【山勢險峻打大佬之旅!勇闖西貢三尖之蚺蛇尖! 】

[駐場博客 @ 小牛牛快樂行山郊遊相集by Chan Keung]在夏季就到,天氣開始漸漸變熱,小編襯氣温未上到三十幾度, 一於揀番條高山登頂路線行下先。西頁有三尖,其中以蚺蛇尖較為難度最高,今次就同大家去闖一闖。西貢有三尖,以蚺蛇尖最多人認識, 由於有好多路徑都佈滿碎石散沙,所以特別難行, 同埋好鬼斜 ,一個唔小心好容易就撻到攤攤腰, 所以被評為5星路線。

早D起身先坐地鐵去到彩虹站,再1A小巴到西貢碼頭,再轉94巴士,去到北潭凹落車, 麥理浩徑2段起步,頭段平緩易行,經過牛湖墩,再到赤徑,可欣賞一吓海景,仲有一個小碼頭可以打打卡,跟住再行到上大浪坳,見倒涼亭左轉上蚺蛇徑,呢度沿山徑慢慢斜上,頭段都易行,但慢慢就變為碎石散沙路,記住慢慢行唔好心急,因為越行越斜,好容易跣倒!
上到半山望去鹹田灣,大浪灣一帶,風景已經靚到爆燈, 藍天白雲一望無際,又可以睇到連綿不斷山脈,真係一見難忘!

一路向上繼續 慢慢行,好唔容易撐到上去蚺蛇尖,嘩! 超靚風景, 遠望米粉頂,東灣山,大浪頭, 氣勢磅礡, 咁辛苦撐到上嚟都值得。

打過卡後,沿路折返, 真係上山容易落山難,條路十分斜, 真係好跣, 我見到好多山友都跣咗落地下,包括我自己在內, 真係要好好好小心落山, 據報導蚺蛇尖發生過多次行山人仕跣低跌傷手腳,所以行唔行大家評估一吓先至好呀!最後小編當天行咗6小時連休息+拍照。

▲由西貢坐94號巴士去到北潭凹落車-由麥理浩徑2段起步

▲經過牛湖墩再行到去赤徑,之後再走到大浪坳沿途都可以看到風光美景

▲赤徑附近可以欣賞美麗嘅石灘,會經過一個小碼頭係打卡熱點

▲行到去蚺蛇坳見到一個涼亭轉咗進入蚺蛇徑初初平緩山徑易行

▲遠望蚺蛇徑成條路都係碎石散沙組成

▲行到呢度冇理由退縮啫-繼續向上行接受挑戰

▲條路越行越崎嶇

▲其實另外仲有好多條路線可以行上蚺蛇尖不過條條路都係碎石山沙冇一條好行

▲爛得離仲好鬼跣腳

▲其中ㄧ個小山頭

▲歡樂過後沿馬鞍山郊遊徑返回馬鞍山燒烤場

▲好唔容易撐到上頂,不過睇到咁靚嘅風景!一切都值回票價,倦意全消!

▲連綿不斷的山脈美不勝收

▲開始沿路落山真係上山容易落山難好鬼跣,要好小心慢慢落見倒好多山友都跌倒

▲行山去赤徑,睇到美麗嘅日落完成今日刺激的旅程

蚺蛇尖

路線: 路線: 北潭凹>麥理浩徑2段>牛湖墩>赤徑>大浪㘭>蚺蛇㘭>蚺蛇徑>蚺蛇尖
沿路折返約12公里,全程約6小時

注意:
⚠路程較遙遠, 沿途沒有補給站,帶備充足糧水
⚠ 蚺蛇徑路段比較崎嶇,十分傾斜,滿佈碎石散沙 ,容易跣倒,必需小心慢行
⚠ 愛護郊野清潔,人人有責,自己垃圾自己帶走
⚠蚺蛇尖屬5星路線,落山容易跣倒,必需量力而為,自行評估風險

文字/圖片來源 :小牛牛快樂行山郊遊相集by Chan Keung