露營必睇:【露營新手懶人包!香港露營資訊】- 新手營地+裝備+露營食譜

最近一到假日都會有唔少人會選擇去露營,係寧靜既郊區度休息下,享受一下大自然。但對於第一次或者唔係成日去露營既人有啲咩要注意呢? 當大家露完營果陣最好執番晒啲垃圾,唔好用火燒營地,咁樣大家先可以再有下次去同一個地方露營,如果破壞晒,個營地未必再適合露營。呢篇希望可以幫到大家去揀一啲官方易去又設施齊全既露營地方。

5個新手露營地方

1.南山營地

南山營地落車行一陣就到,好岩啲新手去。附近有個南山觀景台,行十分鐘石級就到。日頭可以望到貝澳周梅窩, 夜晚就可以賞月觀星,呢度空曠又少光害,絕對係個絕佳既賞月及觀星地點。

▲ 一大片草地又有樹蔭位。

▲營地附近有埋燒烤爐,檯、櫈。

官方營位:40個
設施: 洗手間、浴室、燒烤爐、晾衫架、水源
前往方法:東涌市中心巴士站乘搭3M(往梅窩)巴士,係「太古度假屋」落車,再行5分鐘就到營地

2.灣仔西營地

灣仔西營地位於西貢西郊野公園裡面,好近海下灣海岸公園,係呢度可以望晒成個海下灣美麗景色。這裡設施好齊全又有自來水供應,岩晒啲新手黎呢度露營。

▲一大片草原,仲可以係度放風箏。 

▲營地會有唔少牛、野豬,大家記得煮完野食執好晒啲垃圾同煮食工具,最緊要既係啲膠袋唔好周圍放,如果唔係比牛、野豬食膠袋就害左佢地。

官方營位:20個
設施:涼亭、燒烤爐、檯、櫈、大型浴室、洗手間、水喉
前往方法: 西貢市巴士總站搭94號巴士或由鑽石山巴士總站搭96R(星期六日先有)往黃石碼頭,總站落南之黎再搭街渡去灣仔半島碼頭,行約5分鐘就到營地。又或者西貢市巴士總站搭7號往海下小巴,係總站 落車。由海下村沿大灘郊遊徑步行前往營地約45分鐘

3.大嶼山昂坪營地

昂坪營地位於南大嶼郊野公園裡面,營地係鳳凰山同瀰勒山之間,呢度得樹林景無海景,同埋營地配套齊全。係呢度露營大家仲可以去「鳳凰觀日」,半夜行上去934米高的鳳凰山頂睇日出,有時仲會有雲海日出。

▲營地係一層層,唔會比前面個營擋左啲景觀。

▲可以凌晨4時帶定照明物品行山睇日出。

官方營位:10個
設施: 煮食爐位、檯、櫈、污水穴、洗手間
前往方法:東涌市中心或梅窩搭大嶼山巴士到「昂坪總站」落車,行去心經簡林方向往東山法門就到達營地

4.鶴藪營地

鶴藪營地位於八仙嶺郊野公園裡面,附近景點有鶴藪水塘,營地設施都好齊全,又有廁所,岩晒想體驗露營既女仔去。不過要留意既是營地一到假日就勁多人,大家記得要早啲去霸位!

營地附近有埋燒烤爐,檯、櫈。

▲假日都會好多人,要早啲黎霸位。

官方營位:40個
設施:燒烤爐、檯、櫈、晾衫架、浴室、涼亭、洗手間
前往方法: 粉嶺港鐵站搭52B號專線小巴去鶴藪,係鶴藪村總站落車。然後沿住鶴藪道往鶴藪水塘方向行行大約15分鐘就到營地

5.荃錦營地

荃錦營地位於大帽山郊野公園裡面,營地兩旁係麥理浩徑第九段同荃錦自然教育徑,呢度環境比扶輪營地好好多,而且地方都算大。

▲ 營地係一層層,唔會比前面個營擋左啲景觀。

▲假日都會好多人,要早啲黎霸位。

官方營位:10個
設施:燒烤爐、檯、櫈、污水穴、旱廁、流動廁所、水喉
前往方法:荃灣如心廣場或荃灣地鐵站上蓋巴士站搭51 號巴士往錦田,「大帽山郊野公園」站落車,步行約5分鐘就到營地

4樣新手露營裝備

如果大家想去一次體驗下既話,可以考慮先租用露營裝備,覺得自己係鐘意露營先再買自己裝備,因為太多人只係買完用一次就掉係營地附近,實在太浪費又唔環保。如果大家想租用既話可以係GOGOCamp度租用。

  1. 帳篷
    揀營最緊要揀番個有防水同防風能力,咁先適合郊外空曠既地方度用,當濕氣好重既時候都唔會整濕營入面啲野。所以買營前要留意外帳防水系數同埋內帳底部防水系數。外帳防水不夠高既話,大雨時就會慢慢滲水進到睡帳裡。內帳底部防水不夠高既話,可能睡到半夜就會覺得水氣係地下滲進。新手較需要注意的是大小,一般4人營訓2至3人較為舒適,6人營則訓4至5人剛剛好。

    ▲自立營 

    ▲自動營
  2. 天幕
    唔好以為天幕唔重要,當落雨、天晴既時候就幫得手。天幕大多數有兩款,一款是有銀面係底,一款係無。銀面塗層能夠隔離陽光輻射熱,係天幕下唔會感受陽光酷熱。

    ▲天幕一般都可以幾個人一齊用,係天幕下休息同煮食。
  3. 照明工具
    露營區多數都係郊區,唔係好多街燈,所以最好自行帶定照明工具,方便自己煮食。可以買頭燈或者營燈,頭燈會比較方便。

    ▲營燈可以方便放入營勾住,或者係天幕下掛住。 

    ▲頭燈方便係營地出入。
  4. 煮食鍋具
    如果唔係好講究係煮咩方便,露營煮公仔麵食就最方便,帶一個爐+一個煲+一支氣就煮到,而且又可以好快煮完。係香港地勢唔高,基本上邊爐氣都夠用同埋相對地比高山氣更容易買到。

    ▲高山氣

    ▲邊爐氣

    ▲邊氣爐頭

    ▲高山氣爐頭

    ▲1-2人Cook Set

2款露營特色煮食食譜

好多時新手露營煮食都會係朝早煮公仔麵、夜晚打邊爐,貪方便同可以好快煮完食到。

  1. A4紙箱焗雞

    做法好簡單,而且要準備材料唔多,只要有A4紙盒、炭、錫紙、燒烤叉同埋雞就得。需要係露營前一日預先將雞醃好。要用燒烤叉交叉方向撐起整隻雞,然後放入紙箱入面。紙箱要用錫紙鋪好紙盒內部同埋盒蓋。要放燒紅左既炭落紙盒裡,但要記得將炭啲火整熄先。
  2. 薑汁維他奶燉蛋(2人份量)整呢個甜品好簡單,要準備既材料都好少,只要一包250ml薑味維他奶、雞蛋2隻、糖3茶匙就得。不過需要用個蒸架加水蒸,然後用錫紙將個Cook Set煲蓋封好。煮既方法先將雞蛋兩隻同糖砂攪勻。 用隔渣筲箕過濾一次,然後加入薑味荳奶攪勻就可以倒落個紙杯度。

文字來源:香港人.遊香港/圖片來源:@tim.chan.5439、@maggiescarlettchanyeungchunyiuivanlau_0702、@andywanck、@sugarfreeaye、@yingsb_0312hkc0079@vicky_liuuuu