深水埗打卡:【美荷樓開放日又到啦!今次用經典紅白藍做主題!】- 美荷冰室

黎緊既5月25同26號係咩日子?就係一年一度既美荷樓開放日!今年既開放日用左經典既「紅白藍」膠袋元素做主題,現場有唔少裝飾同設計都係圍繞住「紅白藍」嫁,帶出番香港人不屈不撓同自強不息既本土精神!最重要係開放日大部分活動都係唔洗錢嫁,除左有紅白藍項鍊手作班外,當日仲會有導賞團,帶大家遊覽下美荷樓,大家仲可以順便聽下美荷樓活化既歷史,例如以前徙置大廈既建築特色,所以真係好岩同另一半或者一家大細趁住今個星期六日出去深水埗行下嫁,行到肚餓仲可以去開放日第一日就會開幕既「美荷冰室」醫下肚仔,因為佢地仲會有埋限定既「紅白藍」美食,未去過美荷樓既你地記住把握今次既機會去參觀下啦!

▲集齊印章就可以換領紅白藍紋身貼紙同襟章,今次既設計真係好靚!

▲現場仲會有紅白藍祝願牆,大家可以寫低願望,一定會有願望成真既一日。

▲就咁睇依杯奶茶好似冇咩特別,但其實係由美荷冰室「金茶王」即場調配既正宗港式奶茶!

▲炸墨魚餅配蛋黃醬($38):墨魚餅咬落啖啖肉,點埋蛋黃醬真係好好食!

▲水牛城雞翼($58):雞翼炸得有少少油,但係幾大隻。

▲澳洲和牛竹炭漢堡($108):漢堡中間夾大大舊牛肉,一個口都塞唔曬!

▲松露薯條配蛋黃醬($48):薯條一上菜果陣已經聞到好香,配埋蛋黃醬真係好正!小編覺得松露薯條最抵食!

▲溫泉蛋卡邦尼意粉($68):意粉咬落唔乾身,溫泉蛋同醬汁好夾!

YHA美荷樓

日期:2019年5月25及26日(星期六、日)
時間:上午10時至下午5時
地址:九龍深水埗巴域街70號石硤尾邨41座(港鐵深水埗站D2出口)

文字來源:香港人.遊香港/圖片來源:香港人.遊香港