遊台灣:【文青必遊赤峰街!必逛日系文創/精品cafe小店!】- 赤峰街

位於捷運「中山站」同「雙連站」之間既赤峰街,本身係舊區,近日卻成為文青至愛後花園,因為短短一條街就進駐左多間特色小店,日系文創、精品咖啡店、蛋糕店、早午餐店、衣服飾品等等,令呢條街新舊小店交錯,別有一番味道。今次就同大家介紹幾間高質小店,趁著佢而家岩岩興起,快d約埋閨蜜逐間去打卡chill下,扮下文青,過番個悠閒既下晝啦!

小日子 – 赤峰店 

小日子本身係由獨立雜誌起家,後來發展到實體店,賣雜誌、賣咖啡、賣文創小物、更賣生活品質同品味!由門口位就走純白簡約風,配以原木色調,頗有日系味道!裡面賣既周邊文創商品、服飾等等都走簡約文青風,設計細膩又可愛,更有同多位台灣本地設計師合作,致力推動台灣本土文化,將日常生活帶入設計中!

▲位於赤峰街既小日子,門口位以純白色設計,簡約又有文青風格,係打卡熱點!

▲小日子所販賣既文創商品種類多不勝數,而且非常支持本土創作文化產業,係度可以搵到好多台灣本地設計師既作品,精緻又有療癒感!

▲呢度同時提供精品咖啡、特色飲品、MOJITO等等,令人可以係繁忙生活中停下來,好好享受一杯靜靜既時光!

小日子 – 赤峰店

地址:台北市大同區赤峰街22號
電話:02 2366 0294
時間:11:00~21:00

心地日常

另外一間係街角既小店,同樣以純白色外牆吸引途人目光,望落去似乎又係一間走簡約風既生活雜貨同文青小食,但其實內有乾坤!穿前面賣文創小品區,隱藏係小店最裡面既其實係賣冰品的!呢度既招牌只有兩款:桂花蜜酒釀雪花冰(凍)、桂花酒釀蛋甜湯(熱)。酒釀係每日限量手工製作的,蒸熟左糥米再加入酒麴發酵而成,帶有淡淡酒香,無論加入雪花冰定熱既蛋甜湯都好夾!用桂花酒釀雪花冰真係第一次見,雪花冰本身有淡淡奶香味,加埋桂花蜜既香甜非常天然,食落非常清甜!天氣凍既時候可以選熱既蛋甜湯,同樣有特色!

▲位於街角既心地日常,純白簡約外牆甚有文青風格,但除左賣文創商品,裡面其實係賣特別冰品的!

▲招牌「桂花蜜酒釀雪花冰」味道天然清新,淡淡桂花蜜夠清甜,再加入左手工製作既酒釀丸子同糯米,口感豐富!

▲冬天既話可能選擇「桂花酒釀蛋甜湯」,酒釀丸子由浸泡到蒸煮到發酵過程,製作過程繁複但真材實料,再加埋糯米口感軟糯,冬天飲番碗真係暖身魰滿足!

▲除左招牌,小店都會研及新品,好似呢款「三種料白玉黑芝麻雪花冰」都夠晒足料!仲有抹茶紅豆雪花冰、楊枝甘露酒釀雪花冰等,隨著季節不同研發時不同款式,相當有心思!

心地日常

地址:台北市大同區赤峰街71巷2號1樓
電話:02 2558 8695
營業時間:12:00-19:30(逢週一休息)

桔梗燉飯

大家對個名係米有d熟?無錯,佢就係前排黎香港開左間「桔梗」而成為超HIT打卡CAFE既始祖!「桔梗」發跡於台灣,本身叭係賣三文治,後來仲開埋餐廳添,主力做燉飯!多款燉飯創意十足味道又出奇地夾,例如羅勒堅果奶油鮭魚、松露威士忌藍莓。亦有招牌款例如花雕奶油雞、蕃茄松板豬等等,燉飯煮得濕潤又入味,仲可以加錢升級做套餐,有埋麵包、沙律同招牌奶昔!而餐廳內部都雅緻溫馨,用左好多乾花點綴,無論每個角落定食物都岩晒打卡,最岩行完赤峰街黎食番個滿足既晚餐!

▲小店門口簡潔明亮,同樣走小文青風格,內部都同樣溫馨舒服!

▲主打多款燉飯,每款都加入左溫泉飯提升味道!仲加左藜麥、番茄同蔬菜添,夠晒健康!

▲奶昔都係佢地既主打,用左野莓做TOPPING,奶昔酸甜濃厚,口感豐富又健康!

桔梗燉飯

地址:台北市大同區赤峰街87號
營業時間:12:00-20:00
電話:02-2555-0355

時飴 Approprié

本身係IG網紅店,專賣千層蛋糕!而家仲開左實體店坐落赤峰街,人氣依然有冇減!佢特別在於純手工製作,連餅皮都係人手煎,製作過程繁複,一日只係做到十個蛋糕左右,所以非常搶手!經典款香芋千層蛋糕落足料,厚厚既芋泥夾係22層既手煎餅皮中間,份量十足!仲有小山園抹茶、高山烏龍茶、伯爵茶千層等多款茶味千層,濃濃既茶清香,食落味道天然又唔會太甜,難怪可以成為少女們至愛!

▲經典芋頭千層推出時引發瘋狂搭搶購,旨因佢加入左香濃芋泥同22層人手製作既餅皮,真係少D心機都好難做到!

▲小店仲會不時研發好多新口味,例如將當季時令水果加入千層蛋糕,做成水蜜桃千層、草莓千層、乳酪無花果千層等等

▲小店空間細細,只擺到幾張枱,但簡約創適,打卡一流!

時飴approprié 

地址:104 台北市 中山區 赤峰街8巷22號隔壁(面對建成公園)
營業時間:13:00-18:00 (星期一、二休息)
電話: 0909 611 695

文字來源:香港人遊香港/圖片來源:IG