【好有愛❤少女心粉紅cafe😍每一角落都係打卡位!】

#香港都有

粉紅café呢家野韓國又有,深圳廣州既都有,香港上年都開左間位於長沙灣既少女心粉紅café。一入鋪頭完全被粉紅色包圍,一枱一櫈、粉紅霓虹燈字句,都係打卡靚位,約埋閏蜜去就最岩!呢度係由兩姊妹一齊用成副心機經營,佢地由購入食材、添置拍照道具場景、煮野食,都親力親為,而且仲會不定期推出唔同既menu,保持新鮮感!

▲成個氛圍都係pink pink擺設裝置,襯托乾花及氣球,少女心十足!而d乾花可以比客人拎黎影相,不過記得用完要放返原位呀!

▲2位店主都悉心佈置cafe,不時都置入新既陳設,比大家影相打卡。

▲Magical(藍碟花)($52) : 飲料顏色相當夢幻絢爛,好似神奇既魔法藥水咁。

▲Magical(藍碟花)($52) : 將原來藍色既魔法藥水倒入相信係檸檬梳打既飲料度,碟豆花遇酸會變成紫色,好似施行左魔法咁!

▲Dreaming($58) : 其實係紫薯草莓牛奶,粉紅同淡紫色既漸層效果足以令人心心眼!上面既Cream好似輕飄飄既雲朵,加上一片彩虹軟糖,夢幻感十足!

▲香煎雞翼加上清新柚子醬,放入粉紅色紅鶴碟,賣相非常靚!柚子醬同雞翼都係小編最愛,雞翼沾滿柚子蜜,入口甜甜酸酸,外煎至脆香,內裡肉質嫩滑。

▲大人都食得嘅童真餐($78) : 炒滑蛋、豬柳扒、麥樂雞、牛奶早餐脆脆,真係好有童時回憶!小編記得細細個趕頭趕命咁食個呢類早餐就趕住返學,果時生活無憂無慮,依家人大左反而可以慢慢享受,但係生活就多煩惱,人生就係咁諷刺。

▲全日早餐C($98) : 牛油果、黑松露炒滑蛋、德國腸、煙三文魚、焗豆、薯餅同牛角包。

▲全日早餐C($98) : 原先小編對呢個看似平凡既All Day Breakfast冇咩期望,點知充滿驚喜!Superfood牛油果有半個之多,牛油果生熟度岩岩好,黑松露炒蛋直頭係「黑馬」跑出,呢度出邊餐廳唔同,炒蛋唔會使用蛋漿,係逐蛋炒,拌入黑松露既滑蛋整得好滑,食落層次感十足。驚喜既野緊係一浪接一浪,小編們影左咁耐相,一開始就食個薯餅,不禁異口同聲地講個薯餅仲熱既,真係令人好感動!

▲影返張大合照先!店主完全唔介意食客任何角度影相,道具全部都任意借用,真係好sweet!

▲呢邊清新既薄荷綠彷彿又係另一種風格!垂吊既乾花、網紅必到既霓虹燈牆、仲有充滿夢幻色彩既獨角獸裝飾,都係超少女心系列!

▲呢個就係日間天然光既模樣。

▲所有霓虹燈文字都係店主親自創作,不過呢個打卡位係日頭影人像就最靚!

▲獨角獸蛋糕($52) : 食到飽飽,小編們糾結要唔要甜品,發現個充滿童話色彩既蛋糕真係非常可愛!口味士多啤梨蜂蜜jelly,蛋糕非常搭調。外層主要係打至輕身既mousse,表面仲有cream及綿花糖做裝飾,中間有口感清甜蜂蜜啫喱🍯,令人會有「追食」既感覺,兩個人share唔駛三兩啖就食哂。

▲小編最初以為呢間粉紅cafe得個樣,今次一訪完全感受到佢地對cafe既熱誠,由食物到佈置都一絲不苟,店主仲會花好多時間同d客人熟絡,真係唔簡單!

花說 (已結業)

地址:長沙灣福榮街565號地下
電話:2886 9110
營業:12:00-22:30 (星期二休息)

文字來源:香港人.遊香港/圖片來源:香港人.遊香港