【行澗路線:馬大石澗之綠寶石!】

[駐場博客小牛牛快樂行山郊遊相集by Chan Keung]原本計劃半走馬大石澗,保留體力,再去埋鹿巢石林,點知開始進入石林時,行錯咗山徑,呢個山徑入口已經密麻麻,好艱苦至到咗石林入口,點知呢度啲石舆石之間距離好濶,坑位又深,避免义錯脚跌落坑底,鹿巢石林就唯有擇日重賽啦!

今次為大家介紹馬大石澗(半走), 再走鹿巢石林。坐43X到富安花園巴士總站, 落車後進入大水坑邨, 沿大水坑北街尾,從隱蔽小徑, 進入馬大石澗。

馬大石澗係香港九大石澗其中一條, 㵎道開揚,平緩易行, 途中有巨石可供攀爬,亦有大潭小瀑,水質尚算清澈,如果唔想濕脚,可以經左右兩旁山徑走過,穿梭巨石之間,風景優美,行咗大約2公里左右,經過大水壩完成第一段,從旁邊石級可跨越 ,之後再入澗道,水流較急喘,澗道亦開始斜上, 好快就到達英雄瀑,  如果唔想行再石澗,可以經左手邊山徑返回馬鞍山村, 亦可以繼續直行澗道,不過小編今次經水壩旁邊山徑,經過鹿巢坳,行去石壟仔古道,沿古道直上打算到訪好出名嘅大石林~鹿巢石林,點知行咗去叧一個較小山友慣常嘅入口, 披荊斬棘經過一段密林,卒之去到鹿巢石林底部入口, 入到去發覺同小編上次去過嘅入口有好大分別,因為呢度石與石之間十分遼闊,好易唔小心差錯腳跌落去 坑底 ,因為每條石坑都數十呎高, 隨時會叉錯腳跌落去,後果不堪設想,所以唯有打道回府,沿路折返,返回梅子林路,再返回大水坑,完成旅程。而鹿巢石林就留待下次再到訪,到時再為大家詳細介紹一吓。

注意事項:
⚠ 石澗濕滑,有一定危險性,新手不宜
⚠ 石澗非一般山徑,建議由經驗人仕帶領,陪同
⚠ 注意鹿巢石林有幾個入口, 有部分石與石之間,十分瞭闊,要十分小心
⚠ 保持郊野清潔人人有責,自己垃圾自己帶走己帶走

▲由大水坑邨起步經過大水坑北街隱蔽小徑入馬大石澗

▲叠石自娛ㄧ返

▲未到雨季水流比較少從大石上攀爬不會太滑澗道亦比較易行

▲其中一個大潭水質清澈清晰透綠

▲馬大石澗都攀石愛好者常到之處

▲馬大石澗有多塊巨石

▲巨型蛙蛙魚石

▲如果唔想濕腳可以從旁邊小石洞穿過進入山徑

▲到達大水壩完成第ㄧ段行程

▲穿梭大石之間必須要小心

▲石澗兩旁樹藤比較茂密

▲從大水壩旁邊-經過石級進入馬大石澗第二段-這裏水流較喘急-澗道亦較為傾斜

▲從鹿巢坳進入石壟仔古道

▲由於走錯行徑被逼爆上密林

▲鹿巢石林有多個入口-底部入口較少人選擇所以入口十分茂密

▲攀上石林必需佩戴手套

▲鹿巢石林其中部分石坑相當寬闊必須小心經過

馬大石澗

路線: 大水坑村>馬大石澗>石壟仔古道>鹿巢石林>梅子林路>大水坑 全程11.5公里, 約5小時
路線圖參考:https://www.trailwatch.hk/?t=activities&aid=261167