交通方面:當日一早買定「屯門-南昌全日通」可以全日無限次乘搭西鐵、輕鐵,完全免卻拍八達通/買單程票既煩惱,完全唔留痕,出閘張飛不會收回,又可以紀念下呢次咁特別既旅程。

行程篇-水邊圍→ 豐年路→康樂路→大棠路→元朗西鐵站

1/景點:扮文青打卡 – 元朗公園百鳥塔/睇雀仔/野餐

你以為入元朗影文青相正係得南生圍?NoNoNo! 元朗有個好神聖嘅紅色建築物叫百鳥塔,一共有7層。塔內嘅藍白色漩渦樓梯更係IG打卡熱點,吸引咗唔少文青控慕名而來。驚出樣被抽後算賬,例如捉你冇帶passport 入嚟等等原因而唔想出樣嘅,可以高低炒影樓梯,手殘都可以扮下攝影專家哦。

▲成條樓梯嘅格局係呈六角形漩渦,無論你高炒低炒,或者正視角度影相,一樣影到文青靚相,擺上IG曬靚樣讚Like Like 。就算比狗仔隊知道,Po靚相係唔會犯法架!


▲上到最高層,仲可以一覽望曬成個元朗市,完左旅行仲可以同身邊人講,元朗唔係鄉下嚟!

百鳥塔除咗文青打卡,重點係嚟睇靚雀。底層嘅鳥舍面積佔有85平方米,四圍種好多樹木盆栽植物,吸引鳥群居住棲息。入去探訪佢哋,記得唔好用閃光燈影,要好似靜默遊行咁保持安靜睇佢哋


▲場內有30種雀鳥,總量超出百隻,特別品種當中有橙腹葉鵯、紅嘴相思。

近期香港人流行去野餐,一人或三五知己去親親青草地。元朗公園佔地7.5公頃,鄰近水邊圍輕鐵站,落車上天橋,直行就到。園區有塊大草坪,啱曬放假約埋朋友去野餐,食下老婆餅和蛋捲等等,夠曬貼地。


▲大草坪環境清幽,周圍樹林林立,好似置身係市區嘅世外桃園,玩火影跑一日仲得


▲唔鐘意走動咁多嘅,坐係大草地清唱聖詩,洗滌自己心靈同時讚美主。又或者玩下何家XX何家猜,重拾童年回憶


▲仲個白色鳥籠打卡位,好適合情侶嚟影

百鳥塔

地址:元朗公園北路
開放時間:08:00-12:00;13:00-18:00(4-9月)
08:00-12:00;13:00-17:30 (10-3月)
*逢星期三(公眾假期除外)係12:00-15:00暫停開放,進行清潔工作
*大年初一暫停開放


2/景點:元朗廣場及巴士總站一帶美食

元朗廣場

▲元朗廣場係Yoho開幕前唯一既大型商場,麻雀雖小,五臟俱全,裡面齊集左連鎖快餐店及食店,包括最近人氣急升既吉野家。

3/食好西:百味香串燒


▲元朗廣場鄰近小店林立,食店都有好多,呢間百味香串燒經常都好多人排隊,有雞同豬選擇。

▲不過呢間串燒店唔係成日都開,大家食唔食到睇下有冇緣喇!

百味香串燒專門店

地址:元朗青山道260號地下

4/買Game:喜利商場



▲喜利商場係差d被遺忘既商場,近期集中左好多Game鋪,小編見好多一二手既game都好抵買!

喜利商場

地址:元朗大馬路喜利商場1樓35號舖
電話:2479 2822
營業時間:10:00–21:00

5/買手信:真。元朗名物-真香蛋卷

元朗手信最出名必定係蛋卷,近日元朗蛋卷深受內地網民喜愛,有傳微博對「元朗蛋卷」字眼搜尋數量突破50萬,更係網上引起搶購熱潮。除咗大間老字號品牌嘅元朗榮華和恆香餅家之外,係鄰近康樂路輕鐵站有間係元朗隱世手信店,佢哋自家製嘅蛋卷更係即日製,路過都聞到好香嘅蛋香味,味道唔輸蝕過大品牌嘅老字號。


