呢排氣温適中,濕度低,乾爽又涼快,天氣真係好到不得了,唔行山真係對唔住自己今次介紹一條短線,唔太困難嘅路線比大家~青衣 三支香。
首先由青康路轉入青芊街直上,轉灣會見倒一個配水庫,旁邊有條上石級,就係山徑入口,一直上,山徑大部份係石屎路,唔難行,經過幾個山墳,一直上石級,到達第一站青康亭,再走不遠到達第一支香~北峰。休息一陣繼續沿山徑行,路旁有十數棵大樹仍未搬走,有一棵大樹更横向擋住山徑,需要捐過佢,突然見倒樹上有位老伯正在鋸樹,原來佢想鋸走枯枝,方便行山人仕,真有心。繼續上路,到達第二支香~中峰, 打卡後,見倒沿途有啲路牌,石畫,詩詞,小佛像…原來係一些晨運客為風景命名,提詩,説明介紹,並加上一些石畫,令遊人行山時可更深入了解山中故事呢!
好快就上到三支香山頂,經過標高柱再直行,開始微微斜落山,風景開掦,右面是南灣角,對岸是港島,下面是大油庫, 更可以清楚望到昂船洲大橋,相當宏偉,再行落啲靠左面有一座石台,景觀開掦, 整個貨櫃碼頭飽覽無遺, 原來香港貨運碼頭 面積真係好大, 從高空望落去,真係有大地在我腳下嘅感覺喔!
繼續往右手面有一條山路需要穿過小叢林, 落山坡一小段,有一嚿巨石,山友幚佢起名為~英雄石,係好多山友打卡熱點,不過爬上去必需小心!打完卡後,太陽開始落山,可以沿路折返, 到達中鋒位置靠右手邊有一條平坦嘅山徑,落一小段之後,就會見倒一條名為仟步天梯嘅樓梯,梯級十分筆直,踏進要特別小心,落咗大約700多级之後,就到底部,就係香港專業教育學院,完成今次旅程。
▲配水庫旁邊,樓梯就是入口
▲沿山徑直上旁邊有好多墳墓
▲好快就到達第一支香-北峰
▲遇到老伯他正在鉅走枯枝方便行山人士經過真有心
▲自然的破壞威力真係不可輕視
▲遠望西草灣方向
▲晨運客為美景提詩並介紹景點
▲俯瞰青衣大油庫
▲昂船洲大橋十分宏偉
▲一路沿山徑落山坡靠左手邊有一大石台
▲大石台可以俯瞰整個貨運碼頭原來面積相當之大
▲景觀開揚十分優美
▲好多行山人士都慕名而來
▲青衣貨櫃碼頭
▲攀上英雄石
▲英雄石是山友打卡熱點
▲風景優美
▲有部分山友坐在石上-等待拍攝日落時刻
▲沿路折返
▲有部分山友坐在石上-等待拍攝日落時刻
▲到了日落時分
▲沿仟步天梯折返
注意事項:
⚠ 愛護郊野清潔人人有責,自己垃圾自己帶走
⚠ 帶風高物燥切勿在郊外吸煙,容易引起山火,後果嚴重
三支香
路線: 青康路>青康亭>細山>三支香>仟步天梯 全程5公里 需時2.5小時
路線地圖參考:https://bit.ly/2SGx7tl