遊韓國:【韓國便利店搵食攻略持續更新 一篇睇晒最新最HIT人氣新品】

韓國便利店成日都會推出新品引起搶購潮,去到韓國又點可以錯過呢D用平民價就歎到CP值勁高既人氣零食/飲品,一齊睇到下韓妹最近HIT D咩?

蜂蜜牛油「薰衣草藍莓味」薯片

呢款蜂蜜牛油薯片始祖時不時都會推出新口味,今次就推出好適合夏天既「薰衣草藍莓口味」。聽落又鹹又甜咁唔知伏唔伏?網路既評價都算唔錯,依然保留有原本濃郁既經典蜂蜜牛油香,只係聞落去多左陣藍莓味,唔會又酸又鹹,值得一試!

▲今次「薰衣草藍莓味」既新包裝用左紫色取代原本既黃色,非常清新又吸晴

▲相信大家對呢款薯片都唔陌生,一包1900韓幣左右,份量都唔少架

▲睇落同普通薯片冇咩分別,但其實用左歐洲薰衣草同瑞士既藍莓做的,口味獨特清新

雲呢拿牛奶

韓國香蕉牛奶大家都好熟,從最一開始既香蕉口味,到後來出左荔枝、水蜜桃、柑橘口味等等每次都掀起熱潮!最近就出左零負評既雲呢拿口味牛奶!零負評原因係雲呢拿同牛奶本身就超夾,而且唔會太甜,飲落就似融化既雲呢拿雪糕,味道滿分!

▲今次新推出既雲呢拿口味牛奶,一出就引起搶購,只因佢零負評,亦唔會太甜!

▲雲呢拿味牛奶售價依然只係1400won,唔洗hkd$10就歎到啦

▲由於佢甜度低,但奶味濃,好多韓妹仲將佢加入咖啡,自製成雲呢拿味Latte添,仲可以自己控制比例添,更香滑濃郁!

這種吐司&那種吐司

韓國好多高質既麵包店,但如果冇時間坐係Cafe慢慢歎麵包,CU便利店都推出左兩種CP值好高既麵包!名為「這種吐司」係朱古力,「那種吐司」係芝士味!同樣麵包夠軟餡多,如果微微叮翻熱佢,同外面買到既烘焙包相差無幾添!

▲「這種吐司」&「那種吐司」包裝都好可愛,售價只係$2300won

▲麵包份量都唔細架!

▲「這種吐司」係朱古力味

▲「那種吐司」係芝士味,餡料都唔少,而且芝士味十分香濃,CP值更高

▲雖然只係便利店出品,但麵包都夠軟,唔會太硬,如果微波加熱就仲好味!

「HOMEMADE布朗尼」

韓國便利店時不時推出超邪惡甜品,呢款名為HOMEMADE布朗尼,真係做到有自家製既感覺。最面上一層係脆口既朱古力,仲有少少麵包脆增加口感。下層係濃郁濕潤既朱古力蛋糕,層次感十足!

▲一份$3500won既HOMEMADE布朗尼蛋糕,都幾大份

▲最上面加左脆口既麵包碎,有少少花生既感覺

▲面既朱古力係脆口的,而且都幾厚,十足有飽足感,加上濕潤既朱古力蛋糕,真係成口都係朱古力!

大力水手日式炒麵味撈麵

三養牌出既大力水手點心麵係韓國小朋友既國民零食,類似我地既童星點心麵咁!而家呢個牌子出埋日式炒麵味既撈麵添!日本炒麵味醬汁,加埋沙律醬,夠晒滋味!有少少似香港既炒麵王,但日式醬油更濃更甜,買返酒店做宵夜就最岩了!

▲韓國三養既大力水手點心麵,曾經係韓國小朋友既國民零食,造型可愛!

▲同其他撈麵一樣,將日式醬汁同沙律醬落埋係個麵度,沙律醬完全加分!

▲日式炒麵味醬汁唔會太鹹,帶有少少甜味,加左沙律醬中和,唔經唔覺好快就食完一碗!宵夜必備!

男朋友女朋友三文治

早前韓國推出「男朋友三文治」大受歡迎,故事來自於一對已分手男女,女方係分手後因為太掛念男朋友做比佢食既藍莓醬三文治,而特登打比前男友詢問製作方法(佢聲稱真係唔係想復合架)。男朋友三文治用左忌廉芝士、藍莓醬同綿花糖,口感豐富!而新出既女朋友三文治,就用左新鮮香蕉同朱古力醬,更加香甜,仲有少少初戀既感覺?

▲早前推出既「男朋友三文治」大受歡迎,而家仲出埋「女朋友三文治」添

▲「男朋友三文治」加左棉花格同藍莓醬,味道好夾,酸酸甜甜!

▲而新出既「女朋友三文治」就用左香蕉同朱古力醬,比男朋友的更甜蜜!

▲滿滿既朱古醬爆晒出黎,加埋大大舊既香蕉,口感濕潤滋味!

(持續更新~)