香港好去處:【大澳虎山超靚景!眺望港珠澳大橋+南中國海!】

[駐場博客: 小牛牛快樂行山郊遊相集by Chan Keung]今次介紹由石門甲落漕溪,穿梭石澗,充滿原始風味,風景美不勝收,出澗後經法門古道到達昂坪,再坐巴士去大澳上虎山,從4條中華白海豚後面,行隱徑落海邊,尋找將軍石,相當吃力。

响東涌嘆完個靚早餐之後,坐大嶼山巴士34號入石門甲(留意班次比較疏落),廿多分鐘就到達石門甲總站,落車正式起步, 沿馬路直上,再轉入山徑,呢條路叫做地塘仔郊遊徑,又名法門古道,行咗無耐,靠右手面有絲帶引路,横降落小叢林進入漕溪石澗,入口已滿樹藤枯枝,未落到底已聽到流水聲音,卒之到達石澗,有大潭小潭,仲有好多巨石,當日水質清澈,不過小編知道上游仲有多間寺廟,住宅,農地…所以經驗話俾小編知,最好唔好接觸倒呢啲水,某程度上有一定嘅染污呢! 今日水流唔係太急,水位唔高,可以輕鬆上石面一級一級跳上,除咗有幾個大潭需要在山澗兩旁山徑繞過之外,其餘大部份都可從大石上面走過,可能呢條石澗比較小人行,所以絲帶標記都比較小,不過漕溪無支流,所以一直攀上就係,同埋比較短,只有1公里多啲就行完,出澗後繼續接返法門古道上, 左右兩旁有好多間大大小小嘅寺廟,好快就到達東山法門,其實係一道玄關,呢度同時係昂坪奇趣徑,又係彌勒山入口,繼續一直行,就到達昂坪廣場,經過大佛,前面巴士站,坐21號巴士去大澳,時間尚早,首先試吓當地街頭美食先,食飽之後,經過大澳街市,沿石仔埗街一直行,到達大澳文物洒店,本來打算沿洒店後面山徑去虎山参觀,點知有告示牌~不准進入。唯有調頭走返落石仔埗街,再去香港少林武術文化中心,靠左邊有條山徑行上去虎山觀景台。呢條山徑附近有幾個墓穴,條路巳鋪上大石磚,好易行,好快就到達,首先見到係四條中華白海豚大型雕塑,顏色漂亮,維肖維妙,的確係呢度嘅靚靚地標, 四條海豚後面有一條小隱徑,沿小徑走,初段唔困難,行到近海岸有絲帶引路,可以下降落海邊,不過呢段斜坡泥路好鬆散,石頭又鬆脫,需要拉住左右樹藤緩緩下降,落到海邊係一個比較斜嘅石灘,跟據地圖顯示,可以從呢度綑邊到將軍石,距離不遠,可是此段路比較崎嶇,危險,小編决定放棄,雖然有啲遺憾,但係可以欣賞倒美麗海邊,都值得一遊。好辛苦爬返上嚟,經過四條海豚返去虎山觀景台,呢度條路左右兩邊欄杆,塗上紅色好鮮艷,沿山脊而建,遠睇好似一條小長城,氣勢磅礡,好壯觀,不愧為打卡熱點。行到尾段小涼亭,仲有一望遠鏡,可以 窺探一下港珠澳大橋添。响呢度欣賞日落真係一流。打完卡後可以沿路折返,或者繼續向前面小山徑走,不過呢段路比較斜,碎石鬆泥,要慢慢跣住落,旁邊有繩可以拉住落,呢段路風景開掦,可以欣賞象山和獅山,左面仲有港珠澳大橋,配合海灣,不失為一個大景,好似一幅油畫。跣咗十五分鐘左右落到地面,靠右邊就是寶珠潭,不時有大小魚隻跳上水面,睇完魚仔跳之後穿過村莊返回大澳巴士總站完成旅程。

▲由石門甲起步經地塘仔郊遊徑直上ㄧ小段之後右轉入澗

▲漕溪内有多塊巨石可供攀爬

▲有多個大小水潭,風景優美

▲如果唔想濕脚,可以從左右山徑跨過

▲攀爬石澗有一定危險性,前住必須量力而為

▲石澗旁小徑佈满樹藤

▲顛茄,有毒

▲蔥蓮,又名玉簾

▲漕溪没有支流,ㄧ直住上方向行就可達上游出澗,整條石澗不太長,好快就行完

▲出澗後經法門古道到達昂坪廣埸

▲乘搭巴士到達大澳,石仔埗街往虎山出發

▲經香港少林寺武術文化中心旁邊山徑上虎山

▲到達虎山觀景台地標,四條中華白海豚雕塑

▲從中華白海豚雕塑後面有ㄧ條隱徑,可穿過小樹林到達海邊石灘

▲海邊岩石路徑比較傾斜和崎嶇,每ㄧ小段都要小心前進

▲巧遇美麗夕陽,令人醉了

▲本來打算綑邊尋找將軍石,可惜發現此路段比較危險,決定放棄

▲返回虎山觀景台漫步_小長城

▲虎山觀景台是欣賞夕陽美景好去處

▲可以從另一山徑落山

▲因為遠眺外型有點像長城,所以又被稱為_小長城_

▲此山徑比崎嶇,散沙碎石多,前住必須小心,風景開掦,可以飽覽象山,獅山和寶珠潭

路線: 石門甲>漕溪>法門古道>東山法門>昂坪廣埸 共5公里……
大澳>虎山觀景台>寳珠潭大澳 共3公里
交通: 東涌乘坐34號巴士到達石門甲,昂坪乘坐21號巴士入大澳

注意事項:
⚠️如果沒有行澗經驗可全程改行法門古道直接抵達昂坪
⚠️探索將軍石可由大澳文物酒店綑邊到達(注意有一定危險性)
⚠️愛護郊野清潔人人有責,自己垃圾自己帶走

文字/圖片來源 :小牛牛快樂行山郊遊相集by Chan Keung