【行山路線：彌勒山日落！】

[駐場博客小牛牛快樂行山郊遊相集by Chan Keung] 今次介紹一條比較簡單嘅路線比大家，雖然唔係正式郊遊徑，但係山徑路面大部分都係泥石路，路徑明顯，好適合一啲有行山經驗，但係行郊遊徑行到悶悶哋嘅山友。

首先在東涌坐23號巴士到昂坪總站落車，整理好裝備之後開始起步，經過大佛正面，旁邊有條石屎路一直行，大約一公里之後就到達法門古道入口，响旁邊沿石級直上，進入彌勒山郊遊徑直上，首段大部分都是石級路，再轉入山徑，呢一段就泥石路為主，好快上到小山坡，有一座類似巨型測量儀嘅物體，呢度比較開掦，背向鳯凰山，周圍仲有一嚿嚿巨石，可以作為打卡用途。

沿山徑繼續上，呢一段開始比較崎嶇，不過唔難行，建議穿手套，長褲，避免𠝹傷手。上彌勒山路程唔算長，好快就到達山頂，除咗標高柱之外，旁邊仲有一啲測量儀器在興建中，有重重鐵絲網圍住，呢個山頭仲係芒草盛放熱點，每逢踏入秋季，芒草就會生長得好茂盛。打完卡沿山徑落山，一口氣落到彌勒山郊遊徑接駁處，呢度仲可以近距離見倒360纜車添，在360救援徑附近有一條長長石級，又被山友稱為~天國階梯。

當天落山正是日落時份，觀賞斜陽美景，完滿了今次開心旅程。

注意事項:
建議先下載行山地圖apps，避免迷路
有少部份需穿越叢林，建議帶備手套
愛護郊野清潔人人有責，自己垃圾自己帶走