黃大仙甜品:【食得又睇得!黃大仙7種口味熔岩心太軟!】-想甜嚐甜

呢間甜品鋪除左黃大仙有分店之外,西環都開左分店! 黃大仙分店則開係住宅區入面,呢間甜品相當有驚喜,甜品無論外型、味道CP值都好高,真係食得又睇得!而且款式亦都幾特別,有別於其他西式甜品鋪!啲甜品擺設好似件藝術品咁,每碟都係廚師用心擺放過!鋪頭唔係好大,得十幾個位,裝潢風格亦好文青。另外,呢度既主打甜品係熔岩心太軟,出面啲甜品鋪一般只有朱古力味,但呢裡就有7種口味比客人揀,例如:黑朱古力、榛子、紫薯、榴槤、華田、抹茶及玫瑰荔枝。呢度有最低消費,每位客人最少要叫一客甜品。

▲法蘭西焦糖燉蛋($29):焦糖燉蛋個面頭啲焦糖燒到好脆好香,而且蛋味好夠。

▲宇治抹茶流心心太軟配雪糕($40):心太軟外層微脆,內裡鬆軟,流心出黎啲抹茶醬好濃茶味,一苦一甜唔錯。

▲焦糖香蕉卜卜脆窩夫格餅配雪糕($48): 雪糕既口味會成日轉,未必次次一樣口味,甜筒好脆,窩夫配上焦糖醬食唔算好甜,夾埋雪糕食個口感又凍又熱,好正!

▲紫甘薯心心太軟配雪糕($42): 心太軟頂上會有粒雪米糍喺心太軟上面,切開個心太軟會有紫薯蓉好似熔岩咁流出黎,同埋有好多粒紫薯粒作配料。

▲榴心嚐甜心太軟配雪糕($48):心太軟上面鋪滿榴槤肉,頂上仲會有一粒小泡芙放係上面,未食已經聞到濃濃的榴槤味。

▲焦糖脆脆奶凍($29):奶凍相對地無咁出色,不過食落去都好滑,重奶味,不過太多焦糖醬好甜。

想甜嚐甜

地址:黃大仙蒲崗村道73號富佑大廈地舖
營業時間: 星期一至五 15:00-00:00 / 星期六至日 13:00-00:00
電話:39564744

文字來源:香港人.遊香港/圖片來源:@hkueats、@eatgoodwest18、@pencil510、@veronicawywong、@foodntravelforlife