fbpx
香港人遊香港

#香港遊:【 赤柱無敵海景打卡小旅行!】- 舂坎角炮台+泗益西多士+舊赤柱警署+赤柱郵政局+馬坑公園

#香港遊 赤柱無敵海景打卡小旅行!

之前小編睇大台既皇牌節目《東張西望》,其中有個專題講到赤柱人流大不如前、風光不再,商店亦見十室九空。人流少左正好遠離市區塵囂,重新出發以另一角度認識赤柱呢個地方。赤柱係香港旅遊發展局廿多年前既重點旅遊名勝,赤柱大街更係遊客買手信好地方,叱吒一時既悠閒歐陸小鎮。不過呢d香港人應該不大感興趣,小編今日為大家規劃左海天一色既觀海打卡一日遊路線,其中包括不為人知既打卡好去處,相框碧海藍天做背景,包你重新愛上赤柱呢個小鎮。

第一站:舂坎角炮台

呢個淡綠色既英軍舂坎角二號炮床連和探照燈座遺址建於1930年代,無敵望海 右設3個BBQ場。好多人都會以純白瞭望台望海同影相打卡,有好多tvb劇集同電影都係呢度取景,純白圓形罩加上藍天白雲,相當instagramable!


▲圓形舂坎角炮台好似個無敵海景露台咁,好多人都會係呢度打卡影相


▲圓形舂坎角炮台背後好似座純潔既教堂。


▲二號炮台外有梯級向下前往探照燈座,係另一個打卡位,天氣好既可以睇到香港境外擔杆列島

舂坎角交通:
城巴-中環站搭往赤柱市集方向6x 舂坎角海灘站下車
專線小巴-柴灣站搭往16A 舂磡角慈氏護養院方向 總站下車

第二站:赤柱名物免加糖西多士

搭返巴士6x,就可以由舂坎角到赤柱!黎到赤柱緊係先醫下個肚,赤柱呢間茶檔開業多年,十居其九食客都要對物西多士朝聖,店面講明西多士唔需要加糖漿!原來係佢地夾左咖央餡料,唔會太甜。外面亦做到蛋香味香濃、麵包十分鬆軟,總之無過多複雜食材,簡單先係美味。


▲咖央西多士($24)麵包超級鬆軟,麵包夾咖央及牛油,沾上滿滿蛋漿,炸成金黃色。西多士預先切開了四份,上面牛油雖然邪惡但有畫龍點睛之效。


▲西多士製作需時,加上茶檔唔係日日開,無冷氣供應底下,客如輪轉,唔少人就轉戰外賣,對住南中國海一片大海食呢個神級西多,有另一番寫意。


▲泗益已有數十年歷史,大牌檔格局,位置隱蔽,但不少識食之人仍然慕西多士之名而來。

泗益
地址 :赤柱市場道2號
電話:28130507
逢星期二休息
營業時間:06:00 – 14:00

第三站:訪尋舊英倫味道-舊赤柱警署+赤柱郵政局

舊赤柱警署係香港現存有最悠久歷史既警察建築物,兩層高磚木建築採用英式建築風格,其中也使用了大量石材。之後一直都係惠康租用,近年先由百佳取代,係去沙灘玩前必到既地方。赤柱郵政局就係舊赤柱警署附近,係香港130間營運的郵局之中是最古老一所。地方細細並冇現代化裝飾,亦欠缺寬敞的環境,卻有獨一無二鐵窗花。


▲舊赤柱警署這係1859年落成,當年係香港6座最早建立警署之一。


▲舊赤柱警署以往一直由惠康租用,近年由百佳取代。


▲赤柱郵政局有70年歷史,當時主要服務對象是赤柱的軍人及漁村村民,2013年進行左3個月修繕工程,目的係維持郵政局本貌。


▲上面刻有英皇佐治六世的標記「GR」,正門牆上更有人手操作的銅製郵票售賣機。自香港回歸中國後,傳統英式紅郵箱📮已所剩無幾了。

第四站:赤柱大街+卜公碼頭

赤柱大街商店都係手信店、藝術店,好似唔多岩香港人行,打卡位主要集中係赤柱大街正中既黃色餐廳。以前係以水藍色外觀而聞名,後來傳聞店主因「風水」關係,改成鮮黃色!而卜公碼頭係原位於香港中環一個渡輪碼頭,依家有定期街渡服務來往香港仔、蒲台島


▲赤柱大街上The Boathouse鮮黃色好sharp醒,引來唔少旅客打卡!


▲卜公碼頭線條均整構圖點影都靚!


▲由卜公碼頭望返赤柱另一邊既民宅

第五站:赤柱馬坑公園

又到下午海景路線喇!赤柱馬坑公園連住馬坑邨小山丘,景觀一絕!呢度只有5公頃大,勝在可以沿梯爬坡,一邊靜靜地觀景!公園東邊有個小沙灘,而上面就有個漁民參拜北帝古廟。


▲前往赤柱馬坑公園入口


▲前往赤柱馬坑公園需行唔少暗斜樓梯,需要保留一定體力。


▲東邊有一個私人沙灘,不過呢度唔岩遊水。


▲赤柱北帝廟建於清朝嘉慶十年,係當年赤柱的潮藉漁民所倡建,極細小廟宇

第六站:沿海邊行到赤柱聖士提反灣南碼頭前行觀賞日落

沿路會經過返卜公碼頭,再稍為遠離赤柱市集一d,就到有赤柱聖士提反灣小碼頭,該處人少清靜,亦係睇日落既好地方!赤柱聖士提反灣係赤柱後灘的對面。因附近聖士提反書院和其附屬小學而得此名,小碼頭有唔少人係到垂釣,同有情侶係到打卡!


▲行完馬坑公園可以沿海邊路聖士提反灣南碼頭,一路行一路欣賞咁靚風景!


▲到左路聖士提反灣南碼頭,有好多垂釣既朋友,構圖甚美!

完成左海景線小旅行之後,可以直接搭車返市區,或者留係赤柱大街酒吧街食埋個dinner先,赤柱大街或美利都有好多間食店選擇!

赤柱海景小旅行

離開赤柱交通:
1. 由聖士提反灣南碼頭直接離開,於「聖士提反書院附屬小學」乘坐巴士14號到西灣河站
2. 由赤柱大街/赤柱廣場離開,於「赤柱廣場」乘坐巴士到260/14/中環 (交易廣場)或 巴士973到尖沙咀東(麼地道)

路線參考:

文字來源:香港人遊香港/圖片來源:@shannamok、@wongeatfood、@vinswan、@worldintummy、@winky046、@mrscefat、@c29h4k633、@poohpooh_kingsley、@sabatdd、@a_rami_ya、@menghengmo、@lam_simon、@willhuang866、@ames_lowther、@warabimochi28、@ltanghk13、@perry228、@saxon23

Tagged with:     ,

Follow us

合作查詢

歡迎與我們聯絡, 查詢合作