fbpx
香港人遊香港

【行山路線:大東山年度盛事芒草季!】


[駐場博客小牛牛快樂行山郊遊相集by Chan Keung又到芒草盛放季節啦! 各熱門山頭一到假日,又會人頭湧湧呢! 一年一度~”觀芒”盛事,梗係趁吓熱鬧,第一時間衝上大東山了解下芒草生長情況啦。

中午12點由東涌站起步,先走一段東梅古道,轉上一段較崎嶇山徑,好快到達婆髻山腰,要上山頂一段都幾斜吓,要手腳並用,唔慳力可以前往薄刀屻,如果再想慳力慳時間,都可以一直走到天書壁,有兩個入口選擇,行到天書壁頂部,需要好小心,拉住樹根落直壁,大約十幾呎高,落到底靠左手面望就好易揾倒。天書壁其實由兩塊直壁成直角組合而成,呢度亦都係青龍石澗源頭,夏天雨季有流水從崖頂流下,形成小小瀑布,景色美麗。打完卡後繼續走,經過鴨腳瀝到達三山台,呢度一個一個小山岳已經滿佈芒草,非常美麗。

經過蓮花山到達雙東㘭,嘩! 全個山頭都可以見到芒草搖曳,又見到一間間小石屋分佈在各處,好多山友都攞相機不停地拍拍拍,不過仲見到有部分年青人走上屋頂打卡,其實呢個已經呼籲過好多次,石屋頂部結構可能會被損害,非常危險和不負責任呢! 石屋旁邊又有一堆一堆垃圾,最過份仲有人吸煙,小編都勸佢哋唔好响呢度吸煙, 風高物燥,萬一引起山火,就”一鑊熟”

不過見到大片靚靚芒草,心情頓時高興起來,啱啱又黄昏日落時間,斜陽+芒草,風景無得輸,影過夠之後沿大石級落到伯公坳完成今次旅程。


▲部份路段比較崎嶇需手腳並用


▲回望鴨腳瀝婆髻山三山台


▲蓮花山芒草ㄧ樣美麗


▲天書壁入口旁邊


▲尋找天書壁需攀爬ㄧ小段樹根落谷底


▲天書壁是由兩塊成九十度石壁組合而成的


▲大東山有多塊巨石分佈各處


已經呼籲過好多次大東山石屋係唔可以攀爬上屋頂好容易會損壞石屋結構


▲遠看鳳凰山


▲色彩鮮豔的小甲蟲


▲拍攝芒草最佳時機為黄昏日落時段


▲斜陽芒草風景無得輸


▲沿鳯凰徑繞過爛頭營和大東山


▲鳯凰徑發現小豬石刻


▲黃昏日落時是拍攝芒草的最佳時機


▲芒草搖曳風景美麗


▲大東山是山友芒草季節首選


▲大東山可遙望鳳凰山


▲大東山路徑易行適合ㄧ家大細同行


▲沿山徑落伯公坳完成旅程

大東山

注意事項:
⚠ 小部份路途崎嶇,需要手腳並用
⚠ 落天書壁有ㄧ定危險性,可以唔走直往鴨腳瀝
⚠ 風高物燥切勿在郊野吸煙,容易引起山火,效果嚴重
⚠ 愛護郊野清潔人人有責,自己垃圾自己帶走

路線: 東涌>東梅古道>婆髻山>薄刀屻 >天書壁>鴨腳瀝>三山台>蓮花山>雙東坳>二東山>爛頭營>大東山>伯公坳 全程約11公里

FB_icon 小牛牛快樂行山郊遊相集by Chan Keung
======================================================================
相關文章:
Tagged with:    

Follow us

合作查詢

歡迎與我們聯絡, 查詢合作