佐敦甜品:【佐敦甜品店自創多款獨家甜品!必食西米麥提莎餡湯圓!】- 愛甜心甜品

今次介紹佐敦呢間甜品店係非傳統式甜品鋪,老闆自創左多款自家獨有甜品,例如西米麥提莎餡湯圓、西米芋頭餡湯圓等,全部食落去都比平時啲湯圓煙韌同特別。呢間除左特色甜品之外,仲會提供傳統糖水、多款小食、椰香特飲。係佐敦食完晚飯,如果唔想只食傳統甜品,可以試下呢間新派甜品店。

▲花布街($42): 其實呢個係芒果汁豆腐花再加蘆薈粒、黑珍珠同芒果布丁,一個價錢可以食到好多款配料。芒果汁係用新鮮芒果榨出黎,又甜又有極濃芒味,而芒果粒份量都唔少!

▲椰明珠($35):其實係椰汁西米露加湯圓,椰汁味好濃好香,湯圓皮比平時啲湯圓既糯米皮更加煙韌,餡係麥提莎,食落去都幾特別!

蓮子百合馬蹄露清心丸($38): 呢個相對上較為失望,馬蹄露係用馬蹄粉製成,馬蹄味就較淡,不過配料方面都幾足充,蓮子落同清心丸都好多粒,夏天食呢個夠哂清新

▲雪芒小丸子($40): 芒果味好濃,配埋芒果味雪糕,鐘意芒果味既朋友呢個甜品岩晒!另外仲有色彩繽紛既小丸子,食落去唔會話好粉,都幾煙韌!

芝麻椰汁西米圓($35):西米圓好特別,比平時湯圓更加煙韌,入面分別有芋頭餡、綠豆餡、西米餡三款各2粒。個人認為芋頭口味係最好食芋頭!

愛甜心甜品

地址:佐敦吳松街21號地下
營業時間:星期一至四15:00 – 01:00/星期五至六15:00 – 14:00/星期日17:00 – 01:00
電話:34815577

文字來源:香港人.遊香港/圖片來源:@fafafoodblog、@love.eat.piggy、@r_ckywa_ke_@my_lofty_eatology@misskatrinaky