▲呢間中式餅店除咗有招牌蛋卷之外,仲有其他傳統糕點小食買,有元朗崩砂、馬仔、香蕉糕和蛋糕仔等等。


▲小編私心推介買椰茸鳳凰卷,即日新鮮製造,蛋皮好鬆脆,充斥濃郁蛋香味。


▲蛋卷都係必買手信,送比親友最佳手信

真香蛋卷

地址:元朗青山公路元朗段124號E地下

 

6/買老婆餅,訂月餅 – 元朗恆香老餅家


▲元朗恆香老婆餅更係元朗手信名物,每日新鮮出爐,外皮鬆香,內餡冬瓜蓉清甜,口感QQ,買返去一打返去同長輩一齊分享。


▲元朗恆香老餅家買手信之外,嚟緊中秋節食月餅,可以係到申請埋月餅會。唔鐘意食呢間月餅,可以行去隔離元朗榮華訂月餅又得

恆香老餅家

地址:元朗青山公路元朗段66號

7/食好西:又新街勁掃街

野餐仲唔夠飽嘅,搞個屬於自己嘅元朗美食遊又得。元朗除咗大排擋多、酒樓多、茶記多和麵店多之外,仲有人見人愛嘅街頭掃食。有小型夜市和又新街食街,食大大粒足料燒賣、茶飲、涼茶、香滑豆腐花、串燒和炸物等等。


▲又新街最出名地標係掃街頭美食


▲最值得一試係元朗燒賣皇后,大大粒又足料,入面有冬菇、豬肉和魚肉手打製而成


▲燒賣有蒸之外,串串燒燒賣都有

元朗燒賣皇后

地址:元朗阜財街14號宏豐大廈地下11B及11C號舖


▲又新街食串皇係唔少元朗人當宵夜之一,串燒種類非常多,當中最受歡迎一定係燒雞皮,經過老闆用沙嗲油和味粉醃後,再將皮下脂肪全都刷出,食落竟然可以一D都唔膩

串皇

地址:元朗阜財街2號地下11D鋪


▲除咗荃灣有亞玉豆腐花,元朗都有分店,豆腐花豆味濃,夏天叫碗凍豆腐花確係消暑,糖水同砂糖自己落,仲有薑汁揀,唔少人經過又新街都會叫一碗企係街嚟食,約埋一班人一齊舉起碗豆腐花Cheers! 紀念一齊走過元朗。

亞玉豆腐花(元朗分店)

地址:元朗阜財街2號宏豐大廈地下12號舖

7/睇好戲歷史悠久戲院睇戲+打卡


▲元朗戲院於 1961 年開幕,近年完成翻新工程,成為一間仿懷舊打卡熱點,睇唔睇戲都好,買返張戲飛紀念下都好!


▲元朗戲院內竟然有《誇世代》既榜重機!

元朗戲院

地址:元朗元朗炮仗坊8號
電話:2476 2432

8/yoho mall入元朗站散水/折返到朗屏站


▲黎到接釀元朗西鐵站,可以經yoho mall入元朗站散水,但由於yoho mall為新鴻基集團管理,唔想入商場既話,可以經鄰近又新街既鳳翔路天橋,經朗業街行返去朗屏站,不過注意此路線會經過南邊圍、西邊圍,村民講過只要係和平行路,佢地係唔會有任何行動既,比多個option你地自己到時選擇。

注意事項

⚠此行程請注意自身安全,照顧同行所有人
⚠此行程不建議行入圍村/村屋範圍,以免發生誤會
⚠影相打卡,請以影風景為主切勿騷擾其他道路使用者

—————————————-

文字來源:香港人遊香港/圖片來源:香港人遊香港、互聯網、@junember、@vanvan.siu、@kfchow01、@yinyin_food_diary、@shelshelistic、@matcha.hts、@feedthetang 、 @nicolechm、、@joyceau_mlin、@michael.chim、@yukling、@siujiwalker、@danielchenkt
Tagged with:    

Follow us

合作查詢

歡迎與我們聯絡, 查詢合作