九龍城串燒:【曼谷夜市口味串燒!必食混醬雞全翼+爽口雞腎】- 金泰沙冰

九龍城又有小泰國之稱,呢間店有2間分店,一間叫金泰燒烤,係有得坐得食同有多款泰式美食既﹐而呢間名叫沙冰既鋪頭又唔係真係有沙冰賣,只係賣串燒,串燒既醬汁完全係泰式風味!每串咁惹味串燒都係12-15蚊,相當抵食,行過買返幾串做宵夜都唔錯!網友最推介佢地既雞全翼!雞全翼醃得好入味,咬開雞皮,雞肉依然嫩滑多汁!醬汁有兩款,一款係濃郁沙嗲花生醬,味道唔算重,食得辣一定要揀混醬,酸辣汁蒜味葱味都香濃,後勁辣味辣得刺激!

▲金泰沙冰係間典型既串燒店,串燒擺放好整齊。除左豬、牛、雞肉串燒之外 , 都有好多內臟既選擇如雞心、雞腎、雞肝,還有泰國腸、稔肉、魚餅。

▲雞全翼($15)都係大大隻! 淋上泰酸辣汁,入口帶酸而有強勁蒜香 。

▲酸豬肉串燒($15)、雞腎串燒($12)、蝦餅串燒($13)、墨魚丸串燒($13):酸豬肉係香港好少有得食!將豬肉打碎,再放酸汁成豬肉球 ,雞腎串燒爽口十足;墨魚丸同蝦餅串燒都好有口感彈牙

▲豬頸肉串燒,先用香茅、檸檬汁、蒜頭、魚露等預先醃過,燒完之後外焦內嫩而多汁。

▲醬汁有兩款,其中沙嗲醬冇咁辣,口感帶微甜椰香;  另外一款酸辣汁以魚露加入香蔥、檸檬葉、青檸汁 等 , 酸辣口感配內臟同肉類都好香口!

金泰沙冰

地址:九龍城衙前圍道21號A2舖

文字來源:香港人.遊香港/圖片來源:1o1nique、@sharonlovefood、@b9b0b9b0、@eat_ms_eats、@lai_edward